Brazília, 31 Outubru 2016 – S.E. Prezidente Repúblika, Taur Matan Ruak, hala’o enkontru kortezia ida ho Sekretáriu Jerál Eleitu Nasoins Unidas nian, Eng. António Guterres, iha Hotel Royal Tulip Brazília, segunda-feira, 31 Outubru, oras Brazíl nian, ka iha tersa-feira, 1 Novembru, oras Timor-Leste nian, iha marjen Simeira CPLP ba dala XI.

Iha enkontru refere, Xefe Estadu Timor-Leste hato’o nia votus parabéns no dezeju susesu ba Eng. António Guterres, ne’ebé sei asume knaar nu’udar Sekretáriu Jerál ONU nian hahú husi fulan-Janeiru 2017 hodi troka Sekretáriu Jerál atuál, Sr. Ban Ki-moon.

“Hein katak Ita-Boot sei halo mudansa ruma iha Nasoins Unidas nia laran atu nune’e bele hamorin mós naran CPLP nian iha mundu, ne’ebé Timor-Leste mós hola parte iha komunidade ne’e”, dehan Taur Matan Ruak.

Informa liután katak, S.E. Prezidente Repúblika, Taur Matan Ruak, iha esperansa boot ida katak, Sekretáriu Jerál eleitu bele dezenvolve di’ak liután misaun ONU nian iha mundu.

Iha biban refere, Xefe Estadu mós hato’o konvite verbál ba Sekretáriu Jerál Eleitu atu vizita Timor-Leste. Hatán ba konvite ne’e, Eng. António Guterres sei informa ba ninia Gabinete atu nune’e bele tau iha planu.

 

Prezensa Sekretáriu Jerál Eleitu ONU, Eng. António Guterres, iha Brazíl hanesan konvidadu espesiál hodi partisipa simeira Xefe Estadu no Xefe Governu CPLP nian ba dala XI, ne’ebé maka ba tinan ne’e Timor-Leste entrega prezidénsia rotativa ba Brazil hafoin asume durante tinan rua nia laran (2014-2016).HOTU