Kona ba Timor-Leste

Timor-Leste (ofisialmente República Democrática de Timor-Leste) hanesan nasaun ida iha Sudeste Aziátiku. Territóriu Timor-Leste kompostu husi parte lorosa’e tomak illa Timór nian, illa Ataúru no Jaku, no enklave Oekusi iha parte loromonu illa Timór nian, parte Timór Indonézia. Nasaun ne’e nia área totál mak 15.410 km2. Nia situa iha distánsia 640 km husi parte norte Darwin nian, Australia.

Istória badak kona-ba Timor-Leste

Tuir antropólogu sira katak, ema ne’ebé tama Timór ba dahuluk, maizumenus iha tinan 40.000 to’o 20.000 m.K. (molok Kristu), mak husi tipu vedo-australóide, hanesan ema Vedas sira husi Seilaun. Tuirmai, Melanéziu sira mak tama Timór iha tinan 3000 m.K. Povu hirak-ne’e hanesan sira-ne’ebé hela daudaun iha Papua-Giné Foun no iha rai-kotun seluk iha Pasífiku. Dala ruma, tanba Timór nia kondisaun jeolojia, povu foun ne’e no populasaun lokál la kahur malu no halo Melanéziu sira halai ba foho. Karik ne’e mak razaun Timór iha lian oioin. Iha 2.500 m.K., “proto-malaiu” sira – povu ida husi Xina Kraik no Indoxina Leten – to’o iha Timór. Ema Xina ne’ebé agora daudaun hela iha Timór, maioria Hakka, hanesan nafatin komunidade ida ne’ebé importante liu iha área komérsiu.

Kolonizasaun Portugál iha Timór

Ema Portugál to’o iha Timór liuhusi enklave Oekusi nian maizumenus iha 1515. Sira halo lukru barak husi esportasaun ai-kameli, maibé sira esplora barak demais rekursu hirak-ne’e. Iha 1815, ai-kameli susar atu hetan ona, nune’e Portugés sira introdús plantasaun kafé, inklui masin-midar no algodaun. Maski nune’e, Timor-Leste hanesan nafatin nasaun subdezenvolvidu ida, ne’ebé nia ekonomia bazeia ba troka-sasán. Molok Funu Mundiál Daruak, kapitál Dili la iha asesu ba eletrisidade no bee moos, no estrada kuaze la iha. Maski nune’e, molok funu, komunidade internasionál rekoñese pozisaun estratéjiku Timór nian. Hori-bainhira Funu Mundiál Daruak hahú, ema Austrália no Olanda, ne’ebé rekoñese Timór nia importánsia nu’udar zona tampaun ida, to’o iha Dili maski Portugés sira halo protestu. Ema Japaun sira uza prezensa ema Austrália nian nu’udar oportunidade hodi halo invazaun iha fulan-Fevereiru 1942. Sira okupa Timór to’o iha fulan-Setembru 1945. Iha funu nia rohan, Timór nia situasaun aat liu. Durante okupasaun Japaun, Timoroan besik na’in-50.000 fó an ba mate hodi reziste ba invazór sira no luta hamutuk ho Austrália. Japonés sira obriga povu timoroan fó han ba sira. Nune’e, hori-bainhira ema Japaun rende an, Timór iha de’it mukit no destruisaun.

Tinan 1960 – Tempu foun ba kolonializmu portugés

Portugés sira halo esforsu uitoan de’it hodi harii hikas fali Timór. Prosesu dezenvolvimentu la’o neineik. Entre 1953 no 1962, Timór nia taxa kreximentu anuál 2%. Entretantu, Nasoins Unidas deklara Timor-Leste hanesan territóriu ida ne’ebé la autónomu iha administrasaun Portugál nia okos. Só iha momentu ne’e mak Portugál halo esforsu maka’as hodi dezenvolve Timor-Leste liuhusi planu tolu tuituir malu, ida-idak ba períodu tinan lima. Portugál nia forma ukun kahur governasaun diretu no la diretu. Sira ukun populasaun nu’udar lubun ida liuhusi estrutura podér tradisionál, la uza funsionáriu públiku koloniál. Modelu governasaun hirak-ne’e la lori mudansa ida ba sosiedade timoroan tradisionál.

Revolusaun Portugál nian iha 1974 (Revolução dos Cravos) fó impaktu kedas ba kolónia portugeza hotu-hotu. Portugál nia ambiente polítiku “eskerda”, nune’e primeira vés Governu portugés autoriza Timoroan sira kria sira-nia partidu polítiku rasik.

Iha loron 11 fulan-Agostu 1975, partidu polítiku timoroan ne’ebé konservadór liu halo golpe ho objetivu atu hamonu administrasaun portugeza no hanetik partidu FRETILIN (Frente Revolucionária de Timor-Leste Independente) nia dalan hodi to’o ba podér. Konflitu ida-ne’ebé mosu entre partidu polítiku timoroan rua fó fatin ba violénsia, ne’ebé rezulta ema na’in-2.000 lakon sira-nia vida. Iha loron 28 fulan-Novembru 1975, FRETILIN halo proklamasaun independénsia no hanaran Timór “República Democrática de Timor-Leste” (RDTL). Maski nune’e, RDTL la tahan ba tempu kleur tanba nasaun balun de’it mak rekoñese RDTL, liuliu eis-kolónia sira Portugál nian. Liutiha loron sanulu, iha loron 7 fulan-Dezembru tinan 1975, tropa indonézia tama Timór.

Okupasaun Indonézia nian

Iha tinan dahuluk okupasaun Indonézia nian, Timoroan na’in-60.000 lakon sira-nia vida. Estima katak totál ema na’in-200.000 mate iha tempu okupasaun tomak. Maski Nasoins Unidas halo sensura hasoru okupasaun indonézia, Indonézia hametin nafatin ninia podér hodi investe osan maka’as iha Timor-Leste, nune’e halais Timór nia kreximentu ekonómiku ne’ebé atinje taxa média anuál 6% durante períodu 1983-1997. La hanesan ho administrasaun Portugál nian, Indonézia adota rejime forte no diretu ida. Timoroan sira nunka simu rejime ne’e tanba hakarak prezerva sira-nia kultura no identidade nasionál.

Iha tinan 1991, militár indonéziu sira konkorda ho vizita husi delegasaun parlamentár portugeza ida. Besik data vizita ne’e, vizita kansela tiha. Forsa indonézia sira kontinua nafatin halo atake, ne’ebé rezulta tiru mate joven estudante Sebastião Gomes mate no timoroan sira seluk tama prizaun. Iha loron 12 fulan-Novembru 1991, Timoroan rihun ba rihun halo manifestasaun tuir dalan ba Santa Cruz hodi fó omenajen ba Sebastião Gomes. Ezérsitu indonéziu tiru hasoru manifestante sira. Liu ema na’in-200 lakon sira-nia vida. ‘Masakre Santa Cruz sai hanesan “pontu nakfilak” iha okupasaun Timór nian wainhira vídeo kona-ba masakre fó sai ba komunidade internasionál. Ema no organizasaun hirak hahú fó presaun ba sira-nia governu no organizasaun internasionál sira. Iha 1992, wainhira lider rezisténsia Xanana Gusmão tama dadur, komunidade internasionál komesa loke matan ba situasaun violasaun direitus umanus ne’ebé komete iha Timór.

Indonézia komesa hetan presaun maka’as ne’ebé kulmina iha fulan-Outubru 1996 ho atribuisaun ba Prémiu Nobel Pás ba lider timoroan na’in-rua, Amu-Bispu Ximenes Belo no José Ramos-Horta. Rekoñesimentu ida-ne’e hasa’e movimentu ba independénsia. Iha 1997 no 1998, Suharto nia rejime “Orden Foun” enfrenta krize ekonómiku maka’as ne’ebé rezulta populasaun ezije mudansa polítika. Suharto tenke rezigna an no substitui husi ninia vise-prezidente Dr. B.J Ainun Habibie. Prezidente foun ne’e lakohi kaer ona provínsia Timór ho razaun katak nia halo “todan” finanseiru ba Estadu. Iha fulan-Janeiru tinan 1999, nia fó “autonomia luan” ba Timor-Leste. Nia dehan katak karik Timoroan sira lakohi simu ninia proposta, Indonézia prontu atu husik Timor-Leste. Iha fulan-Maiu tinan 1999, nia konkorda atu hala’o konsulta populár iha Timor-Leste ne’ebé hetan apoiu husi sekretáriu-jerál Nasoins Unidas, Kofi Annan.

Referendu ba liberdade

Iha tinan 1999, Nasoins Unidas komesa prepara ba referendu liuhusi Misaun Asisténsia Nasoins Unidas nian iha Timor-Leste, UNAMET. Iha loron 30 fulan-Agostu, maioria Timoroan (78%) vota ba independénsia. Milísia pró-integrasionista sira hatán ho violénsia maka’as hodi sunu infraestrutura no oho ema barak iha territóriu tomak. Nune’e, populasaun katoluk ida mak forsadu atu halai ba kampu refujiadu iha Timor Osidentál no iha rai-kotun sira seluk besik Timór. Populasaun katoluk ida tan buka hakmahan-fatin iha foho. Estima katak ema na’in-2.000 lakon vida iha ambiente violénsia ida-ne’e. Konsellu Seguransa Nasoins Unidas nian fó autorizasaun ba forsa multinasionál (INTERFET) atu tama Timór iha estrutura komandu Austrália nia okos hodi harii fali pás no seguransa. Nasoins Unidas lansa mós operasaun umanitáriu boot ida ne’ebé inklui fó hahán no kuidadu báziku sira seluk ba populasaun. Iha loron 25 fulan-Outubru tinan 1999, Konsellu Seguransa Nasoins Unidas estabelese Administrasaun Tranzitória Nasoins Unidas nian ba Timor-Leste (UNTAET) nu’udar operasaun pás ida ne’ebé integradu no multidimensionál hodi kaer Timor-Leste nia administrasaun to’o ninia independénsia.

Independénsia

Iha loron 30 fulan-Agostu tinan 2001, Timor-Leste hala’o ninia eleisaun livre ba dahuluk. Iha loron 20 fulan-Maiu tinan 2002, Timor-Leste sai nasaun demokrátiku nurak liu iha mundu no nasaun dahuluk iha miléniu datoluk. Komemorasaun ba independénsia hala’o iha fatin istóriku Tasi Tolu, iha Dili. Hola parte iha serimónia ne’e, sekretáriu jerál Nasoins Unidas, Kofi Annan, eis-Prezidente Estadus Unidus Bill Clinton no Prezidente Indonézia Megawati Sukarnoputri. Iha meianoite, loron 19 fulan-Maiu, Timoroan sira hi’it bandeira foun Timor-Leste nian no kanta inu nasionál. Luta naruk Timór nian ba liberdade hotutiha.

Feriadu nasionál sira

Feriadu Timor-Leste nakfahe ba feriadu sira-ne’ebé liga ba luta ba independénsia no mós ba feriadu relijiozu sira:

Data Naran Observasaun
1 Janeiru Tinan Foun
data variavel Eid al-Adha
Marsu-Abríl Sesta-Feira Santa
1 Maiu Loron Traballadór
20 Maiu Loron Restaurasaun ba Independénsia Nasoins Unidas fó hikas soberania ba Timor-Leste, 2002
Maiu-Juñu Korpu de Deus
30 Agostu Loron Konsulta Populár Aniversáriu Konsulta Populár, 1999
1 Novembru Loron Santu sira-nian
2 Novembru Loron Matebian sira-nian
12 Novembru Loron Nasionál Juventude Aniversáriu masakre Santa Cruz, 1991
28 Novembru Loron Proklamasaun Independénsia 1975
data variavel Idul Fitri
7 Dezembru Loro ba Eroi Nasionál sira-nian Aniversáriu Indonézia tama Timór,1975
8 Dezembru Nosa Señora Imaculada Conceição
25 Dezembru Natál

Lei prevee mós katak Governu bele hakotu fó toleránsia pontu iha data komemorativa ofisiál tuirmai:

Data Naran
Fevereiru-Marsu Kuarta-Feira Sinzas
Marsu-Abríl Kinta-Feira Santa
Maiu-Juñu Loron Na’i Jesus Kristu Sa’e ba Lalehan
1 Juñu Loron Mundiál Labarik sira-nian
20 Agostu Loron FALINTIL-Forças Armadas para a Libertação Nacional de Timor-Leste (FALINTIL)
3 Novembru Loron Nasionál Feto Timor-Leste
10 Dezembru Loron Internasionál Direitus Umanus

Leave a Reply

Your email address will not be published. Required fields are marked *