Same, 15 Novembru, 2015 – Xefe Estadu, Taur Matan Ruak, hala’o diálogu komunitáriu ho komunidade iha suku Foholau, postu administrativu Turiscai, munisípiu Manufahi iha domingu.

Iha diálogu ne’ebé maka hala’o ne’e, S.E. Prezidente Repúblika hetan akompañamentu husi autoridade lokál no mós ho bainaka espesiál na’in-rua, Administradór postu administrativu Uatu-Carbau, munisípiu Vikeke ho Xefe-Suku Samalari husi postu administrativu Baguia, munisípiu Baucau.

Iha diálogu ne’e, komunidade hamutuk ho autoridade lokál sira hato’o sira-nia preokupasaun hirak, hanesan, falta asesu eletrisidade ba komunidade balun, no mós kondisaun estrada ne’ebé maka ladún di’ak. Maibé, komunidade sira mós hato’o ba S.E. Prezidente Repúblika atu kria kondisaun atu nune’e komunidade área rurais hanesan sira-nia suku Foholau, postu administrativu Turiscai munisípiu Manufahi, bele asesu lalais rede komunikasaun, selae prejudika sira atu kontaktu família hirak iha suku seluk.

Wainhira hatán ba komunidade sira-nia preokupasaun hirak, Xefe Estadu, klarifika katak, oras ne’e daudaun iha kompañia telekomunikasaun nian 3 maka investe iha Timor-Leste, hanesan, Timor Telecom (Portugál maka iha maioria kapitál), Telkomcel (Indonézia nian) no Telemor (kompañia Vietnam nian). Klaru kompañia hirak-ne’e bele investe liután, maibé sira mós presiza rendimentu. Mas, Estadu kontinua kontaktu no koordena nafatin ho kompañia ne’ebé maka refere ne’e. Depois, kompañia tolu ne’ebé refere ne’e halo dezenvolvimentu iha setór privadu.

Hatán ba perguntas komunidade nian sobre eletrisidade no estrada ne’ebé ladauk di’ak, Xefe Estadu husu mós ba komunidade iha suku ida-ne’e atu iha pasiénsia. Tanba, Governu Timor-Leste halo esforsu tebes, mas buat barak maka iha prosesu laran ona.