Manufahi-Letefoho, 11 Novembru 2015 – S.E. Prezidente Repúblika, Taur Matan Ruak, hala’o diálogu ho komunidade sira iha suku Letefoho, postu administrativu Same Vila, munisípiu Manufahi, iha kuarta-feira dadeer ne’e.

Diálogu ne’ebé refere hahú iha prezensa Primeira Dama, Isabel da Costa Ferreira, komitiva no bainaka espesiál husi Xefe Estadu nian ne’ebé kompostu husi Administradór postu administrativu Uato Carbau no Xefe-Suku Samalari husi postu administrativu Baguia, munisípiu Baucau hamutuk ho autoridade lokál.

Iha nia aprezentasaun sobre monografia suku nian ba Xefe Estadu, Xefe-Suku Letefoho, Sr. Agapito da Silva hatete katak, suku Letefoho kompostu husi aldeia 8. Suku ne’ebé refere mós iha preokupasaun sobre kondisaun estrada, eletrisidade, bee moos, problema rai, no mós dadus veteranus ne’ebé maka ladauk loos. Oras ne’e iha aldeia rua maka ladauk hetan asesu ba eletrisidade.

Hatán sobre preokupasaun ne`e Prezidente Repúblika hatán hodi dehan:
“Husu imi atu pasiénsia hodi hein, tanba Estadu no governu esforsu an maka’as loos atu rezolve imi-nia problema sira-ne’e, maski agora seidauk maibé loron ida sei to`o mai, ne’e duni husu imi-nia pasiénsia.”
Wainhira hatán sobre problemas veterenus no antigus kombatentes ne`ebé agora seidauk simu osan, Xefe Estadu hatete, problema veteranus ne`e hamosu problema importante rua, ida mak simu osan no ida seidauk simu osan.
Hafoin klarifika liután katak, hirak-ne`ebé maka simu ona osan ne`e tanba ninia dadus loos ona. Maibé, hirak-ne`ebé maka seidauk simu, ne`e ninia rejistu seidauk loos. No, governu agora só bele halo kompensasaun ba sira-ne`ebé maka rejistu iha 2003. Ba sira-ne`ebé maka rejistu iha 2009 governu seidauk bele halo pagamentu. Nune’e, husu veteranus sira atu labele laran-taridu ka susar, tanba husi parte komisaun sei servisu hamutuk ho Ministériu Solidariedade Sosiál atu haree ba asuntu ida-ne`e.
Hatán kona-ba komunidade sira iha suku Letefoho ne`ebé hadau malu rai, Xefe Estadu hatete:
“Husu imi atu tuur hamutuk ho imi-nia xefe-suku, xefe-aldeia hodi bele rezolve imi-nia problema ne’e, atu nune’e imi bele iha pás no unidade iha imi-nia aldeia no imi-nia suku.”