Dili, 19 Jullu 2016 – S.E. Prezidente Repúblika, Taur Matan Ruak iha sesta semana kotuk partisipa iha serimónia funerál membru Konsellu Estadu no eis portavós kandidatura kampaña prezidensiál nian iha tinan 2012 ba atuál Xefe Estadu, matebian Germenino dos Reis Amaral “Lekisera” iha Suku Poetete, Postu Administrativu Gleno, Munisípiu Ermera.

Antes atu bá haloot iha matebian nia moris-fatin Suku Poetete, dahuluk matebian nia isin-mate lori uluk ba iha Kapela Gleno hodi halo misa requiem.

Hafoin remata misa requiem, Xefe Estadu iha nia mensajen hatete, matebian Lekisera fó nia kontribuisaun boot ba Timor-Leste la’ós de’it iha tempu luta ba ukun rasik-an maibé mós iha tempu ukun-an nia laran.

Xefe Estadu apresia tebes ba kontribuisaun matebian nian liuliu wainhira apoiu atuál Xefe Estadu nia kandidatura ba Prezidente Repúblika hodi sira na’in-rua la’o hale’u territóriu laran ko’alia kona-ba mehi no hanoin ba Timor.

 “Ami na’in-rua mehi ida de’it, mak Timoroan sira tenke kontribui. Nasaun ne’e hanesan mós família, labele ema ida de’it mak fó nia kontribuisaun maibé ita hotu-hotu hosi beik to’o matenek, hosi kiak to’o riku, hosi foin-sa’e to’o ferik-katuas, hotu-hotu fó nia kontribuisaun mak nasaun ne’e bele la’o ba oin”, dehan Xefe Estadu hodi hanoin memória Lekisera nian.

Xefe Estadu mós aproveita enkoraja oan-kiak sira atu hela, kontinua banati tuir sira-nia aman nia mensajen ne’ebé husik hela ba sira.

Ikus, Xefe Estadu hodi nia naran rasik, família no mós povu Timor-Leste nian naran agradese ba família matebian Lekisera nian, ba matebian nia kontribuisaun ne’ebé fó ona Timor-Leste.

Antes hetan moras stroke, matebian hanesan Prezidente Cooperativa Café Timor (CCT) ne’ebé parseira ho NCBA hosi Estadus Unidus Amerika hodi sosa kafé agrikultór sira-nian.

Entretantu ba matebian nia kontribuisaun iha luta ba Libertasaun Nasionál, maka iha tinan 2009 Estadu rekoñese matebian ho kondekorasaun Ordem Nicolau Lobato Grau II.

Matebian Germenino dos Reis Amaral ”Leksiera” moris iha loron 24 fulan-Novembru, 1949, no mate iha loron 13 Jullu 2016 iha Ospitál Nasionál Guido Valadares tanba sofre moras stroke besik tinan 3 resin. Matebian husik hela oan na’in-sia (9), mane na’in-neen (6) no feto na’in-tolu (3).