Dili, 19 Novembru 2015 – S.E. Prezidente Repúblika, Taur Matan Ruak, ne’ebé akompañadu husi Ministru Negósiu Estranjeiru, Hernani Coelho, fó pose ba Embaixadores dezignadus Timor-Leste nian ba paízes lima, mak hanesan: Bendito Freitas ba Repúblika Populár Xina, Aleixo da Cruz ba Japaun, Felicidade de Sousa Guterres ba Kamboja, Joaquim Amaral ba Reinu Tailándia no Adalsiza Magno ba Repúblika Singapura, inklui mós Egas da Costa Freitas ba Santa Sé, kinta-feira ne’e iha Palásiu Prezidente Nicolau Lobato.

Iha nia diskursu hafoin halo tomada pose, Xefe Estadu hatete:
“Embaixadór sira-nia misaun divulga no reprezenta ita-nia nasaun hodi defende ita-nia interese iha nasaun sira-ne’e. Segundu lugar, asegura ita-nia prestíjiu no kredibilidade.”

Xefe Estadu husu ba emposadu Embaixadores dezignadu sira atu buka hametin relasaun ho país sira-ne’ebé Estadu tau sira hanesan reprezentante, hodi dada interese país hirak refere nia interese mai halo investimentu iha rai-laran. Maibé Xefe Estadu mós lamenta, tanba to’o ohin loron Timor-Leste seidauk iha lei ba rai no difikulta investidores atu investe iha rai-laran.

“Ita ko’alia kona-ba investimentu, Prezidente Repúblika ko’alia, Embaixadór sira ko’alia, ita ko’alia kona-ba diplomasia ekonómika, mas ema mai ita-nia rain husu, imi-nia lei rai nian iha ona? Ita ko’alia nafatin ida-ne’e ka promove fali buat seluk, não e para que ema labele hatete ita afinál ita ko’alia ba buat ne’ebé ita la persebe”, dehan Xefe Estadu ba emposadu sira.

Xefe Estadu subliña liután, serbisu hanesan embaixadores la’ós fasil, maibé Xefe Estadu fiar iha kapasidade Embaixadores dezignadu sira-nian ne’ebé atu reprezenta Timor-Leste nia interese iha nasaun li’ur. Nune’e, Xefe Estadu dehan ba Embaixadór dezignadu sira katak:
“Serbisu Ita-Boot sira-nian la’ós fasil mas não é imposivel, liuliu altura ne’ebé ita hakarak dezenvolve ita-nia nasaun maka’as no la’o lais liután ba oin. Ne’ebé apoiu nasaun sira-ne’e importante partikularmente ba iha ASEAN nian. Ita-nia ambisaun hakarak tama ASEAN, ita la ansi, mas também ita hakarak tama. I ba Xina, iha nia estratéjika ba dezenvolvimentu ke rota de seda, ke provavelmente Timór bele aproveita. Japaun ita-nia parseiru ida ke dez de sempre iha ita-nia sorin i kontinua hametin relasaun ho sira no ikus Vatikanu ne’e hanesan liga ba identidade ita-nian. Ne’ebé dala ida tan hakarak fó parabéns i kongratula, dezeju boa sorte no susesu.”

Embaixadór dezignadu ba Repúblika Popular Xina, Bendito dos Santos Freitas, (eis Ministru Edukasaun V Governu Konstitusionál) sei troka atuál Embaixadora Viky Chong. Embaixadór dezignadu ba Japaun, Filomeno Aleixo (eis Vise Ministru Administrasaun Estatál II Governu Konstitusionál – FRETILIN) sei troka atuál Embaixadór Isilio Coelho. Embaixadór dezignadu ba Santa Sé, Egas da Costa Freitas (eis Profesór Eskola Sekundária Vemasse – Baucau) atu troka matebian eis Embaixadór Egidio de Jesus ne’ebé mate iha 2014. Embaixadora dezignadu ba Singapura, Adalsiza Magno (Eis Vise Ministra Negósiu Estranjeirus I Governu Konstitusionál -FRETILIN), sei troka atuál Embaixadór (enkarregadu) Domingos Savio, enkuantu embaixadores dezignadu ba Kamboja no Tailándia foin atu hala’o misaun ba dahuluk.
Hola parte iha tomada de pose refere, Ministru Negósiu Estranjeirus Hernani Coelho, Xefe Casa Civil Prezidénsia Repúblika Dr. Rui Gomes, Xefe Casa Militar Koronél Jose da Costa Trix no família emposadu sira-nian.