Sua Exelénsia Prezidente Repúblika, bazeia ba proposta governu nian no hafoin rona tiha Konsellu Superiór Defeza no Seguransa, ohin nomeia ba mandatu tinan ida tan haktuir art. 195 hosi Estatutu Militár sira Forsas Armadas nian:

  • Majór Jenerál Lere Anan Timur nu’udar Xefe Estadu Maiór Jenerál Forsa Armada sira-nian,
  • Brigadeiru Jenerál Filomeno da Paixão de Jesus hanesan Vise Xefe Estadu Maiór Jenerál Forsa Armada sira-nian no
  • Koronél Falur Rate Laek hanesan Xefe Estadu Maiór Forsa Armada sira-nian.

Nomeasaun hirak-ne’e tama iha vigór iha loron 6 fulan-Outubru tinan 2016, iha data hakotu xefia sira-nia mandatu ikus liu, no sei extende sira nia mandatu to’o outubru 2017.

Iha okaziaun hanesan, Sua Exelénsia nomeia mós:

  • Tenente Koronél Marcelino Ximenes, alias “Rizai”, ba Komandante Forsa Terrestre;
  • Kapitaun Fragata Adão de Brito, alias “Jacky” ba Komandante Komponente Forsa Navál Lijeira;
  • Tenente Koronél Celestino Pinto, alias “Daileba” ba Komandante Komponente Formasaun no Treinu;
  • Tenente Koronél Benedito Dias Quintas, alias “Punu Fanu” ba Komandante Komponente Apoiu no Servisu.

Sua Exelénsia Prezidente Repúblika no Komandante Aas Liu Forsa Armada sira-nian, hodi defende F-FDTL nia koezaun no prestíjiu, sente ksolok tebes atu haree xefia aas liu F-FDTL nian kaer filafali ba legalidade ne’ebé nia sempre luta ba, hafoin altera tiha Estatutu Militár sira Forsas Armadas nian (Dekretu Lei nr. 7/2014 hosi loron 12 Marsu (Estatutu Militár sira F-FDTL nian), ne’ebé altera hosi Dekretu Lei nr. 28/2016 hosi loron 13 fulan-Jullu) no kumpre tiha formalidade legál hotu-hotu.

Palasiu Prezidente Nicolau Lobato, 21 Novembru 2016.