Dili, 11 Juñu 2015 – S.E. Prezidente Repúblika, Taur Matan Ruak, hatuur fatuk uluk nian ba konstrusaun monumentu ba trajédia Marabia iha ne’ebé akontese loron 10 fulan-Juñu 1980, liuhosi komemorasaun ba dala 35, kuarta-feira ne’e iha foho Marabia, eis-Estasaun TVRI, Dili.

 Antes hatuur fatuk ba konstrusaun monumentu ne’ebé refere, Xefe Estadu hato’o iha nia lia-menon katak, nia asosia tebes ba serimónia lansamentu ‘primeira pedra’ ne’ebé refere tanba atu hanoin hikas filafali eroi sira-ne’ebé fó ona sira-nia an ba mate iha trajédia tinan 35 liubá.

 Iha nia mensajen ba família eroi sira ne’ebé maka partisipa iha eventu ne’ebé hala’o ne’e Xefe Estadu dehan:

“Iha ne’e, ita haree fotografia eroi sira-ne’ebé mate iha akontesimentu Marabia ne’ebé família sira lori. Kuandu sira mate, sira-nia liafuan ikus hatete: imi-nia mate, ami-nia liberdade.”
Xefe Estadu hatutan saudozu sira-nia mate husik hela Timor-Leste hanesan nasaun independente no soberanu ida, ne’ebé jerasaun ba jerasaun sei la haluha sira-nia sakrifísiu, tanba sira maka asuwa’in Timór nian.

 Orsamentu atu fó apoiu ba konstrusaun monumentu memoriál ne’e mai husi Ministériu Solidariedade Sosiál ho montante $90.000.

Akontesimentu Marabia ne’ebé akontese iha loron 10 fulan-Juñu tinan 1980, iha nia impaktu ne’ebé boot tebes. Tanba, akontesimentu Marabia ne’e hamate Forsa Indonézia na’in-1, no forsa Indonézia halo reasaun hodi oho Timoroan na’in-46 no na’in-81 maka lakon to’o ohin loron. Hafoin, ema lubuk mós sofre tortura no desterra ba iha Ataúru no Cailaco.

 Akontesimentu Marabia hanesan primeiru levantamentu husi FALINTIL sira hasoru forsa Indonézia hafoin baze de apoiu rahun. Levantamentu refere halo atu responde ba ajitasaun Indonézia nian iha mundu internasionál ne’ebé hatete katak funu iha Timór hotu ona hafoin Prezidente Nicolau Lobato mate iha funu laran, no atu hatete ba mundu katak ajitasaun Indonézia nian ne’e laloos no rezisténsia sei eziste.

 Hola parte mós iha serimónia komemorasaun trajédia Marabia ba dala 35 ne’e maka hanesan na’i-ulun Vise Ministru Solidariedade Sosiál, Xefe Estadu Maiór F-FDTL Koronél Falur Rate Laek, Prezidente Komité 12 Novembru, Sr. Gregorio Saldanha no família masakradus no komunidade Marabia sira. ~~~HOTU ~~~