Aileu, 26 Jullu 2016 – S.E. Prezidente Repúblika, Taur Matan Ruak, tersa-Feira ne’e, hala’o diálogu komunitáriu ho populasaun Suku Tulatakeu, iha parte dadeer, depois kontinua ho diálogu iha lokraik ho komunidade Suku Faturasa, Postu Administrativu Remexío, Munisípiu Aileu.

Iha diálogu dahuluk ho komunidade Suku Tulatakeu, komunidade sira husu atu Estadu bele estabelese no halais prosesu finalizasaun “Lei Terras e Propriedades”. Razaun maka katak, komunidade sira aprezenta kestaun ne’e atu evita konflitu ne’ebé akontese beibeik iha ne’ebé komunidade sira sempre enfrenta problema hadau malu rai.

Hatán ba preokupasaun ne’e, Xefe Estadu husu komunidade kolabora didi’ak hodi hein finalizasaun Lei Terras e Propriedade, no husu atu komunidade sira labele hanoin de’it atu sai na’in ba rai. Maibé, oinsá maka bele aproveita ho másimu propriedade ba rai atu hadi’ak kondisaun ekonomia família nian.

Xefe Estadu realsa liután hodi subliña, konstituisaun RDTL garante ona katak, sidadaun timoroan iha direitu atu hetan rai pedasuk ida hodi hala’o nia moris. Tan ne’e Estadu sei esforsu atu Timoroan hotu bele hetan nia direitu ba rai.

“Imi Aileu iha rai boot, mas populasaun uitoan de’it. Tan ne’e, imi la iha razaun atu hadau malu ba rai”, afirma Xefe Estadu.

Hakat fali ba diálogu tuirmai ho komunidade Suku Faturasa, komunidade sira husu apoiu Estadu nian atu bele promove atu oinsá bele sosa sira-nia produtu lokál. Komunidade sira aprezenta kestaun ne’e, tanba Governu estabelese tiha “Programa Povu Kuda, Governu Sosa”, maibé ida-ne’e la akontese iha sira-nia suku.

Komunidade sira mós kontinua hato’o keixa sobre atuasaun ajente Saneamentu Munisípiu Díli, ne’ebé la husik vendedores ambulantes sira fa’an sira-nia produtu ortikultura hanesan ai-fuan no modo ho hakmatek iha sidade laran.

Responde ba kestaun ne’e, Xefe Estadu dehan:

“Ha’u hanesan Prezidente Repúblika lamenta, maibé ita tenke organiza an di’ak liu. La’ós de’it Governu maibé agrikultores, vendedores sira tenke organiza-an. Ha’u sei ko’alia ho Governu oinsá atu rezolve ida-ne’e.”

Kona-ba promosaun produtu lokál, Xefe Estadu sujere atu komunidade sira ne’ebé iha produtu lokál atu hakbesik an ba Ministériu Komérsiu, Indústria no Ambiente (MCIA) atu bele organiza no tulun sira hodi promove produtu lokál ne’ebé sira iha.

Problema seluk maka komunidade Suku Tulakakeu no Suku Faturasa aprezenta ba Xefe Estadu maka hanesan, estrada la iha atu asesu no esplora rekursu naturais sira ne’ebé iha, promosaun ba profesores voluntárius, pensaun veteranus la tuir nivel partisipasaun iha funu, no revizaun ba pensaun vitalísia.

Ho diálogu iha Suku Faturasa, Xefe Estadu, termina nia jornada hodi halo diálogu komunitáriu iha Munisípiu Aileu no Manufahi ne’ebé hahú iha semana kotuk (18/07).

Ikusmai, hakarak atu informa mós katak, atraves vizita ba suku hirak-ne’e ne’ebé hahú iha dia 18 to’o 21 de Jullu, Xefe Estadu finaliza ona nia vizita ba suku tomak iha Munisípiu Aileu.

Iha okaziaun ne’e, bainaka-Espesiál Xefe Estadu nian, hanesan; Administradór Postu Laclubar (Manatutu), Xefe Suku Laisorulai de Cima (Quelicai, Baucau), Xefe Suku Lepo (Bobonaro) no Xefe Suku Colimau (Bobonaro) kontinua marka sira-nia prezensa iha diálogu ho suku rua tomak hodi haree, rona no kompara realidade ne’ebé maka komunidade iha suku sira-ne’e iha kompara ba sira-nia suku rasik.

Ikusmai hakarak mós atu informa katak, reprezentante Komisáriu ba Komisaun Kombate HIV-SIDA, ne’ebé Diretora Antonieta Magno maka reprezenta kontinua utiliza tebes okaziaun diálogu ho komunidade suku rua hodi fahe informasaun sobre lala’ok moras SIDA, ema na’in hirak ona mak sofre moras ne’e, inklui fó mós sujestaun atu komunidade sira kuidadu an husi moras ne’e. Tanba, selae moras ne’e sei ameasa Timor-Leste nia futuru, liuliu iha aspetu dezenvolvimentu.