Iha loron 19 Jullu 2016, Gabinete Sua Exelénsia Prezidente Repúblika nian simu tiha ona Primeira Alteração à Lei n.◦ 1/2016, de 14 de janeiro, que Aprova O Orçamento Geral do Estado para 2016.

Parlamentu Nasionál Timor-Leste halo tiha ona alterasaun ba Orsamentu Jerál Estadu 2016 nian husi            $ 1.562,233 mil milhões dólares no aumenta ba $ 1.952,938 mil milhões dólares. Oras ne’e Sua Exelénsia Prezidente Repúblika ezerse ninia devér no kompeténsia tuir Konstituisaun Repúblika Demokrátika Timor-Leste atu halo promulgasaun ka vetu.

Prezidente Repúblika fó-hanoin ona antes kona-ba nesesidade atu tau atensaun ba setór sira hanesan saúde, edukasaun, agrikultura, aumenta investimentu ba fornesimentu bee moos no ba saneamentu báziku. Prezidente Repúblika mós husu tiha ona atensaun ba nesesidade atu garante dezenvolvimentu iha Rai laran ne’ebé mak bele kontinua nafatin ba loron oin mai, aumenta osan ne’ebé mak la’ós mai hosi mina no hamenus gastu ne’ebé mak sai hosi osan mina nian.

Xefe Estadu durante ne’e orienta ninia ezersísiu podér sira ne’ebé previstu iha Konstituisaun hodi tane aas interese Nasaun nian. Ne’e duni, Prezidente Repúblika, Taur Matan Ruak, sei kontinua tau matan nafatin ba ezekusaun Orsamentu Jerál Estadu ida ne’e, hola parte iha prosesu atu harii Rai ida ne’ebé forte no justu ba ema hothotu.

Palásiu Prezidensiál Nicolau Lobato, loron 20 fulan-Jullu tinan 2016