Prémiu Direitus Umanus

“Sérgio Vieira de Mello”

Prémiu Direitus Umanus “Sérgio Vieira de Mello” ne’e kria ho intensaun atu fó omenajen ba diplomata Brazileiru Sérgio Vieira de Mello, ne’ebé mate iha fulan-Agostu tinan 2003, iha atentadu terrorista nian ida iha Irake. Nia sai nu’udar Xefe Administrasaun Tranzitória Nasoins Unidas nian iha Timor-Leste (UNTAET), entre fulan-Novembru tinan 1999 no fulan-Maiu tinan 2002.

Prémiu ne’e nu’udar inisiativa Prezidensiál, ne’ebé institui tuir artigu 7, Dekretu Lei númeru 15/2009, ho data loron 18, fulan-Marsu, ho objetivu atu destaka atividade hosi sidadaun Timoroan sira ka estranjeiru sira, organizasaun governamentál no naun governamentál sira, iha promosaun ba Direitus Umanus iha Timor-Leste.

Prémiu ne’e konstitui hosi kategoria rua:

  1. Direitu Sivil no Polítiku, hato’o ba indivíduu ka organizasaun sira-ne’ebé atua iha   kualidade nu’udar defensór ba direitus umanus, tuir definisaun Deklarasaun kona-ba Direitu no Responsabilidade indivíduu sira-nian, Grupu ka Orgauan sira Sosiedade nian hodi Promove no Proteje Direitus Umanus no Liberdade Fundamentál sira.
  2. Direitu Sosiál, Ekonómiku no Kulturál, hato’o ba indivíduu ka organizasaun sira ho projetu sira iha área Direitu Sosiál, Ekonómiku no Kulturál nian, nomeadamente iha Kombate Kiak, Edukasaun, Protesaun Meiu Ambiente no Solidariedade Sosiál.

Hahú kedas iha loron 10, fulan-Dezembru tinan 2008 to’o loron 10 fulan-Dezembru tinan 2013 hala’o tiha ona edisaun neen (6) ba prémiu ne’e. Iha edisaun sira-ne’ebé refere, iha tiha ona selesaun ba kandidatu na’in 26 (Ruanulu resin Neen) ba prémiu ne’e, entre sira-ne’e mak indivíduu no organizaun naun governamentál sira, iha área sira-ne’ebé refere iha leten.

Iha nia Edisaun Dahuluk iha tinan 2008, iha kategoria ba Direitu Sosiál, Ekonómiku no Kulturál, Señor Padre Locateli no Señor João Pequinho mak hetan prémiu ne’e.

Iha Edisaun Daruak iha tinan 2009, iha kategoria Direitu Sosiál, Ekonómiku no Kulturál, Madre Guilhermina Marçal hosi ‘’Irman Kanosiana”, PRADET, Orfanatu Beata Laura Vicuna-Laga hosi “Irman Saleziana”, Irman Maria de Lurdes hosi “ISMAIK”, no Maria de Fátima Wadhoomall Gomes, Pastora Prezidente ba Igreja Evangélica Assembleia de Deus mak hetan prémiu ne’e.

Iha Kategoria Direitu Sivil no Polítiku, Komité 12 Novembru mak hetan prémiu ne’e.

Edisaun Datoluk iha tinan 2010, tanba laiha aprezentasaun nomeasaun ba kandidatu sira iha área Direitu Sivil no Polítiku, iha de’it prémiu hato’o ba kandidatu sira iha kategoria Direitu Sosiál, Ekonómiku no Kulturál ba Sra Barbosa de Assis hosi “Projetu Casa Vida”, Hian-Health, Hope Family Community, Eskola Primária no Jardim Infánsia Maria Auxiliadora, Orfanatu Santa Bakita no Sra. Soraya Vieira Nepomuceno hosi “Eskola Pre-Primária Arca Infantil”.

Edisaun Dahaat iha tinan 2011, iha kategoria Direitu Sosiál, Ekonómiku no Kulturál, Reverendu Daniel Marçal no nia Projetu “ONG Esperança”, Sr. Fidélio Freitas de Araújo no nia Projetu “Kura Moras no Kura Tohar”, Orfanatu São Domingos Sávio iha Venilale, no nia Projetu ”Bee Urjente”, Orfanatu São Francisco de Assis iha Viqueque ho nia Projetu “Transporte Labarik sira-nian ba Eskola” no Kongregasaun Escrava do Sagrado Coração Jesus ho nia Projetu “Uma Rafaela Maria” mak hetan prémiu ne’e.

 Iha kategoria Direitu Sivil no Polítiku, CEPAD—Sentru Estudu ba Pás no Dezenvolvimentu ho nia Projetu “Kriasaun Nasaun ida-ne’ebé Armoniozu liután” mak hetan prémiu ne’e.

 Edisaun Dalimak iha tinan 2012, iha kategoria Direitu Sosiál, Ekonómiu no Kulturál,  

Fundação Fraternidade Franciscana da Divina Providência no nia Projetu “Uma ba Enklave”, Klinika Bairro Pité ho nia Projetu “Sentru Tuberkulozu Bairro Pité” mak hetan prémiu ne’e.

Iha Kategoria Direitu Sivil no Polítiku, ONG Belun ho nia Projetu “AtRs” mak hetan prémiu ne’e.

Edisaun ba Daneen iha 2013, iha Kategoria Direitu Sosiál, Ekonómiku no Kulturál,   HALIBUR Difisiente Matan Timor-Leste (HDMTL) no nia Projetu “Labarik no Feto Difisiensia Matan sira-nia Direitu” mak hetan prémiu ne’e.

Iha kategoria Direitu Sivil no Polítiku, José António Belo hosi ”Tempo Semanal” no Sr. Rosito da Silva Belo ho nia Projetu “Diálogu Komunitáriu Kona-ba Rai” mak hetan prémiu ne’e.

Prémiu ne’e hato’o anualmente hosi Sua Exelénsia Prezidente Repúblika iha serimónia públika no solene.

Prémiu Direitus Umanus “Sérgio Vieira de Mello” ne’e anualmente iha nia Regulamentu ne’ebé aprova hosi Dekretu Prezidensiál.

Kandidatu sira ba prémiu ne’e hetan selesaun hosi Konsellu Agrasiamentu no Orden Onorífika, ne’ebé nomeadu hosi Sua Exelénsia Prezidente Repúblika.

 

Elabora hosi: Mariman de Oliveira