Bobonaro, 23 Outubru, 2015 – S.E. Prezidente Repúblika, Taur Matan Ruak, kontinua ho atividade diálogu ho komunidade suku Sibuni, postu administrativu Bobonaro, munisípiu Bobonaro, iha sesta-feira dadeer-saan, molok kontinua ho diálogu iha suku Aiasa iha parte lokraik.

S.E. Prezidente Repúblika hahú hato’o nia intervensaun ho kómiku mós hanesan iha suku seluk hirak no kontinua fó koñese nia bainaka espesiál na’in-rua ne’ebé akompaña nia durante viajen, inklui informa mós sobre prezensa Administradór Munisípiu no mós diretór sira-ne’ebé sei asiste Xefe Estadu atu hatán ba komunidade sira-nia kestaun hirak. Xefe Estadu kontinua hodi klarifika mós sobre objetivu husi lori bainaka rua ne’ebé refere maka atu sira bele observa no kompara realidade entre postu no suku hirak-ne’ebé sira vizita.

Xefe Estadu hafoin klarifika mós sobre objetivu husi nia vizita ne’ebé atu:

Hato’o Xefe Estadu no últimu Komandante Falintil nia apresiasaun sinsera ba komunidade suku Sibuni nia kontribuisaun atu halo Timor-Leste sai hanesan nasaun independente ida,

Husu komunidade sira atu ajuda no serbisu hamutuk ho Estadu Timor-Leste atu hetan moris-di’ak,

Kompara komunidade (Sibuni) nia suku ba suku sira seluk atu bele ajuda malu hakat ba oin, la’ós balun ba oin balun iha kotuk hela.

Husu atu komunidade prontu nafatin atu serbisu hamutuk maka’as liután. Tanba, independénsia hetan ona, mas la’ós ‘moris-di’ak’. Tanba, independénsia la’ós ultimu objetivu husi luta.

Haree realidade sira-nia moris, rona komunidade sira-nia preokupasaun, inklui truka informasaun.

Xefe Estadu hafoin klarifika pontu importante hirak sobre realizasaun hirak-ne’ebé maka Timor-Leste konsege halo durante tinan 13 nian laran nu’udar tuirmai:

Hametin pás no estabilidade, mezmu Timor-Leste nian sei frajil hela.

Kriasaun Estadu atu serbí povu ho obrigasaun atu serbí povu hodi, simplifika burokrasia, lori besik dezenvolvimentu besik ba ema, envolve partisipasaun povu nian.

Dezenvolvimentu ekonomia através projetu boot hirak, hanesan fornesimentu eletrisidade ne’ebé kobre ona 80% husi populasaun, loke aeroportu iha Rejiaun Autónoma Oekusi no munisípiu Suai, loke auto-estrada ka estrada nasionál iha munisípiu Manatutu, Bobonaro, Covalima no Oekusi.

Xefe Estadu mós refere ba komunidade sira iha diálogu iha suku Sibuni sobre serbisu importante haat ne’ebé sira presiza atu hala’o: hadi’ak sira-nia ekonomia; investe ba oan sira-nia eskola; kuidadu sira-nia saúde, no husu Timoroan hotu atu serbisu hamutuk maka’as liután atu realiza dezenvolvimentu atu hetan moris-di’ak.

Tama ba iha sesaun husu no hatán, komunidade suku Sibuni hato’o kestaun hirak-ne’ebé hato’o ona iha suku hirak ne’ebé vizita uluk ona, hanesan, kestaun sobre rejistu no la respeitu ona veteranu, reabilitasaun kondisaun bee moos ne’ebé iha fali kle’an, fasilidade desportu no sentru ba foin-sa’e sira.

Hatán ba kestaun atu aumenta vensimentu, Xefe Estadu klarifika katak, bele aumenta maibé presiza mós atu tau matan ba asuntu dezenvolvimentu sira selu, tanba Timor-Leste hasoru dezafius oioin. Informa mós ba komunidade sira katak, iha komunidade iha suku sira seluk ne’ebé hasoru kondisaun hirak-ne’ebé difisil liu.

Ba kestaun sobre rejistu veteranu, Xefe Estadu dehan, ba maluk sira-ne’ebé maka ladauk rejistu atu hetan valorizasaun veteranu sei la taka no to’o hotu maka foin taka. Nune’e, husu para atu labele preokupa demais. Sobre estrada, hatán katak, Governu Timor-Leste responde daudaun, maibé sei hatán bazeia ba nesesidade no prioridade.

Ba kestaun sobre veteranu sira, Xefe Estadu dehan katak, Estadu Timor-Leste halo esforsu hotu atu trata asuntu ne’e. Maibé, husu mós ba veteranu sira atu organiza an no hadi’ak sira-nia dadus. Asuntu veteranu sai hanesan preokupasaun nasionál ida, tanba asuntu ne’e hamosu mós preokupasaun rua entre veteranu sira ne’ebé simu ona osan ho sira ne’ebé ladauk simu ona. Hafoin, preokupasaun sobre sustentabilidade ba kondisaun, liuliu iha aspetu finanseiru. Depois, ba kestaun sobre respeitu mihis ba veteranu, Xefe Estadu klarifika katak, ema só respeitu veteranu sira wainhira veteranu organiza an no hatudu hahalok di’ak.

Hafoin Xefe Estadu mós oferese oportunidade ba Administradór Munisípiu hamutuk ho diretór sira atu hatán ba kestaun hirak-ne’ebé maka iha ligasaun planu no asaun iha setór dezenvolvimentu ne’ebé maka akontese daudaun oras ne’e iha Timor-Leste.

Ikusmai informa mós katak, suku Sibuni, fatin istóriku ida tanba uluk suku ne’e hanesan baze akampamentu Falintil hanesan mós Waimori. Komandante Deker maka lidera diretamente ezersísiu forsa Falintil nian iha momentu ne’ebá.