Dili, 11 Maiu 2015 – S.E. Prezidente Repúblika, Taur Matan Ruak, segunda-feira ne’e iha Palásiu Prezidente Nicolau Lobato, simu reprezentante Diresaun Nasionál Asosiasaun Kombatentes no Veteranus Libertasaun (DNACVL), Sr. David Dias Ximenes “Mandati” no Sr. Jose Agostinho Sequeira “Somocho”.

Objetivu hosi sorumutu ne’e atu esklarese ba Prezidente Repúblika kona-ba petisaun ne’ebé DNACVL haruka ba Prezidente Repúblika relasiona ho Dekretu Lei Konsellu Veteranus nian ne’ebé hetan ona aprovasaun iha Konsellu Ministru.

“Ami husu ba Prezidente atu labele promulga lai para ita haree lai, hadi’a lai, la’ós dehan kontra. Ami laiha intensaun kontra maibé ita hamutuk hadi’a para tau ba ne’e, tau loos ona, labele ida mai dehan ‘di’ak’, ida mai ‘ladi’ak’”, dehan David Dias Ximenes ba imprensa sira hafoin sorumutu.

Tuir David Dias Ximenes katak Xefe Estadu mak konvida sira mai hodi hato’o sira-nia hanoin relasiona ho petisaun ne’ebé DNACVL haruka mai Prezidente Repúblika.

Haktuir Xefe Estadu nia liafuan durante sorumutu, David Dias Ximenes hatete katak Xefe Estadu promete sei haree no sei konsulta didi’ak ho komponente hotu ne’ebé iha ligasaun ho veteranus tanba veteranus la’ós ema ida nian de’it.