Palásiu Prezidente Nicolau Lobato 17 Fevereiru, 2015

Exelénsia sira, Señora no señór Embaixadór sira,

Membru Korpu Diplomátiku no Konsulár sira, Distintu konvidadu sira.

 

Hakarak fó ha’u-nia boas vindas ba Ita-Boot sira hotu.

Ha’u hato’o saudasaun ba señora embaixadora sira husi Estadus Unidus no Tailándia, ba membru korpu diplomátiku foun ne’ebé maka rezidente iha Dili, membru korpu diplomátiku hotu-hotu ne’ebé rezidente, no mós ba señór no señora embaixadór sira ne’ebé ohin mai aprezenta karta kredensiais, inklui foin ba dala uluk embaixadór husi Giné Ekuatórial – nasaun ne’ebé maun-alin ho ita iha Komunidade Rain sira-ne’ebé Ko’alia Lia-Portugés dezde Konferénsia Xefe Estadu no Governu CPLP nian ne’ebé hala’o iha tinan kotuk, iha fulan-Jullu, iha Dili.

Ha’u hakarak mós fó benvindu ba señór embaixadór sira-ne’ebé mai halibur malu ho ami iha Dili.

Ha’u-nia votus estadia di’ak no produtivu iha Timor-Leste.

Ita-nia enkontru ne’e hala’o iha momentu furak ida ba ha’u-nia rain, iha ne’ebé jerasaun foun ida foin simu lideransa Governu nian no asume responsabilidade barak liután hodi lori ami-nia Nasaun ba oin.

Ho laran-ksolok boot ha’u hakarak aprezenta Ministru Negósiu Estranjeiru no Kooperasaun foun, señór Hernâni Coelho. Imi balun koñese tiha ona nia husi tempu ne’ebé nia kaer knaar sira seluk, tanba nia nu’udar diplomata ne’ebé iha esperiénsia barak.

Tranzisaun xefia Governu nian ba jerasaun foun sira, ne’ebé simboliza husi pose ne’ebé horisehik ha’u fó ba VI Governu Konstitusionál, hala’o iha ambiente estabilidade. Timoroan sira hasoru tempu prezente ho hakmatek no hateke ba futuru ho espetativa no esperansa.

Nu’udar nasaun, ami sei enfrenta dezafiu lubuk ida. Hodi hakat liu dezafiu estruturál sira-ne’e ami presiza determinasaun, laran-metin no tempu.

Durante prosesu ne’e, importante liu mak fó konfiansa ba instituisaun sira. Tranzisaun ba jerasaun foun ne’ebé ami hakarak hala’o ho neineik no hakmatek hanesan fatór importante ida ba konfiansa.

Ho tempu, alta entidade sira-nia karizma sei troka hosi konsolidasaun no afirmasaun institusionál- no sidadaun sira-nia konfiansa ba instituisaun sira-ne’e.

Reprezentante nasaun nian iha Parlamentu Nasionál konkorda ho malu kona-ba prioridade sira dezenvolvimentu nian no Estadu nia opsaun orsamentál sira.

Unidade labele hanetik Parlamentu Nasionál atu hala’o ninia kompeténsia fiskalizasaun ba Governu nia asaun. Kompeténsia hirak-ne’e sei kontribui atu hadi’ak podér ezekutivu nia dezempeñu.

Ha’u la hatene kona-ba rai seluk ne’ebé bele sente orgullu hanesan Timor-Leste tanba hala’o tiha ona buat barak iha tinan sanulu-resin-rua dezde Restaurasaun Independénsia.

La’ós de’it Timoroan sira-nia determinasaun ne’ebé maka’as mak hamosu rezultadu sira-ne’ebé alkansa tiha ona. Rezultadu sira-ne’e hatudu mós susesu husi parseria sira-ne’ebé ami harii ho komunidade internasionál no ami-nia nasaun-belun ne’ebé Ita-Boot sira reprezenta.

—X—

Pás no estabilidade hanesan fatór importante tebetebes ba Nasaun sira-nia dezenvolvimentu no prosperidade.

Ha’u preokupa ho konflitu sira-ne’ebé mak mosu iha nasaun oioin, liuliu iha Síria, Irake, Líbia, Sudaun Súl no Ukránia. Nasaun sira-ne’e viola ema nia Direitu ba Moris loroloron. Povu sira-ne’ebé hela iha ne’ebá la hetan oportunidade dezenvolvimentu sosiál no ekonómiku.

Terrorizmu internasionál fó impaktu mós ba ita hotu. Aproveita momentu ne’e hakarak fahe ha’u-nia sentimentu solidariedade ba vítima sira no família vítima sira. Ha’u hakarak hato’o mós ha’u-nia solidariedade ba povu Nijéria, Ejitu, Japaun, Austrália, Fransa, Dinamarka, Reinu Unidu, Estadus Unidus no nasaun sira hotu ne’ebé sai vítima husi asaun terrorizmu foin lailais ne’e.

Palestina no Sahará Osidentál sei limita barak liu sira-nia povu nia direitu fundamentál, nune’e viola rezolusaun sira Nasoins Unidas nian.

Timor-Leste hakarak pás no respeitu ba malu iha Palestina no Izraél nu’udar Estadu soberanu sira, no defende povu Saharauí nia direitu ba autodeterminasaun.

Ami husu ba parte sira hotu no mós ba komunidade internasionál atu promove liután diálogu ho objetivu atu alkansa pás no respeitu ba Direitu no ba valór sira Nasoins Unidas nian.

Maski nune’e, ita iha razaun barak atu haksolok. Ho laran-ksolok boot ha’u fó parabéns ba governu Estadus Unidus no Kuba tanba hola ona inisiativa atu normaliza sira-nia relasaun diplomátika sira.

Abandonu husi polítika eskluzaun no izolamentu hirak ne’ebé falladu bele kontribui maka’as hodi halakon foku tensaun ida ne’ebé dada tempu naruk.

Normalizasaun relasaun sira-ne’e sei fó impulsu maka’as tebes ba amizade no respeitu ba malu entre povu sira Amérika sira-nian.

Exelénsias,

Dame nu’udar buat murak di’ak tebes. Ha’u-nia rain nia esperiénsia naruk kona-ba libertasaun no independénsia foka liu ba diálogu, pás no rekonsiliasaun nu’udar instrumentu ba dezenvolvimentu no progresu sosiál.

Kooperasaun internasionál ba pás no dezenvolvimentu hamosu ona rezultadu hirak relevante no klaru ne’ebé Timoroan hotu-hotu apresia.

Timor-Leste hakarak hakle’an nafatin ninia partisipasaun iha “konsertu Nasaun sira-nian” no mós iha sistema Nasoins Unidas nian hodi hametin kondisaun sira-ne’ebé di’ak ba pás no estabilidade iha nivel hotu-hotu.

Nune’e, ha’u propoin brinde ida:

Ba ita-nia relasaun amizade no kooperasaun atu bele sai metin liután hodi garante dame no moris di’ak ba ita-nia povu sira.