Primeira vizita Prezidente Taur Matan Ruak iha Oecussi No Rejiaun Seluk-seluk

Oecussi, Pante Makasar, 22 Janeiru 2013, Prezidente Repúblika Taur Matan Ruakhala’o vizita traballu no diálogu komunitaria dahuluk ba tinan 2013 iha distritu enklave Oecussi durante loron haat nia laran ne’ebé hahu husi loron 22 to’o 25 fulan Janeiru 2013.

Iha vizita ne’e, Dra. Isabel Ferreira mós akompana nia kaben S.E. Prezidente Republika Demokratika Timor-Leste nian, Taur Matan Ruak, iha viajen ne’ebé maka hala’o ho transporte rai nian nee.

Viajen naruk Xefe Estadu nian husi Dili ba Oecussi, liu mos hosi prosesu imigrasaun Governu Indonezia nian hirak-ne’ebé riguroza, iha area fronteira, Batugade no Atambua.

komandante Forsa Nasionál Indonézia nian ba Provinsia NTT (Dandrem), inklui autoridades Distritu Belu nian fasilita tebes vizita nee hodi halo akompañamentu no fó seguransa maximu husi Forsa no Polisia Indonezia ba Xefe Estadu ho nia delegasaun to’o iha fronteira Sakato Oecusse nian.

Wainhira Xefe Estadu ho nia delegasaun sira to’o iha Sakato simu diretamente hosi Administrador Distritu Oecussi ho lian na’in rai ne’e nian, liu husi serimonia kultural.

Prezidente ho delegasaun kontinua ba kapital Oecussi, Pante Makasar, hodi hala’o kedas diálogu ho komunidade Nítibe no Pante Makassar iha salaun Administrasaun Distritu Oecussi.

Iha dialogu entre delegasaun Prezidente Repúblika nian ne’ebé maka kompostu husi Vice Ministru Estranjeiru, Vice Ministru Transportes no Telekomunikasaun, Vice Ministru Sosial, Sekretariu Estadu Seguransa, Sekretraiu Estadu Dezenvolvimentu Lokal, Komisáriu PNTL, inklui assesor relevante sira balun ne’ebé maka sai hanesan parte delegasaun, ko’alia no rona mós keixas no preokupasaun hirak ne’ebé maka komunidade iha sub-distritu Nítibe no Pante Makassar hato’o sobre problema disputa rai iha parte Naktukan nian,estatutu Oecusse, problema bee moos, kualidade projetu estrada la di’ak, viza karun, folin tiket ro ka barku Nakroma ne’ebé karun,kria terminal pasajeiru sira nian iha Dili no asuntu sira seluk.

Hatan ba preokupasaun hirak-nee, Prezidente Repúblika dehan ba komunidade sira katak, preokupasaun no keixas kona-ba difikuldades no lakunas moris hirak ne’ebé maka sira infrente sei rezolve.

Wainhira hatan kona-ba problema disputa Rai Naktuka, Xefe Estadu dehan katak Nia mós preokupa maibé fiar katak problema ne’ebé maka refere nee sei rezolve. Xefe Estadu mós hatete katak, preokupasaun kona-ba rai rohan Naktuka sei labele estraga relasaun bilateral entre Timor-Leste ho viziñu boot Repúblika Indonezia ne’ebé maka metin ona .

Refleta fali ba Prezidente da Repúblika nia prioridade estratejika hirak ba Nia mandatu no tuir liña knar Prezidente Repúblika hanesan simbulu funsionamentu ba regular instituisaun demokrátika nian, sei rona hamutuk ho reprezentante autoridade kompotente sira ne’ebé maka akompaña nian hanesan iha nia vizita ba Oecussi nee, hafoin hamutuk ho Nia Teknika sira Prezidente Repúblika sei halo kordenasaun didiak ho Xefe V Governu Konstitusional Timor-Leste nian, Primeiru Ministru, Xanana Gusmão, no mós nia no mós ho Nia Ministru Enkargu sira iha Seitor Dezenvolvimentu Nasional atu bele halo revizaun no haree didiak atividade dezenvolvimentu hirak-ne’ebé maka implementa daudauk ona bazeia ba Planu Dezenvolvimentu Nasional no Planu Estrátejika Nasional atu nunee bele responde loloos liútan ba nesesidade nasional Timor-Leste ninian, liliu ba nesesidade populasaun ka sidadaun nian ne’ebé maka sai hanesan alvu ba Dezenvolvimentu Nasional Timor-Leste nian iha area ka seitór dezenvolvimentu idaidak.

Prezidente Repúblika hala’o vizita ba distritu ho objetivu lima nu’udár tuirmai:

  • Ko’alia no rona ho povu no lideres komunitaria sira kona-ba sa’ida maka Timor-Leste atingi onadurante ne’e liliu iha tinan sanulu nia laran.
  • Ko’aliano rona kona-ba desafiu ka difikuldade hirak ne’ebé Timor-Leste sei infrenta no oin’sa atuultrapasa desafiu hirak ne’ e.
  • Fahe informasaun sobre Prioridade Politika Prezidente no Governo
  • Hare kondisaun real iha Distritus no Rona preokupasaun komunidade (povu nia lian)
  • Reforsa liu tan papel autoridade lokal no povu nia involvementu iha dezemvolvementu

Haree fali ba objetivu lima ne’ebé maka refere ona iha leten, durante vizita no dialogu komunitariu rejiaun hirak ne’ebé maka Prezidente Repúblika hala’o, populasaun sira iha distritu no mós reprezentante autoridade lokal sira aprezenta keixas kona-ba preokupasaun hirak ne’ebé maka okupa sira nia hanoin iha sira nia moris loro-loron. Keixas sobre preokupasaun no kestaun hirak-ne’ebé maka refere maioria iha relevansia ho seitór dezenvolvimentu hirak-ne’ebé maka sai hanesan area dezenvolvimentu prinsipal hirak ba V Governu Konstitusional iha lideransa Primeiru Ministru, Kay Rala Xanana Gusmão, nian. Nunee, pontu no kestaun hirak-ne’ebé populasaun no lideransa lokal sira hato’o durante vizita Xefe Estadu nian maka hanesan preokupasaun hirak-ne’ebé maka iha relevansia no bele agrupa tuir seitór dezenvolvimentu hirak hanesan: preokupasaun hirak kona-ba Seitór Edukasaun, Seitór Infra-strutura, Seitór Saúde, Seitór Seguransa, Seitór Ekonomia, Seitór Governasaun, Seitór Transporte no Komunikasaun.

Nunee, atu klarifika liútan ba pontu hirak-ne’ebé maka refere iha leten, tuir mai maka pontu, deklarasaun, kestaun hirak-ne’ebé maka aprezenta ka hato’o ona ba S.E. Prezidente Repúblika, Taur Matan Ruak, durante Nia vizita hamutuk ho membru komitiva sira ba rejiaun hirak iha Timor-Leste nia laran iha tinan 2012 no 2013.

Seitór Edukasaun

Iha sektor ida ne’e kestaun hirak ne’ebéaprezenta no mós rekomendasaun ka sugestaunsira husi vizita rejiaun hirak maka hanesan:

üKestaun kona-ba Kondisaun Fiziku Eskola Ne’ebéAat: Komunidade levanta kona ba parede aula eskola komesa aat, plafone dodok,uma kakuluk aat, janela no odan matan ladiak, moru eskola laíha, karteira mejaba estudante no ba profesores laíha, no sentina laíha kondisaun.

üRekomendasaun hirak-ne’ebé hato’o: Komunidade no partisipantes rekomenda ba governu atu identifika lalais iskola hirak-ne’ebé aat no halo rehabilitasaun. Prepara planu no/ka programa rehabilitasaun ne’ebé inklui aspeitu hotu no tau kedan mekanizmu manuteinsaun ida atu manutein iskola ne’ebé aat.

üKestaun hirak kona-ba Profesores: Komunidade aprezenta keixas sobre númeru profesores ne’ebé uit’oan liu kompara ba númeru estudante,kaju profesores voluntaiu sedauk rezolve too agora, formasaun ba profesores siralasufisiente liuliu kona ba profesores atu hanorin siensia eksata, uma baprofesores sira laíha, problema salariu profesores kiik, nune’ e mos profesores sira nian kareiraprofesional.

üRekomendasan hirak kona-ba Profesores: estabelese persentajen profesor no estudante, halo lalais rekrutamentu ba profesores foun, resolve profesores voluntariu sirano profesores sira bele halo rotativu hodi tuir treinamentu intensivu kada tinan.Governu presija prepara sentru treinamentuprofesores iha Dili no iha kada rejiaun atu beIe prepara treinamentu regular baprofesores sira no mós oferese kondisaun no/ka salariu ne’ebé maka diak ba professor/a sira ne’ebé maka iha duni profesionalizmu.

üKestaun hirak kona-ba Kualiade edukasaun:Kualidae edukasuan sei sai hanesan fatór ida ne’ebé komunidade aprezenta ihavizita distritu hirak. Komunidade lamenta ho diferensa entre kualidade eskola publikuho eskola privadu. Nune’e mos eskola sekundariu balun kualidade ladiak ba estudante sira no hamosu difikuldade hirak ba estudante sira wainhira sira to’o iha nível eskolar ne’ebé aas liu.

üRekomendasan hirak kona-ba kualidade edukasaun: komunidade husu atu halo sinkronizasaun ba material hanorin nian no suporta mós aproxímasaun/metodu hanorin ne’ebé diak atu bele hadiak no responde ba izijensia atu hadiak kualidade iskola.

üKestaun hirak kona-ba Bolsu Estudu: Komunidade laíha informasaun ne’ebé loos sobre bolsu estudu ne’ebé maka Ministériu Edukasaun oferese atravez Fundus Dezenvolvimentu Kapital Humanu no bolsu estudu husi Ministériu Solidariedade Sosial liúhusi fundus ba Bolso da Mae no Bolsu ba Martires sira niaoan. Tamba, komunidade balun lamenta katak, distribuisaun bolsu estudu la justu basira nia distritu ka grupu.

üRekomendasaun kona-ba Bolsu Estudu: Prezidente rekomenda atu Ministeriu hirak-ne’ebé maka kompetente atu produz brosurainformasaun hirak-ne’ebé nesesariu no relevante ba bolsu estudu atu distribuiba komunidade sira liliu sira ne’ebé hela iha area rural.

Iha nia vizita ba distritu Maliana, S.E. Prezidente Repúblika fo korajen ba inan aman sira atu haruka sira nia oan ba iskola, husu mós ba profesores sira atu hala’o knar hanorin ho didiak no husu estudante sira atu estuda maka’as hanesan iha nia deklarasaun tuirmai nee, ““Ba estudante sira hau husu atu imi estuda, estuda, estuda, too dukur, no mate iha livru leten”. Nia mós apela ba governu atu halo investimentu makaas iha edukasaun tamba “Nasaun ne’ebé la investe iha edukasaun, nasaun ne’e laíha futuru”.

Seitór Infra-strutura

Pontu importante hirak-ne’ebé aprezenta durante dialogu komunitariu ho S.E. Prezidente Repúblika ho nia komitiva maka:

üKestaun hirak kona-ba Rehabilitasaun no Manuteinsaun estrada:preokupasaun no keixa ne’ebé aprezenta ona durante vizita Prezidente Repúblika nia vizita maka katak, estrada barak mak komesa aat no kuak, dalanninin monu, moru atu satan tasi aat, no kondisaun infra-strutura seluk hirak tan. Membru komunidade no lideransa lokal sira mós dehan liútan katak, estrada barak mak aat tamba tuan ona, liliu estrada sira ne’ebé Indonesiahusik hela iha tinan naruk nia laran sedauk halo manutensaun ka rehabilitasaunruma tan ne’e dalan komesa monu no alkataraun sira komesa aat. Nunee mós kanu be mos ne’ebé maka prepara dezde tempu Indonezia barak maka aat ona.

üRekomendasaun hirak kona-ba estrada: Iha dialog komunitariu entre Prezidente Repúblika ho Nia komunitiva rekomenda ona mós, atubele aseleralalais ona planuno implementasaun ba rehabilitasaun estrada ne’ebé iha ona.Halo mós apelu atu wainhira halo selesaun ba kompañia ne’ebé atu rehabilitaestrada sira presija halo avaliasaun didiak ba kompañia hodi hare karik iha dunikapasidade tekniku no material atu halo rehabilitasaun. Tamba, realidade hatudu katak, kompañia barak ne’ebé halo ona rehabilitasaun lahatudu kualidade ne’ebé diak. Populasaun mós husu atu hala’o rehabilitasaun no manuteinsaun estrada tenki hala’o kontinuamente tina-tinan. Membru komunidade mós hato’o sira nia preokupasaun kona-ba eletrisidade, maibe, Prezidente Repúblika no komitiva deskobre buat diak ida katak, eletrisidade mós lakan duni iha fatin sira hala’o sorumutuk ho komunidade. Aprezenta mós preokupasaun sobre kualidade obras ne’ebé maka ladiak, nu’udár izemplu, postu UPF Alto iha Lebos, kanu bee mos iha Iliomar, no sira husu tebes ba V Governu Konstitusional atu hala’o kontrolu ka monitorizasaun didiak duni atu nunee obras bele tuir loloos dezeñu, survei no kompañia ne’ebé implementa bele mós implementa obras tuir nesesidade ne’ebé iha.

üKestaun hirak kona-ba Projetus Infraestrutura no Aksesu ba Infraestrutura baziku: Ko’alia kona-ba projetu infrastrutura hirak, komunidade husu ba V Governu atu implementa lalais projetu ho eskala boot, hanesan, portus ne’ebé atu halo iha Dili, Cairabela, Tibar, Com, Laga, Lore, no mós Aeroportu hanesan iha Baucau. Maski aprezenta ona keixas/preokupasaun hirak iha leten, komunidade barak durante visita distritais kontinua halerik nafatin kona-ba laíha asesuba estrada, be mos, no eletrisidade.

üRekomendasaun ba asuntu rua nee: Komunidade husu para V Governu loke ka fahe liútan informasaun kona-ba programa no planu ba implementasaun obras hirak nu’udár refere iha leten, no mós atu informa públiku kona-ba estatus preparasaun to’o iha ne’ebé ona liúhusi media (radio no televizaun), brosuras, reniaun rutinas.

Setór Saúde

Nu’udár refere ona iha inisiu hirak artigu nee nian sobre kestaun, preokupasaun no keixas iha setór dezenvolvimentu, setór saúde mos infrenta kestaun hirak-ne’ebé aprezenta ona. Nunee

ü  Kestaun hirak kona-ba Setór Saúde maka: Kondisaun fiziku hospital, klinika ladiak, serbisu fatin lato’o ba ofisial saúde, fasilidade latoo (kondisaun mediku lato’o, stock aimoruk lato’o ba tipu moras ne’ebe maka iha), doutor mediku falta, ambulansia lato’o no karu funerariu lato’o no sempre laíha kombustivel/mina). Komunidade sempre levanta kona ba falta be mos no saneamentu ne’ebé ladiak, no nutrisaun ne’ebé maka ladiak tamba de’it falta koñesementu iha parte komunidade nian.

ü  Rekomendasaun hirak kona-ba Setór Saúde maka: distribusaun informasaun, V Governu Konstitusional presiza inklui no aumenta liútan orsamentu atu responde ba lakunas iha ne’ebé existi iha setór saúde hanesan iha setór seluk mós, halais liútan prosesu rekrutamentu dotores, infermeira noparteira ba suco nian, aumenta formasaun vokasional profesional iha area saúde nian, utiliza sistema jestaun informasaun saúde nian ne’ebé maka iha atu fornese liútan informasaun foun (up to date) para grupu interesadu hirak sobre kondisaun hirak iha setór saúde nian.

Sektor Seguransa

Membru komunidade sira mós sempre aprezenta sira nia preokupasaun durantevizita distrital hirak kona-ba setór seguransa, nu’udár izemplu,

üKestaun hirak kona-ba setór seguransa maka: membru PNTl no F-FDTL la too atu tau matan didiak ba fronteiratereste no Maritima, no mós fasilidade no/kaekipamentu ba PNTL no F-FDTL atu hala’o sira nia obrigasaun mós sai hanesan preokupasaun iha ba membru sosiedade sira, ikus mai, membru komunidade mós husu atensaun husi Nai Ulun iha autoridade kompotente sira atu tau matan mós ba disiplina husi membru ajensia seguransa balun ne’ebé maka halo torturasaun ba sidadaun sivil wainhira iha problema, hemu tua iha dalan, ameasa komunidade, estraga sasan komunidade nian no uza ekipamentu militar la tuir regra ne’ebé iha. Komunidade husu mós atu koloka lalais membru PNTL iha kada suco atu bele atua lalais kuandu krizi mosu, liliu iha foho/area remotas. Husu mós ba autoridade relevante hirak atu bele kontrola didiak sira nia membru, liliu sira ne’ebé Komunidade ne’ebé hela besik iha fronteira terestre preokupa ho seguransafronteira tamba ema no sasan illegal ne’ebé hakat liu fronteira, kaju hadau malu raiiha fronteira entre kamunidade Timor-leste no komunidade Indonesia. Nune’emos komunidade ne’ebé hela besik fronteira maritime hanesan Suai, Betano,Viqueque, no lore iha lospalos, preokupa ho peska illegal. Depois, prezensa CPD-RDTL no grupos arte marsiais ne’ebé sempre provoka no baku malu mós sai hanesan preokupasaun ba komunidade nian iha rai laran.

üRekomendasaun hirak kona-ba Setór Seguransa ne’ebé hato’o durante dialog komunitariu maka: membru komunidade husu atu Prezidente Repúblika atu kordena ho V Governu Konstitusional atu halo revizaun ba kondisaun seguransa nian, liliu númeru pesoal ne’ebe falta atu bele responde ba kualker kondisaun krizi, komunidade no reprezentante populasaun iha area remotas, liliu iha area fronteira husu atu Estadu no Governu Timor-Leste finaliza lalais negosiasaun sobre demarkasaun fronteira, husu atu harii mós sentru operasaun maritima atu proteje fronteira maritima no proteje riku soin iha tasi laran husi atividade ilegal hirak. Husu mós atu membru PNTL ne’ebé maka tau ona iha Suco atu serbisu hamutuk ho xefe suco atu hala’o/implementa programa seguransa preventiva, rekomenda mós ba autoridade relevante hirak atu bele kontrola didiak sira nia membru (seguransa) atu atua/hatudu lala’ok diak, liliu wainhira sira iha oras serbisu laran. S.E. Prezidente Repúblika husu atu kria kontaktu ativu entre Governu nasional ho rejionais atu hakbesik liútan prezensa estadu no mós governu nia prezensa iha baze, atu nunee, wainhira sira iha karik duvidas ne’ebé maka presiza duni Estadu ka V Governu Konstitusional atu fó resposta, liliu atravez autoridade kompetente loloos tuir area dezenvolvimentu hirak ne’ebé maka sai sira preokupasaun.

Setór Ekonomia

Setór ekonomia maka setór ne’ebé iha ligasaun direitu ba komunidade nia moris atu muda sira nia vida hodi involve an iha atividade ekonomia tuir kualker oportunidade ne’ebé maka mosu/iha ba sira. Maibé, membru komunidade sira mós hato’o tebes sira nia preokupasaun/kestaun hirak hanesan pontu hirak tuimai:

ü  Kestaun hirak kona-ba Setór Ekonomia:Kondisaun Merkadu: ladiak tamba konstrui la tuir povu nia preferensia no ikus mai sai merkadu abandonadu, merkadu balun laíha fasilidade saneamentu hanesan sintina, bee mos, no merkadu balun konstrui falin iha fatin hirak-ne’ebé laíha asesu ba konsumidores, nunee sasan hirak-ne’ebé fa’an lafolin. Asesu ba Merkadu: membru komunidade balun preokupa tebes ho kondisaun estrada ne’ebé ladiak no falta transporte, no distansia mós dook tebes. Merkadu fronteira; Komunidade iha fronteira iha Maliana, Suai, no Oecusse propoin atu estadu bele kontinua loke markadu fronteira atu bele fasilita negosiu entre populasaun ne’ebé hela besik fronteira entre nasaun rua ne’e. Komunidade Ataúro no Lore mós husu atu kria mós negosiu ida nunee no se bele karik mós evita prosesu birokrasia atu bele benefisiu komunidade hirak-ne’ebé maka refere ba nee. Esportasaun no Importasaun; Preokupasaun kona ba produtu Timor-Leste nian ne’ebé esportasaun kiik liu kompara ho sasan ne’ebé importa tama husi rai liur sai kestaun ne’ebé komunidade levanta durante vizita distritais. Membru komunidade mós husu atu Ministériu Ekonomia no Ministériu Agrikultura hanesan autoridade kompetensia hirak atu bele hadiak no kordena liútan sira nia serbisu atu fo korajen ba komunidade atu hadiak liútan kualidade produtu agrikultura hirak-ne’ebé maka iha valor ekonomia atu bele esporta ba rai tasi balun sira duke importasaun maka maka’as liu. Negosiu kiik: Komunidade sira husu no halo pedidu ba Prezidente no komitiva atu halo kordenasaun ho ajensia V Governu ne’ebé kompetente atu kria mekanizmu atu husu kredit ba agrikultor no mós negosiante ki’ik sira.

üRekomendasaun hirak kona-ba Setór Ekonomia nian hirak maka: Membru komunidade sira husu no rekomenda ba governu hamutuk ho povu maka halo estudu diak liu nian atu bele kria fatin publiku (merkadu) diak liútan no kompletu ho fasilidade hirak-ne’ebé presiza. Husu mós atu V Governu atravez Ministériu Infrastrutura no Obras Publikas atu aselera lalais rehabilitasaun ba estrada hirak, lideransa no membru komunidade sira iha fronteira mós husu atu Governu bele loke fali merkadu fronteira atu fasilita komunidade iha fronteira no taka oportunidade ba “pasar gelap”. Husu mós atu iha kordenasaun entre ministériu ne’ebé maka iha kompetensia ba asuntu negosiu no seguransa iha fronteira. Rekomenda mós ba Governu atu hamosu kordenasaun entre ministeriu atu serbisu hamutuk ho komunidade baze atu oin’sa bele hasai kualidade produsaun, fahe informasaun hirak-ne’ebé maka relevante atu promove produtu lokal ba merkadu internasional, liliu hanesan kafe, ai-kameli no mós produtu seluk hirak-ne’ebé iha valor iha merkadu internasional. V Governu Konstitusional mós presiza atu dezenvolve liútan mekanizmu kreditu ba agrikultor no mós negosiante ki’ik sira. Rekomenda mós ba V Governu Konstitusional atu labele hala’o atividade investementu ne’ebé maka konsentradu liu iha Dili laran.

Relasiona ba setór ekonomia, S.E. Prezidente Repúblika iha inkontru ho lider komunitariu no lider distritais sira iha Nia vizita ba distritu Covalima, Ainaro no Aileu, hetan akompañamentu ne’ebé diak tebes iha Nia komitiva laran, tamba kompostu husi membru V Governu Konstitusional na’in 7 iha nível Ministru nian no mós husi Korpu Diplomatiko, Ajensia Dezenvolvimentu Internasional hirak no mós setór privadu, Xefe Estadu husu ba partes atu servisu makaas, disiplina no rigor atu nune’e Timor bele konkista tan poder ekonomia atu hatuur Timor hanesan ho nasaun seluk hodi dehan katak, “hau nia mehi mak ida deit, oinsa Timor bele diak liu fali Singapura” tamba Timor iha kondisaun hotu, iha rekursu naturais nebe diak liu Singapura. Agora oinsa mak ita dezenvolve kondisaun hirak ne’e.

Setór Governasaun

Dala barak wainhira ko’alia kona-ba asuntu Governasaun mosu ipotese ida katak, wainhira mosu mudansa iha Governu Sentral, governu lokal ida rejiaun hirak mos iha mudansa tuir restruturasaun ho nia komplikasaun oioin. Haree fali ba vizita husi S.E. Prezidente Repúblika ho nia komitiva, kestaun oioin ne’ebe maka iha relevansia ba asuntu governasaun ne’ebé sai preokupasaun ba sidasaun sira nian iha baze hanesan hirak tuirmai mós aprezenta durante sorumutuk ho Xefe Estadu Timor-Leste nian ho Nia komitiva sira. Preokupasaun hirak nee maka hanesan tuirmai:

ü  Kestaun hirak kona-ba Setór Governasaun maka: Funsionalizmu Públiku; atendementu públiku la ho profesionalismu, funsiunariu balun lahatene sira nia funsaun ka serbisu, balun latama serbisu no ba fali joga. Lei funsaun públiku la admiti no komplika liu kualker sansaun ba hasoru membru funsiunariu públiku. Desentralizasaun; asuntu desentralizasaun ne’ebé maka la’o seidauk diak halo buat hotu la’o ladiak iha baze, partikularmente kona-ba sentralizasaun sistema finansas halo prosesu pagamentu atu hadiak ka manutein buat ki’ik ruma sai komplikadu hotu. Loke Suco Foun ka Sub-distritu foun; Membru komunidade sira husu para estadu no governu atu konsidera atu harii suco foun no mós muda fali suco balun ba sub-distritu seluk tamba distansia ne’ebé maka dook tebes.

ü  Rekomendasaun hirak kona-ba Setór Governasaun maka: Komunidade hamutuk ho S.E. Prezidente Repúblika husu atu halo avaliasaun regular dezempeñu, no fo valor ba prestasaun servisu hirak ne’ebé maka diak. S.E. Prezidente Repúblika mós propoin atu halo alterasaun ba lei funsaun publika atu nune’e knar disiplinar bele fo ba supervizor direita sira. S.E. Prezidente Repúblika rekomenda atu halais prosesu desentralizasaun atu desentraliza poder autoridade lokal, finansas no administrasaun. Wainhira ko’alia kona-ba asuntu loke suco ka sub-distritu foun, rekomenda atu kria diskusaun ka dialogu hamutuk ho komunidade sobre asuntu ne’ebé refere, atu nunee bele hetan apoio maioria. Nia mós deklara katak, “esperensia hatudu iha funu laran katak wanhira ita hamutuk mak ita bele konsege hetan buat ne’ebé ita hakarak”. Ho ida ne’e Prezidente husu ema hotu nia kontribuisaun atu formasaun Governu lao ho diak no eksekusaun programa dezemvolvementu bele lao ho susesu. Prezidente Repúblika mós dehan katak komunikasaun, organizasaun no koordenasaun entre institusaun iha distritu no iha sentral. Nune’e mos koordenasaun ho povu rasik maka xave atu harmoniza esforsu tomak atu nune’e ema hotu bele servisu hamutuk ba dezemvolvementu no resultadu nebe diak.

Setór Transportasaun no komunikasaun

Preokupasaun no/ka kestaun boot hirak-ne’ebé komunidade sira aprezenta maka’as tebes maka hanesan:

üKestaun hirak kona-ba Setór Transportasaun no komunikasaun: komunidade aprezenta sira nia preokupasaun kona-ba transporte tereste no transporte maritima ne’ebé ladiak no karu; asuntu hirak hanesan falta informasaun tamba radio komunidade ne’ebé la funsiona diak tamba falta kondisaun bara-barak atu funsiona normal mós sai preokupasaun seluk ne’ebé maka aprezenta, hanesan mós, preokupasaun sobre rede liña komunikasaun telemovel ne’ebé Timor Telecom fornese la funsiona iha sira nia area.

üRekomendasaun hirak kona-ba Setór Transportasaun no komunikasaun: Komunidade propoin opsaun sira hanesan governu prepara transportasaun publika atu fo apoio ba sirkulasuan. Opsaun seluk governu halo subsidiu ba kombustivel ba transportasaun rural husi suco ba sub-distritu nune’e mos husi sub-distritu sira ne’ebé aksesu defisil mai distritu. Governu presija hadiak portu ne’ebé iha no aumenta frekuensia transportasaun no numeru ro ne’ebé halo viagen ba fatin hirak ne’e. Komunidade rekomenda atu kompaña operadores sirabele aumenta redi kobertura no hatun mos folin komunikasaun. Husu mos ba governu atu autorija kompaña telekomunikasaun seluk tan mai iha Timor. Husu mós ba Governu atu kapasita didiak radio komunidade sira atu nune’e bele kontinua funsiona ho diak.

Setór Agrikultura

Membru komunidade sira sempre levanta asuntu hirak-ne’ebé maka iha ligasaun ba setór ne’ebé refere. Izemplu husi sira nia preokupasaun hirak maka tuirmai.

ü  Kestaun hirak kona-ba Setór Agrikultura maka: Irigasaun aat no laíha sistema manuteinsaun, produsaun agrikultura ne’ebé la-folin no halo ema barak hado’ok an husi vida agrikultura no joven barak maka laiha sentidu atu halo ida nee. Komunidade mos deskonfia katak tratores sira ne’ebé fahe fo deit ba membru ka simpatizantes partidu balun, komunidade preokupa mós ba ofisiais teknika ne’ebé sei menus atu fó asistensia teknika, komunidade ladun iha koñesementu sobre seguransa alimentar, liliu iha konservasaun no prezervasaun produtu, husu mós ba V Governu Konstitusional atu haforsa liútan koperasaun bilateral no multilateral.

ü  Rekomendasaun hirak kona-ba Setór Agrikultura: Rekomenda atu hala’o lalais rehabilitasaun ba sistêma irigasaun hirak-ne’ebé aat ona, no mós involve komunidade iha manuteinsaun rutina. Husu atu governu, liliu ministériu kompotente atu hadiak lalais istrada ligasaun jona rurais atu bele fasilita transporte produtu agrikultura ba merkadu. Ministériu Agrikultura presiza atu fahe informasaun didiak kona-ba prosesu ka mekanizmu fahe trotor ba komunidade atu ema bele komprende prosesu didiak. Husu atu governu liúhusi Ministeriu Agrikultura atu atu governu tau ka kontratu ema tekniku ne’ebé diak iha kada distritu atu halo manutensaun ne’ebé diak ba tratores. Husu mós ba governu atu harii/konstrui armajen jeral iha jona agrikultura ho mós tekniku ba jestaun produsaun hafoin periodu produsaun. Ikus mai, komunidade husu atu governu manutein nafatin relasaun diak ho nasaun viziñu Indonezia no mós Australia atu bele fasilita liutan iha setór agrikultura nian.

Setór Sosial

Haree fali ba pasadu ka iha periodu IV Governu anterior, setór sosial, maka setór ne’ebé ezekuta orsamentu didiak tebes atu responde ba asuntu social dezde 2007 to’o 2012, iha momentu ne’ebé maka Timor-Leste foin hakat liu periodu metan ida iha istoria Timor-Leste ne’ebé foin hetan Ukun Rasik An iha ne’ebé krizi 2006 seidauk hotu loloos hatutan fali tan ho ataka husi grupu armas deskoñesidu hasoru Prezidente Repúblika, Dr. José Ramos Horta, no Primeiru Ministru, Kay Rala Xanana Gusmão ne’ebé falta uit’oan kuaze hamate Nai Ulun na’in rua ne’ebé maka refere iha leten. Nunee, setór sosial ne’ebé existi iha momentu ne’eba serbisu maka’as tebes atu halibur hamutuk fali membru komunidade ne’ebé maka namkari iha rai laran tamba krizi ne’ebé maka refere iha momentu ne’ebá. Refleta fali ba istoria metan hirak nee, no haree ba Timor-Leste hanesan nasaun foun ida ne’ebé koko atu estabelese no hadiak nia sistema prestasaun serbisu iha setór oioin sei hasoru preokupasaun barak kona-ba oin’sa maka atu serbi didiak liutan nia sidadaun. Tamba nee, la’os surpreza boot ida wainhira S.E. Prezidente Repúblika no nia komitiva hetan keixas no/ka kestaun barak-barak iha dialogu ho komunidade no lideransa lokal durante sira nia vizita. Kestaun no preokupasaun hirak ne’ebé hato’o durante sira nia vizita no dialog maka hanesan tuirmai:

ü  Kestaun hirak kona-ba Setór Sosial maka: Dadus sala no pagamentu subsidiu ba ferik katuas sira: prosesu pagamentu liuhusi banku obriga ferik katuas sira tenki la’o dook husi sira nia fatin no dalaruma dadus ka informasaun hirak ne’ebé maka sala komplika liutan prosesu pagamentu. Asistensia dezastre naturais to’o tarde; kondisaun kareta funerariu ladun diak no obriga komunidade sira hulan de’it mate isin, hanesan, iha Oecussi; Apoiu Relijiozu tenki fahe hanesan la’os ba de’it igreja katolika; Veteranu no Lei Veteranu nia, membru veteranu sira halo keixa katak dadus veteran kontinua laloos, durasaun sala, hatun tinan kontribusaun ba luta, kesar mós katak, komisaun homenajen kria sistema familiarizmu, lei veteranu la valorija veteranu sira ne’ebé maka kontribui ba luta ho duransaun tempu ki’ik, so membru familia ida de’it maka bele hetan pensaun ne’ebé mosu ba familia husi herois sira, harii fali monumentu iha fatin masakre sira para atu valoriza vitima luta sira, halibur fali mate restu hirak iha ailaran atu bele mai hakoi didiak iha jardin ba funu na’in sira. Izemplu konkretu seluk hirak-ne’ebé akontese maka katak, iha dialog komunitaria Fohorem Chefe Suco Lactos Sr. Antonio, rekomenda atu hadiak lalais lei veteranus nebe la rekonhese ema nebe ho durasaun 0 a 3 no 4 a 7 anos; iha Dialog komunitariu iha Suai Loro Sr. Manuel Pereira husi Letos mos rekomenda atu hadiak lei veteranus tamba ema Terceira idade wainhira simu subsidiu veteranus nia lakon direitu subsidiu idosos.

üRekomendasaun hirak kona-ba Setór Sosial maka: Komunidade husu atu pagamentu ba idozus atu hala’o deit líúhusi chefe suco atu bele fasilita liútan idozus sira; rekomenda atu Ministeriu Solidariedade Sosial bele responde lalais be vitima desastre ne’ebé balun besik tinan ida ona; minist Ministeriu Solidariedade Sosial atu aumenta kareta funerariu ba kada distritu; Estadu tenke fo atensaun ne’ebé hanesan be relijian hotu ne’ebé legalmente eksiste iha Timor-Leste; husu atu aselera lalais estabelementu komisaun veteranus distritais atu nune’e bele halo verifikasaun lolos ba dadus; S.E. Prezidente Repúblika sujere mós atu komisaun ne’e tenke mai husi grupo ne’ebé representativu no servisu independente atu nune’e laíha influensia ruma; Xefe Estaduhusu atu altera lei veteranus, halo konsultu profundu molok halo alterasaun, no sosialija lei ne’e ba ema hotu wainhira aprova ona; komunidade rekomenda atu governu bele tau orsamentu ruma hodi hare ba monumentu masakres sira, protesaun fatin historiku funu nian, ka rekolha restus mortais nian; S.E. Prezidente rekomenda atu veteranus sira bele uja osan subsidiu ne’e halo didiak ba buat tolu: investe ba ekonomia uma laran (familia nian), investe iha saude uma laran, no edukasaun labarik nian. Nia mós husu atu hamosu konseptu ida atu labele iha dependensia ba fundu petroliu ba pensaun no subsidiu ba veteran.

Rekomendasaun importante seluk mós maka hanesan Xefe Estadu nia rekomendasaun atu promulga lei kona-ba vitima da guera atu nunee bele fasilita rekonpensasaun ba sira ne’ebé maka mate ona iha funu husi tinan 1975-1999. Rekomendasaun nee mosu hafoin Prezidente Repúblika rona, Sr. Sebastião A. Pereira, hanesan membru komunidade Suco Fohorem nia kestaun sobre asuntu nee. Asuntu seluk ne’ebé maka importante ne’ebé foti mós maka hanesan ida ne’ebé Sr. Francisco X. Barreto hato’o kona-ba númeru rejistu veteranu ne’ebé maka’as no nia lamenta tan katak, ema barak maka falsifika ona dadus no husu atu estadu (hamutuk ho Governu atu verifika didiak).

Setór Justísa

Setór Justísa mos parte ida ne’ebé maka membru komunidade aprezenta kestaun no preokupasaun hirak-ne’ebé maka iha ligasaun ba setór dezenvolvimentu seluk durante vizita S.E. Prezidente Repúblika nian hamutuk ho nia komitiva. kestaun no preokupasaun hirak-ne’ebé hato’o maka nu’udár refere iha kra’ik:

üKestaun hirak kona-ba Setór Justísa nian maka: Lejislasaun; kestaun hirak ne’ebé aprezenta maka kona-ba lei balun ne’ebé nia implementasaun ladun lao ho diak, nu’udár izemplu: lei funsaun publiku, lei rai nian, lei pensaun vitalisia, lei investementu, lei aprovisionamentu ne’ebé fo vantajen ba investor balun. Tribunal; komunidade halo kestaun ba kazu hirak balun ne’ebé tribunal labolu ba prosesu julgamentu no mós prosesu tribunal/justísa ne’ebé la’o kleur. Kazu balun ne’ebé rezolve ona ho meus familiar hafoin tribunal tama atu julga tuir prosedementu tuir lei nian. Prosesu Investigasaun Polisia Ne’ebé Ladiak; komunidade mós lamenta kona-ba prosesu investigasaun polisia nian ne’ebé ladun hala’o didiak. Disputa Rai; komunidade mós aprezenta kazu disputa rai nian ne’ebé ko’alia liliu kona-ba dokumentu komprovativu iha ne’ebé durante okupasaun Indonezia nian, Autoridade Governu balun iha momentu ne’ebé foti komunidade balun nia rai ho lala’ok obrigatoriu ba projetu balun, hanesan, programa transmigrasaun. Komunidade iha fronteira mós aprezenta kazu disputa rai balun ne’ebé maka iha impaktu maka’as ba negosiasaun iha liña fronteira.

üRekomendasaun hirak kona-ba Setór Justísa nian maka: Prezidente husu atu halo alterasaun lalais ba lei vitalisia, lei veteranus, no lei teras propriadade. Nia mós husu atu halo konsultu rigoroza ida atu haree didiak molok halo alterasaun ba lei hirak hanesan lei funsaun publiku, lei ivestementu, lei aprovisionamentu, no lei atribuisaun. Husu no rekomenda mós atu halo julgamentu ba kazu hirak-ne’ebé maka hato’o ona ba tribunal, hala’o programa kapasitasaun ba juiz no ofisial judisiariu sira no mós aumenta liútan númeru atu bele halo atendementu ne’ebé diak ba nesesidade judisial ne’ebé adekuada. Hadiak liútan kordenasaun entre instituisaun haforsa lei nian iha kampo, polisia, ho instituisaun judisiariu nian hirak, hanesan, Ministériu Públiku, no mós ofrese liútan formasaun profesional sobre hala’o investigasaun loloos. Hafoin, presiza hadiak liútan prosesu protesaun ba sasin, prosesu halibur no proteje evidensia atu bele fasilita tebes duni prosesu julgamentu. S.E. Prezidente Repúblika husu mós atu lansa lalais implementasaun lei teras propriadade hodi nune’e bele garantia nain ba rai ba komunidade sira. Kona ba kaju fronteira presija aselera lalais prosesu demarkasaun no hametin seguransa iha fronteira.

Refleta fali ba kestaun no preokupasaun hirak-ne’ebé maka hato’o ona ba S.E. Prezidente Repúblika ho Nia komitiva no mós ba reprezentante autoridade kompotente husi V Governu Konstitusional tuir setór dezenvolvimentu relevante hirak. Membru komunidade no lideransa komunidade sira mós iha razaun atu aprezenta preokupasaun hirak, maibé presiza atu labele hanoin de’it atu hato’o keixa no dezafiu hirak, tamba durante nia vizita ba rejiaun ka distritu hirak iha tinan 2012 no 2013, S.E. Prezidente Repúblika rasik mos fo hanoin fali atu sidadaun hotu-hotu atu kontribui ba prosesu atu nunee Timor-Leste bele hakat liu dezafiu hirak-ne’ebé maka Timor Oan hotu no Rai Doben Timor-Leste hasoru oras nee. Prezidente Repúblika mós relembra tan atu Timor Oan hotu atu hanoin mós susesu ne’ebé maka Timor-Leste hetan ona iha tinan 10 ikus nia laran hanesan izemplu:

–       Timor Oan nia esforsu maka’as atu hetan ukun rasik an hafoin period kolonializmu durante tinan 450,

–       Luta kontra okupasaun militar Indonezia nian iha tina 24 nian laran,

–       Restaurasaun Independensia iha 20 Maiu tinan 2002,

–       Hametin prosesu demokrasia, liliu hametin paz no estabilidade no mós prosesu harii estadu.

Prezidente Repúblika hatutan tan katak, maski Timor-Leste hakat liu hela prosesu no dezafiu oioin hahu husi I Governu Konstitusional to’o IV Governu Konstitusional, maibé, Timor-Leste konsege foti inisiativa no asaun hirak atu hatan ba preokupasaun boot iha rai laran tomak, nu’udár izemplu, susesu iha projetu eletrisidade ne’ebé lakan duni ona iha fatin barak iha Timor-Leste laran tomak. Xefé Estadu mós subliña pontu importante tebes ne’ebé maka iha ligasaun maka’as ba setór dezenvolvimentu hotu hodi hamosu perguntas hirak hodi dehan, “Ita nia dezafiu maka oin’sa atu halakon ki’ak no mukit iha ita nia rai, oin’sa produz riku no distribui riku”. Apelu seluk ne’ebé maka Prezidente Repúblika ka Xefe Estadu hato’o maka, husu atu Timor Oan hotu atu iha unidade iha prosesu dezenvolvimentu, no mós husu atu tau interese nasional iha interese privadu ka individual nia leten. Nia hatutan tan hodi dehan katak, “buat ne’ebé atu fahe ita ki’ik liu kompara ba buat ne’ebé maka halibur ita”. Razaun tuir nai ulun Estadu Timor-Leste nian nee maka katak, “Buat ne’ebé halibur ita maka ita nia Nasaun ho ita nia futuru”.

Ikus mai hafoin lee dezafiu, preokupasaun, kestaun no rekomendasaun hirak-ne’ebé maka hato’o ona iha parte uluk relatóriu nee ninian haktuir fali ba S.E. Prezidente Repúblika nia lian menon sira maka katak, maski Timor Oan iha Timor-Leste sei hasoru dezafius no/ka preokupasaun oioin, Timor Oan hamutuk investe ona esforsu lubuk atu hetan ukun rasik an, realiza dezenvolvimentu pozitiviu balun, hanesan, hametin demokrasia, paz no estabilidade no mós harii instituisaun ne’ebé maka lao ba oin daudaun. Buat importante ne’ebé Timor Oan tomak hamutuk labele haluha maka katak, atu labele haluha atu invest iha setór edukasaun no keta haluha atu iha mehi katak, Timor-Leste mós bele dezenvolvidu hanesan rai seluk ka bele liútan fali rai dezenvolvidu hirak-nee. Klaru katak, Timor-Leste maka rai no nasaun ne’ebé foin maka ukun an ba tinan 11 dezde 20 Maiu 2002, no riku ho rekursu naturais, maibé perguntas maka nu’udár Prezidente Repúblika hato’o ona, “oin’sa maka Timor-Leste bele produz riku soin no fahe riku soin”.

Kestaun seluk fali mós ba hotu-hotu atu hanoin hodi refleta fali ba Xefe Estadu Nia deklarasaun nu’udár refere antis maka, oin’sa maka ita, Timor Oan hamutuk bele serbisu maka’as hamutuk hodi muda riku soin ne’ebé Rai Doben nee fo ona ba ita tomak ho lala’ok serbisu hamutuk ita nia esforsu maka’as ne’ebé organizadu no mós integra hodi kordena no komunika ba malu ba interese no hakarak ita hotu nian, atu hetan Timor-Leste ida ne’ebé justu, forti, riku no seguru ba ita tomak.