Ermera, 12 Agostu 2015- S.E. Prezidente Repúblika, Taur Matan Ruak, kuarta-feira ne’e hala’o diálogu ho komunidade suku Tocoluli no suku Delesu, iha postu administrativu Railaco, munisípiu Ermera.

 Iha suku Tocoluli, komunidade sira hato’o ba Xefe Estadu, sira-nia preokupasaun kona-ba pasajen ilegál ema no sasán (negósiu) iha fronteira entre Timor-Leste no Indonézia, ne’ebé tuir sira bele kria problemas entre nasaun rua.

 Hatán ba kestaun ne’e, Xefe Estadu, hatete katak, situasaun atuál iha área fronteira la’o di’ak no la iha sinál ida ne’ebé maka bele kria preokupasaun no afeta relasaun entre nasaun rua ne’e.

 “Ita-nia relasaun ho Indonézia, ha’u la kompara mas, la iha relasaun (entre nasaun) ida di’ak, hanesan Timor-Leste ho Indonézia. Ha’u bele garante katak la iha problema”, dehan Xefe Estadu.

 Komunidade sira mós husu atu governu bele halo pagamentu terseira idade iha sira-nia suku. Tamba, durante ne’e iha ferik-katuas barak maka tenke la’o ba distánsia ne’ebé dook atu simu osan iha banku. Nune’e, husu atu lokaliza de’it iha kapitál munisípiu.

 Ba preokupasaun komunidade nian ne’e, Xefe Estadu hatete:

“Ita-nia Estadu tenta atu hadi’ak, atu osan maka mai imi, la’ós imi maka ba. Estadu hadi’ak neineik-neineik, aban-bainrua ne’e sei rezolve.”

 Molok atu halo vizita ba suku Tocoluli, Xefe Estadu halo uluk observasaun ba Sentru Viveirus Fatukeru, kazerna Komandu PNTL munisípiu Ermera no ba Mota Gohein, ne’ebé lokaliza entre suku Fatukeru no suku Lawala.

Iha Sentru Viveirus, hakiak ai-oan hanesan ai-kafé, ai-kakeu no ai-samatuku, hamutuk ektares 7,500.

 Hafoin ida-ne’e, Xefe Estadu hakat liu bá haree konstrusaun kazerna Komandu PNTL munisípiu Ermera hamutuk uma 54 no bá haree Mota Gohein.

 Mota Gohein, tinan-tinan hamosu inundasaun no to’o oras ne’e estraga ona populasaun suku rua ne’e nia uma no rai hamutuk ektares 2,5. Tanba ne’e populasaun sira husu atu Governu bele harii lailais bronzon, hodi proteje sira-nia uma no rai ne’ebé sira hela b.

 Iha diálogu ba dala rua iha suku Delesu, komunidade sira informa ba Xefe Estadu katak, iha joven barak iha sira-nia suku maka hakarak sai membru PNTL no F-FDTL. Maibé, la iha ema ida maka pasa iha ezame. Nune’e, komunidade suku Delesu husu atu Governu bele fó prioridade ba joven sira iha suku ne’e atu sai membru forsa rua ne’e.

Hatán ba kestaun ne’e, Xefe Estadu hatete katak, populasaun Timor-Leste maioria joven i barak husi sira-ne’e mós maka hakarak sai membru PNTL no F-FDTL. Tanba ne’e maka presiza halo selesaun, se lae, Estadu laiha kbiit atu halo ema hotu sai membru PNTL no F-FDTL.

Mas Xefe Estadu kontinua enkoraja joven sira iha suku Delesu:

“Ha’u husu para imi kontinua tuir nafatin (ezame). Labele lakon esperansa. Ohin la tama, aban sei tama”, dehan Xefe Estadu.