Lautem, 26 Janeiru 2015 – S.E. Prezidente Repúblika Taur Matan Ruak, inaugura sentru fini iha postu administrativu Lospalos, munisípiu Lautem, iha nia primeira vizita iha 2015 hamutuk ho Ministru Agrikultura no Peskas, Mariano Asanami Sabino, Sekretária Estadu Promosaun Igualdade, Idelta Rodrigues, no Embaixadora Estadus Unidus ba Timor-Leste, Karen Stanton, iha segunda-feira ne’e.

Iha nia intervensaun Xefe Estadu hatete:

“Ha’u husu ba populasaun sira atu serbisu hamutuk ho sira didi’ak, imi-nia susesu hanesan sira-nian mós, imi-nian hanesan ami-nian mós, no ita-nia nasaun ninian mós. Ami hakarak imi iha osan atu halo uma di’ak, iha susesu no la preokupa hatama imi-nia oan sira ba eskola.”

Aproveita oportunidade ne’e, Xefe Estadu mós hato’o nia agradesimentu ba Embaixada Estadus Unidus Amérika no Ministériu Agrikultura ba projetu ne’e hodi dehan:

“Ha’u aproveita oportunidade ne’e atu agradese ba Ministru Agrikultura no Peskas, ba Governu, no mós ba Embaixada Estadus Unidus. Tanba, Governu Estadus Unidu labaruk atu kontinua fó kontribuisaun ba dezenvolvimentu atividade hirak ne’ebé lori benefísiu ba sidadaun sira.”

Iha parte seluk, Embaixadora Estadus Unidus, Karen Stanton, deklara katak, Estadus Unidus Amérika haksolok tebes atu finansia dezenvolvimentu ‘agribusiness’ iha Timor-Leste ne’ebé sei fasilita kreximentu ekonomia povu Timor-Leste nian.

Iha nia observasaun reprezentante Governu Timor-Leste, Ministru Agrikultura, Mariano Asanami Sabino, haktuir mós katak, fini hirak ne’ebé maka lideransa sira observa rasik ne’e sei distribui ba agrikultór sira iha Munisípiu Lautem rasik, Baucau no Viqueque atu kuda ba rai mamuk atu bele proteje rai nia bokur no prezerva udan-been.

Iha Sentru fini refere, hakiak ai-marungi, kafé Robusta, pimento, kakau, ai-farina, xá no ai-horis seluk hirak.

Antes inaugura sentru fini ne’ebé refere, Xefe Estadu hamutuk ho Ministru Agrikultura no Peskas, Sekretária Estadu Promosaun Igualdade, no mós reprezentante autoridade lokál, reprezentante NCBA no Cooperativa Café Timor ba observa diretamente fini hirak ne’ebé temi ona iha fatin ida-idak ninian.

Hakarak mós atu informa katak, hafoin prosedimentu serimónia hirak-ne’e hotu, Embaixadora Estadus Unidus Amérika kuda simbolikamentu ai-oan iha kintál laran, no kontinua ba asiste Xefe Estadu asina plaka sentru nian.

Sentru fini ne’ebé maka refere ne’e, rezultadu husi parseria entre Ministériu Agrikultura no Peskas, NCBA no Cooperativa Café Timor atraves programa USAID, no hala’o iha rai ne’ebé maka hamutuk ektares 25.

Serimónia inaugura sentru fini, tesi fita no asina plaka ne’e, hetan entuziazmu maka’as husi agrikultór sira, komunidade lokál no mós estudante sira iha munisípiu Lautem.