Dili, 12 Janeiru 2015 – S.E. Prezidente Repúblika Taur Matan Ruak, Segunda-feira ne’e iha Palasiu Prezidensiál Nicolau Lobato, simu vizita kortezia eis Primeiru Ministru Austrália Sr. Kevin Rudd, ne’ebé mós nu’udar Prezidente Komisaun Indepedente konaba Sistema Multilateralizmu Nasoens Unidas nian.

Hetan akompañamentu hosi eis Prezidente Dr. Jose Ramos Horta ne’ebé oras ne’e asumi knaar hanesan Prezidente ba Komisaun Altu Nivel ba Operasaun ba Pás ONU nian, Sr. Kevin Rudd mai hasoru Prezidente Repúblika atu hetan hanoin ruma konaba sistema ONU nian iha loron oinmai.

Tuir Sr. Kevin Rudd katak, Timor Leste iha esperiénsia direta ho Organizasaun Nasoens Unidas inklui ho Forsa da Paz ONU nian nomós ajénsia sira ONU nian ne’ebé mai hala’o knaar iha rai ne’e, nune’e, presiza rona mos hosi estadu Timor Leste konaba sistema ONU nian iha futuru.

“Ha’u serbisu hamutuk ho ha’u-nia belun Dr. Jose Ramos Horta hodi haree sistema ONU nian ba tinan rua oinmai”, dehan Sr. KevinRudd.

~~HOTU~~