Dili, 14 Agostu 2015– S.E. Prezidente Repúblika, Taur Matan Ruak, sesta-feira ne’e iha Palásiu Prezidensiál Nicolau Lobato, simu vizita kortezia Sekretáriu Estadu Vatikanu, Sua Eminénsia Kardeál Pietro Parolin, akompañadu hosi Prezidente Episkopál Timorense Dom Basilio do Nascimento, Vise Ministru Negósiu Estranjeirus, Sr. Roberto Soares, Embaixadór Vatikanu nian mai Timor-Leste, Arsebispu Joseph Marino no delegasoins.

Iha Sorumutu besik oras ida, ne’ebé nakonu ho ambiente amigavel ne’e, Xefe Estadu hatudu nia sentimentu kontente no agradese ba asinatura Konkordata ne’ebé finalmente halo ona iha Dili, ne’ebé tuir lolos Konkordata refere baibain asina iha Santa Sé.

Liutan, Xefe Estadu hateten ba Sekretáriu Estadu Vatikanu katak, Igreja Katolika nia papel boot iha luta ba independénsia no sei kontinua boot nafatin li-liu iha area promove justisa sosial. “Vizita sira hanesan ne’e renova ita nia esperansa hanesan ema fiar nain”, dehan Xefe Estadu.

Xefe Estadu realsa, Estadu Timor-Leste no Igreja la’ós de’it hanesan parseiru maibe mós hanesan aliadu ida.

Enkuantu Sua Eminênsia Kardeal Pietro Parolin, sente kontente tebes ba resesaun ne’ebé Timor-Leste halo ba nia vizita no aprezenta saudasoins husi Sua Santidade, Amu Papa Francisco nian ba Xefe Estadu no ba povu Timor-Leste tomak.

Sekretariu Estadu Vatikanu mós observa katak povu timoroan ema relijiozu teb-tebes no impotansia papel Igreja Katolika Timor nian nian ba hametin no haburas fiar evangellu iha nasaun ida ne’e.

Iha enkontru kortezia ne’e mós Sua Eminênsia Kardeal rekoñese katak nu’udar nasaun foun Timor-Leste sei iha dezafiu oi-oin hanesan; harii pás liu husi rekonsiliasaun no diálogu, i nune’e mós dezafius iha dezenvolvimentu ekonomikamente no mós espiritualmente. Ida-ne’e mak espiritu Konkordata ne’ebé foin dadaun asina ne’e.

Vizita Sekretáriu Estadu Vatikanu nian mai Timor-Leste hanesan Enviadu Espesial hosi Papa Francisco nian atu selebra missa agradesimentu tinan 500 Evanjelizasaun iha Timor ne’ebé hala’o iha Sabadu 15 Agostu 2015 iha Tasi Tolu.