Manufahi, 08 Novembru 2015 — S.E Prezidente Repúblika, Taur Matan Ruak, ne’ebé maka Primeira Dama, Isabel da Costa Ferreira, akompaña hamutuk ho komitiva, partisipa iha serimónia haloot restus mortais Martires Libertasaun Pátria iha suku Abat Oan, postu administrativu Bariki, munisípiu Manatutu, iha domingu dadeer ne’e.

Intervensaun Xefe Estadu nian
Iha nia intervensaun, Xefe Estadu hato’o nia agradesimentu ba Komisaun Organizadora, família sira no autoridade sira. Xefe Estadu la espera atu hasoru komunidade barak ho restus mortais. Tanba, komisaun organizadora halo ona esforsu atu halibur komunidade sira hodi halibur restu mortais saudozu sira-nian hanesan iha fatifatin iha Timor-Leste tomak.

Prezidente Repúblika, Taur Matan Ruak, hafoin dehan katak, hodi nasaun Timor-Leste tomak nia naran hakarak agradese no fó parabéns ba komunidade sira-nia esforsu no sakrifísiu atraves sira-nia kontribuisaun hodi halibur ita-nia saudozu sira.

Prezidente Repúblika hafoin refere istória katak Forsa Armadas Falintil maka hahú halibur mate ruin iha Timor-Leste iha 2003, iha fulan 6 nia laran Forsa halibur atus neen ka hitu iha Waimori. Tanba, momentu ne’ebá Governu la iha kapasidade, nune’e animál sei estraga iha tempu kuandu la halo, rai monu (ka) lakon, la hetan sira-ne’ebé ema la hatene, no difisil atu hetan restus mortais hotu. Maibé, Forsa lori tinan 5 para rai restus mortais iha fatin hanesan Metinaru. Hodi tinan lima atu hasai ema moris husi uma-laran hodi tau fali restus mortais, Governu no Estadu dehan osan la iha, mas ikusmai halo semitériu Metinaru iha kuartu governu para halibur ita-nia saudozu.

Xefe Estadu afirma liután, maski FALINTIL labele hili, Estadu maka hili. Maibé, buat ne’ebé FALINTIL halo maka presta cerimónia de honra ba saudozu sira hotu. Tanba, Estadu la halo buat ne’e, entaun iha Timor-Leste laran tomak ladauk haloot hotu. Nune’e, movimentu família sira-nian maka fó presaun maka’as ba Governu atu oinsá haree trata restu mortais hirak.

Prezidente Repúblika (PR) Taur Matan Ruak, konsidera katak, eis Primeiru Ministru (PM), Kay Rala Xanana Gusmão, ho Primeiru Ministru atuál, Rui Maria de Araújo, haluha ona mate-ruin sira-ne’ebé namkari iha Timór laran tomak. Tanba, kada tinan sira la tau osan hodi haloot hotu mate-ruin sira-ne’e.

Xefe Estadu Taur Matan Ruak dehan, Governu halo ona esforsu hodi kria saudozu sira-nia fatin iha Metinaru, maibé to’o agora barak maka seidauk haloot. Tanba ne’e, Governu haluha saudozu sira ne’ebé maka mate ba nasaun ida-ne’e. Maibé, Prezidente Repúblika fiar mós katak governu sei la haluha.

Nia mós hatutan hodi dehan:
“Ida-ne’e obrigasaun Governu nian, i Prezidente sei alerta ba Governu para labele taka matan ba sira-ne’ebé mate, atu ohin loron ita sai hanesan ne’e. Osan ba hili mate-ruin ita dehan la iha, maibé ita taka loke estrada ne’e iha. Ha’u la fiar katak, Sr. Primeiru Ministru Rui Araújo nia taka nia matan ba ita-nia saudozu sira, no maun Xanana sei taka matan ba matebian sira iha Timór laran tomak,” dehan Prezidente Repúblika iha serimónia haloot mate-ruin, iha suku Abat Oan, postu administrativu Bariki, munisípiu Manatutu, domingu (8/11).

Dala ida tan, Prezidente Repúblika lori nasaun tomak nia naran, fó parabéns no agradese ba esforsu husi Komisaun Organizadora no família sira tomak ne’ebé konsege halibur mate-ruin sira-ne’e hodi tau hamutuk iha fatin ida. Iha Timór laran tomak, Estadu seidauk konsege halibur mate-ruin hotu hodi tau hamutuk iha fatin ida.

Xefe Estadu mós fó korajen ba komisaun organizadora atu konta ho Prezidente Repúblika ninia apoiu. Prezidénsia Repúblika la iha orsamentu ba buat sira-ne’e, maibé halo esforsu para ajuda inisiativa família sira-nian kona-ba rekolla restus mortais sira-ne’e iha fatin-fatin.

“Ida-ne’e hanesan ita kasu todan ida, tanba sira fó ona sira-nia kontribuisaun ba nasaun ida-ne’e. Ita sei la para hili mate-ruin iha rai-laran, tanba ema rihun atus rua resin maka mate tanba de’it atu defende rai ida-ne’e, tanba lori sira mak ohin ita moris, no lori sira maka nasaun moris.”

Iha fatin hanesan, prezidente Komisaun Organizadora, José Ramos hatete, tuir dadus ne’ebé maka komisaun iha ou família sira fó lista mai ne’e iha 3.006 restu mortais.

“Provizoriamente atu dehan, daudauk ne’e ita rekolla ona restu mortais hamutuk 252, restus mortais ne’e rekolla de’it iha Natarbora, Laclubar no Soibada.”

Klarifika liután mós katak, restu mortais ne’ebé refere (252) ne’e komisaun rekolla durante loron 15 nian laran, lato’o fulan.

Sr. Ramos hamosu kestaun ida hodi husu:
“Agora objetivu ita-nian maka ko’alia kona-ba dezenvolvimentu rain ne’e ninian. Maibé, kuandu sira na’in hirak ne’ebé mate ba rain ne’e ita la rekolla, ita seidauk foti, ita bele ko’alia dezenvolvimentu duni ka lae? Keta sira mate hela ne’e maka babeur ita, tanba ne’e maka hahú uluk sira-ne’ebé mate iha rai-laran atu ita limpeza tiha rai ne’e halo mamuk, moos ona maka ita foin ko’alia buat ida dezenvolvimentu.”

Komisaun Organizadora iha biban ne’e informa mós ba Prezidente Repúblika katak, tanba, haree fali ba prosesu rekolla ne’ebé hala’o iha munisípiu 13, entaun komunidade iha suku Muapuku oferese rai hamutuk ektare 15 atu halo Jardim dos Heróis. Mas, oras ne’e, ektare 3 halo ona Jardim dos Heróis ne’ebé tau ona restus mortais 47 iha Natarbora de’it.

Hanesan Prezidente Komisaun Organizadora, Señór Ramos sente iha orgullu tanba lideransa nasaun ida nian bele vizita, ida-ne’e signifika onra boot ida ba komisaun ida-ne’e.