Ermera, 27 Outubru 2015 – Iha prezensa bainaka espesiál na’in-rua ho autoridade lokál sira, S.E. Prezidente Repúblika, Taur Matan Ruak, hahú loron tersa-feira, 27/10, hodi kontinua hala’o atividade diálogu komunitáriu iha suku Hatugau, hafoin kontinua komunidade suku Ducurai, iha postu administrativu Letefoho, munisípiu Ermera.

Xefe Estadu loke nia diskursu ho komunidade iha suku ne’ebé refere hodi halo kómiku hafoin esklarese katak, nia haksolok tebes atu mai vizita suku Hatugau no suku Ducurai, no haksolok mós ho prezensa xefe-suku sira seluk ne’ebé maka marka prezensa hamutuk ho reprezentante lideransa seluk hanesan Administradór munisípiu no postu Ermera, inklui diretór sira.

Xefe Estadu mós kontinua subliña loloos liután objetivu husi viajen/diálogu iha suku hirak:
Hato’o Prezidente Repúblika no últimu Komandante Falintil nia apresiasaun ba komunidade suku Hatugau no Ducurai sira-nia kontribuisaun hodi halo Timor-Leste sai nasaun independente,
Husu ba komunidade sira atu fó sira-nia asisténsia hodi serbisu ho Governu Timor-Leste nia no lori dezenvolvimentu ba oin,
Apelu ba komunidade atu prontu nafatin atu serbisu hamutuk maka’as liután. Tanba, independénsia hetan ona, mas la’ós ‘moris-di’ak’.
Haree realidade no kompara komunidade, suku Hatugau no Ducurai ba suku seluk hirak atu bele la’o hamutuk ba oin duké balun iha oin mas balun iha liu kotuk hela.

Xefe Estadu hafoin klarifika pontu importante hirak sobre realizasaun hirak-ne’ebé maka Timor-Leste konsege halo durante tinan 13 nian laran nu’udar tuirmai:
Hametin pás no estabilidade Timor-Leste nian ne’ebé sei frajil.
Kriasaun Estadu atu bele serbí povu ho obrigasaun atu serbí povu hodi, simplifika burokrasia, lori besik dezenvolvimentu besik ba ema, envolve partisipasaun povu nian.
Dezenvolvimentu ekonomia atraves projetu boot hirak, hanesan, fornesimentu eletrisidade ne’ebé kobre ona 80% husi populasaun, loke aeroportu iha Rejiaun Autónoma Oekusi no munisípiu Suai, loke auto-estrada ka estrada nasionál iha munisípiu Manatutu, Bobonaro, Covalima no Oekusi.

Xefe Estadu mós refere ba komunidade sira sobre serbisu importante 4 ne’ebé komunidade sira iha suku rua presiza atu hala’o: hadi’ak sira-nia ekonomia; investe ba oan sira-nia eskola; kuidadu sira-nia saúde, no husu Timoroan hotu atu serbisu hamutuk maka’as liután atu realiza dezenvolvimentu atu realiza moris-di’ak.

S.E. Prezidente Repúblika ne’ebé maka akompañdu ho bainaka espesiál na’in-rua, Administradór postu administrativu Dom Aleixo, munisípiu Dili, no Xefe-Suku Soba, postu administrativu Laga, munisípiu Baucau durante semana rua nia laran ne’e la’o hadulas tiha Timor-Leste iha parte osidentál, liuliu iha munisípiu Covalima, Bobonaro no Ermera, para sira bele haree no kompara kondisaun real no entre postu no suku hirak-ne’ebé sira vizita ho sira-nian rasik.

Wainhira tama iha sesaun husu no hatán, komunidade iha suku rua, aprezenta kestaun hirak sobre, ezemplu, provizaun enfermeira ida atu asiste doutór ne’ebé serbisu daudaun, la iha fornesimentu eletrisidade, finalizasaun profesór kontratadu sira, feto sofre mas tanba sá la iha direitu atu hetan pagamentu veteranu, tanba sá veteranu sira tuur manán de’it osan mas la halo buat ida, apelu atu kontinua ho programa PNDS, kondisaun estrada ne’ebé ladi’ak no seluseluk tan.

Ba Sr. Mario de Deus nia kestaun, Xefe Estadu mós dehan katak, la iha ema ida maka onesta liu ona sr. Mario de Deus. Maibé, Prezidente sei foti nota sobre ida-ne’e. Hafoin dehan mós ba Sr. Ilda Maria katak, señora presiza atu tuir prosesu hirak-ne’ebé maka iha atu hetan nia direitu, no rejistu ladauk taka. Hafoin Xefe Estadu repete fali resposta sobre asuntu veteranu iha ne’ebé hato’o “Estadu Timor-Leste halo esforsu hotu atu trata asuntu ne’e. Mas, husu atu veteranu sira organiza an. Tanba, asuntu veteranu ne’e, preokupasaun nasionál ida. Maibé, sustentabilidade maka sai preokupasaun Estadu nian”.

Xefe Estadu subliña tan dala ida ba komunidade sira sobre kestaun estrada, eletrisidade, konstrusaun eskola iha aldeia hodi dehan, “ita so hala’o buat ne’ebé ita bele, la’ós buat hirak ne’ebé ita hakarak. Despeza Estadu Timor-Leste nian mai husi mina Timor Gap, nune’e presiza atu dezenvolve mós setór seluk se karik mina Timor Gap maran”.

Administradór munisípiu hamutuk ho diretór sira munisípiu Ermera nian mós hetan oportunidade ba atu hatán ba kestaun hirak-ne’ebé maka iha ligasaun planu no asaun iha setór dezenvolvimentu ne’ebé maka akontese daudaun oras ne’e iha Timor-Leste, hanesan, kestaun sobre salaun eskola ne’ebé lato’o, asisténsia ho banku no meza no mós disionáriu (husi Prezidente Repúblika), merenda eskolár.

Ikusmai, hafoin remata diálogu, S.E. Prezidente Repúblika diverte hamutuk uitoan ho populasaun lokál iha segunda parte diálogu iha suku Ducurai hafoin jantár no molok hakat ba deskansa, antes atu fila mai Dili iha dia 28 Outubru, 2015, hafoin vizita suku 15 iha parte osidentál Timor-Leste nian.