PREZIDÉNSIA REPÚBLIKA ORGANIZA DISKUSAUN HO TEMA

“ HADI’A KUALIDADE SERBISU PÚBLIKU”

Prezidénsia Repúblika liuhosi Departamentu Peskiza no Análize, iha loron 14 fulan Maiu tinan ne’e, iha Palasiu Prezidensiál Nicolau Lobato Dili, organiza diskusaun meza kabuar ba daruak ho tema “HADI’A KUALIDADE SERBISU PÚBLIKU”.

Oradores sira iha Konferénsia loron ida nian ne’e mak Prezidente Funsaun Públika, reprezentante UNDP, Provedór Direitus Umanus i Justisa, Ministériu Tranportes no Telekomunikasoins, Minésteriu Saúde no reprezentante Akdémiku.

Diskusaun refere loke hosi Xefe Kaza Sivíl Prezidénsia Repúblika nian, Dr. Fidelis Leite Magalahães.

Iha ninia mensajen ba partispantes no oradore sira, Xefe Kaza Sivíl hateten : “Diskusaun ida ne’e hanesan ba daruak ne’ebé Prezidénsia Repúblika mak patrosina atu tau hamutuk partes relevante governu nian, parseirus dezenvolvimentu, ONG’s, Akademikus, ho nia objetivu atu buka solusaun ba dezafius hirak ne’ebé ita-nia nasaun enfrenta, liuliu iha fornesimentus serbisu públikus ba ita-nia sidadaun”.

Xefe Kaza Sivíl realsa katak Prezidente Repúblika konsidera funsionáriu públiku sira hanesan kosta kotuk (tulang punggung) nasaun nian, katak funsionalízmu públiku ne’ebé forte sei sai nu’udar kondisaun ba susesu dezenvolvimentu país nian.

Ttuir Xefe Kaza Sivíl, Prezidente Republika sempre husu ba funsionáriu públiku sira atu serbisu maka’as hodi kontribui ba dezenvolvimentu país nian.

Xefe Kaza Sivil esplika liután katak, iha tinan hirak ne’e nia laran, governu halo ona esforsu lubun hodi kapasita funsionáriu sira tuir ida-idak nia área hodi hasa’e koñesimentu no mós fó bolsu estudu hodi hasa’e abilitasoins literaria, ne’ebé nia objetivu no finalidade atu bele fasilita no fó oportunidade ba funsionáriu sira hodi hadi’a sira-nia prestasaun serbisu públiku ida ne’ebé mak di’ak liu no fornese serbisu ne’ebé iha kualidade ba sidadaun sira.

Kona-ba diskusaun Meza Kabuar ne’e, Xefe Kaza Sivil informa katak ninia rezultadu sei aprezenta ba Xefe Estadu, no tuirmai Xefe Estadu sei lori ba halo diskusaun ho titulares sira governu nian hodi solusiona no mós esplika ba komunidade sira iha baze wainhira Xefe Estadu hala’o vizita atu komunidade bele apár ho dezafius hirak ne’ebé eziste.

Durante diskusaun, problema no obstáklu jeral ne’ebé ordadores no partisipante sira foti sai tópiku mak hanesan, nomeiasaun funsionáriu la tuir nia abilidade, saláriu la sufisiente, intervensaun polítiku iha administrasaun públiku, konflitu de interese, kontrolu Komissaun Funsaun Públiku nian la efetivu, no problema real sira seluk.