Manufahi-Manelebos, 13 Novembru 2015 – S.E. Prezidente Repúblika, Taur Matan Ruak, akompañadu husi komitiva no bainaka espesiál rua ne’ebé hanesan, Administradór postu administrativu Uato Carbau no Xefe-Suku Samalari husi postu administrativu Baguia, munisípiu Baucau, hamutuk ho autoridade lokál, hala’o diálogu ho komunidade sira iha suku Manelebos
iha sesta-feira dadeer ne’e, iha postu administrativu Maubisse, munisípiu Ainaro.

Intervensaun Xefe-Suku Letefoho, Sr. Agapito da silva, hato’o relatóriu badak sobre monografia Suku Manelebos, ne’ebé maka sai parte husi postu administrativu Maubisse, munisípiu Ainaro. Suku ne’ebé refere iha baliza ho postu administrativu Maubisse no postu administrativu Turiskai, ho total populasaun 1.315 pessoas, ne’ebé kompostu husi labarik-mane no feto to’o ferik no katuas sira.
Iha diálogu refere komunidade sira husu ba Xefe Estadu atu hadi’ak infraestrutura iha sira-nia suku, no husu mós ba Xefe Estadu atu haree didi’ak ba pensaun vitalísia ne’ebé maka sai preokupasaun boot ba povu tomak iha nasaun ne`e. Hafoin sujere mós ba Xefe Estadu atu informa ba Governu no Parlamentu Nasionál atu halo lalais alterasaun ba Lei Pensaun Vitalísia no, se bele karik, atu aloka fali orsamentu ne’ebé utiliza durante ne’e ba ekonomia bázika, liuliu iha suku no aldeia.
Iha nia intervensaun, Xefe Estadu hatete katak, oras ne’e daudaun, Parlamentu Nasionál mós prepara hela ajenda atu halo diskusaun maibé se la sala iha tinan oinmai. Tanba, Parlamentu ladauk iha ajenda fiksu atu halo diskusaun sobre lei pensaun vitalísia.
Prezidente Repúblika mós husu ba intelektuál sira, liuliu ONG sira atu labele halo kritika de’it. Mas, sei di’ak liu, halo krítika depois fó mós solusaun.