Ermera, 25 Outubru 2015 – S.E. Prezidente Repúblika, Taur Matan Ruak, iha kontinua hala’o atividade diálogu ho komunidade suku rua, iha suku Obulo, sábadu lokraik, 24/10. No, kontinua fali ho komunidade suku Batu Mano iha Domingu lokraik, 25/10, iha postu administrativu Atsabe, munisípiu Ermera.

S.E. Prezidente Repúblika hahú nia intervensaun ho komunidade iha suku rua, suku Obulo no suku Batu Mano, hodi halo kómiku sobre sira-nia resposta wainhira nia husi sira. Hafoin kontinua fó koñese nia bainaka espesiál na’in-rua ne’ebé akompaña nia durante viajen, inklui informa mós sobre prezensa Administradór munisípiu no postu Ermera ho diretór sira-ne’ebé sei asiste Xefe Estadu atu hatán ba kestaun hirak husi komunidade sira.

Xefe Estadu esplika ba membru komunidade suku rua iha diálogu katak, objetivu atu lori bainaka espesiál na’in-rua iha viajen ne’e para sira bele kompara kondisaun reál no entre postu no suku hirak-ne’ebé sira vizita ho sira-nian rasik. No, mós lori esperiénsia/lisaun di’ak hirak ba implementa iha sira-nia suku no postu administrativu. Hafoin, Xefe Estadu mós klarifika sobre objetivu husi nia vizita ka diálogu iha suku hirak:
Hato’o Prezidente Repúblika no últimu Komandante Falintil nia apresiasaun ba komunidade suku Obulo sira-nia kontribuisaun hodi halo Timor-Leste sai nasaun independente,
Husu ba komunidade sira atu fó sira-nia asisténsia hodi serbisu ho Governu Timor-Leste nia no lori dezenvolvimentu ba oin,
Apelu ba komunidade atu prontu nafatin atu serbisu hamutuk maka’as liután. Tanba, independénsia hetan ona, mas la’ós ‘moris-di’ak’.
Haree realidade no kompara komunidade, suku Obulo no Batu Manu ba suku seluk hirak atu bele la’o hamutuk ba oin duké balun iha oin mas balun iha liu kotuk hela.

Xefe Estadu hafoin klarifika pontu importante hirak sobre realizasaun hirak-ne’ebé maka Timor-Leste konsege halo durante tinan 13 nian laran nu’udar tuirmai:
Hametin pás no estabilidade Timor-Leste nian ne’ebé sei frajil.
Kriasaun Estadu atu bele serbí povu ho obrigasaun atu serbí povu hodi, simplifika burokrasia, lori besik dezenvolvimentu besik ba ema, envolve partisipasaun povu nian.
Dezenvolvimentu ekonomia atraves projetu boot hirak, hanesan, fornesimentu eletrisidade ne’ebé kobre ona 80% husi populasaun, loke aeroportu iha Rejiaun Autónoma Oekusi no munisípiu Suai, loke auto-estrada ka estrada nasionál iha munisípiu Manatutu, Bobonaro, Covalima no Oekusi.

Xefe Estadu mós refere ba komunidade sira sobre serbisu importante 4 ne’ebé komunidade sira iha suku rua presiza atu hala’o: hadi’ak sira-nia ekonomia; investe ba oan sira-nia eskola; kuidadu sira-nia saúde, no husu Timoroan hotu atu serbisu hamutuk maka’as liután atu realiza dezenvolvimentu atu realiza moris-di’ak.

Wainhira tama iha sesaun husu no hatán, komunidade iha suku rua, suku Obulo no Batu Manu, hato’o kestaun hirak-ne’ebé kuaze hanesan ho kestaun hirak-ne’ebé hato’o ona iha suku sira seluk, nu’udar ezemplu: falta bee moos, postu saúde ho kondisaun mínimu/la iha, kondisaun estrada ne’ebé ladi’ak, preokupasaun sobre asuntu veteranu no seluseluk tan.

Ba kestaun sobre asuntu veteranu no menus respeitu ba veteranu sira, Xefe Estadu dehan katak, veteranu nia hahalok maka sei determina oinsá ema respeitu sira ka lae. Estadu Timor-Leste halo esforsu hotu atu trata asuntu ne’e. Mas, ba veteranu sira atu organiza an no hadi’ak sira-nia dadus. Tanba, asuntu veteranu sai hanesan preokupasaun nasionál ida. Mas, hamosu preokupasaun rua entre veteranu sira-ne’ebé simu ona osan ho sira-ne’ebé ladauk simu ona, sustentabilidade ba kondisaun, liuliu iha aspetu finanseiru.

Iha diálogu ho komunidade iha suku Batu Mano hafoin vizita fatin Bee Mutin, S.E. Prezidente Repúblika hatán ba komunidade sira hodi dehan katak, fatin Bee Mutin presiza dezenvolve hanesan fatin turístiku ida, no komunidade lokál sira hamutuk Prezidénsia Repúblika, presiza atu konserva no promove fatin Bee Mutin. Xefe Estadu mós dehan katak, nia apresia tebes inisiativa komunidade lokál hodi loke (hodi ke’e) dalan atu fasilita Xefe Estadu to’o iha Bee Mutin. Mas subliña katak, estrada no eletrisidade maka hanesan fatór importante ba dezenvolvimentu turizmu iha Timor-Leste hafoin de dezenvolvimentu rekursu umanus no infraestrutura.

Molok atu remata nia resposta, Xefe Estadu mós oferese oportunidade ba Administradór munisípiu hamutuk ho diretór sira atu hatán ba kestaun hirak-ne’ebé maka iha ligasaun planu no asaun iha setór dezenvolvimentu ne’ebé maka akontese daudaun oras ne’e iha Timor-Leste, hanesan, kestaun sobre programa saúde SISCA, kestaun sobre prestasaun Serbisu Bee no Saneamentu, molok Administradór munisípiu Bobonaro, Sr. Domingos Martins, halo liután klarifikasaun balun hodi remata sesaun husu no hatán.

Iha parte komunidade nian, hanesan Sr. Domingos Amaral, hanesan Xefe Aldeia iha suku Obulo, deklara hodi populasaun sira-nia naran katak, sira hotu haksolok tebes rona S.E. Prezidente Repúblika nia lia-menon ne’ebé maka sai hanesan ai-moruk ida atu halakon sira-nia dúvidas no laran-taridu hirak-ne’ebé sira iha durante ne’e.

Bazeia ba realidade no istória, la iha Xefe Estadu ida maka halo ona vizita mai suku Obulo no Batu Manu durante períodu kolonizasaun portugés no okupasaun Indonézia nian.