Letefoho, Ermera, 25 Maiu 2015 – S.E. Prezidente Repúblika, Taur Matan Ruak, hala’o diálogu komunitária ho komunidade suku Riheu, postu administrativu Ermera iha parte dadeer no iha parte lokraik kontinua ho komunidade suku Haupú nian, postu administrativu Letefoho, munisípiu Ermera, iha segunda-feira semana ida-ne’e.

Iha suku Riheu, Xefe Estadu sente kontente tanba iha mudansa iha nivel vida ekonomia komunidade sira-nian wainhira kompara fali ba tempu kuandu ladauk implementa tara-bandu. Tanba, iha momentu ne’ebá inan-aman sira preokupa liu ba lia-mate/lia-moris.

“Ha’u kontente tanba iha evolusaun boot, kompara iha tinan 2012 wainhira ha’u mai sei hanesan Komandante Jerál F-FDTL. Uluk ha’u haree imi oin-triste no dezanimadu mas ohin imi oin-nabilan loos”, dehan Xefe Estadu

Iha sesaun pergunta komunidade sira levanta kestoins barak ne’ebé liga ba sira-nia moris, no ida mak kona-ba folin kafé ne’ebé ki’ik tebes, tanba ne’e sira husu Xefe Estadu oinsá atu impoin ba folin kafé.

Hatán ba ida-ne’e Xefe Estadu hatete, susar tebes Estadu ka governu halo intervensaun iha folin kafé nian, tanba Timor-Leste adota sistema merkadu livre. Bazeia ba lójika ne’ebé Xefe Estadu hato’o maka katak, kafé folin tun tanba mós intervensaun husi intermediáriu sira-ne’ebé barak. Nune’e Xefe Estadu husu ba produtores kafé sira atu organiza an, kria asosiasaun produtores kafé nian atu bele haree asuntu ne’e.

Hakat fali ba iha sesaun pergunta nian durante diálogu komunitáriu iha suku Haupú, asuntu hirak-ne’ebé komunidade sira aprezenta maka hanesan negosiante ki’ik hosi nasaun seluk okupa merkadu to’o rurál, dezenvolvimentu konsentra de’it iha kapitál no inklui mós asuntu importante seluk hirak.

Hatán kona-ba preokupasaun negosiante estranjeirus ne’ebé domina to’o merkadu rurál, Xefe Estadu hatete:

“Ita-nia polítika loke an ita labele taka an, tanba ita-nia ema mós iha nasaun seluk, maibé importante ita-nia governu mak tenke kapasita ita-nia negosiante oinsá kompete ho saudavel.”

Xefe Estadu hatutan problema boot maka negosiante timoroan seidauk iha mentalidade negósiu ka jestaun negósiu nian.

Kona-ba preokupasaun katak dezenvolvimentu la’o de’it iha kapitál, Xefe Estadu hatán katak, hanesan Xefe Estadu nia defende kria dezenvolvimentu ekilíbriu entre suku ho urbanu atu evita ema hotu ba butuk iha kapitál sidade.

Iha suku rua refere, Xefe Estadu kontinua fó-hanoin filafali nia mensajen ba asuntu haat ne’ebé komunidade sira tenke halo mak hanesan: tau matan ba ekonomia família nian, investe iha oan nia edukasaun atu bele muda família nia moris iha futuru, kuidadu saúde família nian no ikus husu atu serbisu hamutuk. Tanba atraves asuntu haat ne’ebé maka refere bele kontribui ba hadi’ak komunidade nia vida no mós nasaun nia vida.

Xefe Estadu mós hetan akompañamentu husi nia bainaka espesiál, Xefe Suku Daisua hosi munisípiu Manufahi nian no Administradór postu administrativu Venilale, munisípiu Baucau iha diálogu ne’ebé refere.

Diálogu iha suku Reiheu no Haupú nu’udar inísiu programa diálogu komunitáriu Xefe Estadu nian iha semana ne’e iha munisípiu Ermera. Programa diálogu komunitáriu ne’e maka hala’o ne’e, programa mensál Xefe Estadu nian atu bá vizita kada suku iha munisípiu ne’ebé Xefe Estadu seidauk vizita, ka hanesan kompromisu Xefe Estadu nian atu vizita hotu suku 442 antes remata nia mandatu iha 2017.