Dili, 8 Maiu 2015 – Liuhosi audiénsia semanál ne’ebé hala’o entre Prezidente Repúblika, Taur Matan Ruak, ho Primeiru Ministru, Rui Maria de Araujo, iha kinta-feira ne’e iha Palásiu Prezidente Nicolau Lobato, Xefe Estadu husu atu governu halo follow-up ba nia enkontru ho Prezidente Indonézia Joko Widodo foin lailais ne’e iha Indonézia kona-ba asuntu fronteira rai-maran no tasi nian.

“Konteúdu enkontru ohin ne’e, espesifikamente kona-ba vizita Prezidente Repúblika nian ba Indonézia. Iha kestoins balun ne’ebé Governu presiza halo ‘follow up’. Tanba, hanesan Ita-Boot sira rona Sr. Prezidente ko’alia ho Sr. Prezidente Jokowi kona-ba kestoins fronteira terrestre no marítima. Entaun Prezidente husu para Governu halo ‘follow up’ ba buat ne’ebé Xefe Estadu rain rua ko’alia”,dehan Xefe Governu ba imprensa sira hafoin remata audiénsia semanál ho Xefe Estadu.

Aleinde ne’e iha enkontru semanál ne’e, Xefe Governu ho Xefe Estadu mós partilla serbisu Xefe Estadu nian no Governu nian.

Semana-semana enkontru ho Prezidente para atualiza uitoan serbisu Governu nian i Prezidente mós hato’o kona-ba rezultadu nia vizita ba tuir simeira país Naun Aliñadu ninian iha Indonézia. No mós foin daudauk ba vizita suku sira, maizumenus hetan pontus saida maka Sr. Prezidente Repúblika hetan iha ne’ebá partilla mós ho Governu sobre preokupasaun komunidade sira-nian para depois Governu haree oinsá mak atu rezolve”dehan Xefe Governu.

Xefe Governu hatutan nia atualiza mós informasaun ba Xefe Estadu kona-ba preparasaun orsamentu jerál ba 2016 nian, rezultadu fundus konta jerál Estadu no tipu prioridade governu nian ne’ebé atu implementa iha tinan fiskál 2016.