Dili, 20 Jullu 2015 – S.E. Prezidente Repúblika, Taur Matan Ruak, husu no fó korajen ba sidadaun sira atu labele subar informasaun. Maibé, husu atu oinsá fó informasaun ne’ebé loos sobre vida moris kada uma-kain ba ekipa SENSU Nasionál Populasaun no Uma-Kain Timor-Leste. Tanba, informasaun ne’ebé fornese ne’e maka sei sai hanesan sasukat ba atu Estadu ou Governu uza ba halo planu dezenvolvimentu iha rai-laran.

Hafoin fó tiha informasaun ba ekipa SENSUS,Xefe Estadu deklara iha nia rezidénsia privadu iha Metiaut, Dili, iha sábadu semana kotuk katak:

“Prezidente enkoraja sidadaun sira para fó informasaun loloos, labele fó sala. Tanba, se sidadaun sira fó sala informasaun, Estadu la sala se wainhira fahe rekursu la hanesan. Sidadaun sira labele fó sala Estadu, tanba Estadu fahe bazeia ba informasaun ne’ebé maka sidadaun sira fó.”

Xefe Estadu hatete ho rezultadu hosi SENSUS refere Estadu bele halo dezenvolvimentu ida justu ka iha ekilíbriu ba Timór-oan hotu bele iha sidade ka iha foho.

Xefe Estadu fó ezemplu kona-ba dadus veteranus ne’ebé to’o ohin loron sei iha konfuzaun boot. Tanba, veteranu sira la fó dadus loloos ba Komisaun omenajen, nune’e mós wainhira sidadaun sira la fó informasaun loloos ba SENSUS, susar atu governu hetan dadus ida loloos no kredivel kona-ba nivel moris komunidade sira nian para atu bele planu ba dezenvolvimentu.