Aileu, 25 Fevereiru 2015, S.E. Prezidente Repúblika, Taur Matan Ruak, hala’o diálogu komunitáriu ho populasaun iha Suku Lausi no Suku Fatubosa, postu administrativu Aileu Vila, munisípiu Aileu iha kuarta-feira semana ne’e.

Informa mós informa katak, molok halo diálogu ho komunidade Lausi, Xefe Estadu presta uluk omenajen iha rate saudozu, Mauleki Sarmento, ne’ebé forsa okupante sira oho iha loron 6 fulan-Setembru 1999.

Durante diálogu ne’ebé maka hala’o, populasaun iha Suku Lausi hato’o sira-nia preokupasaun oioin ba Prezidente Repúblika. Nu’udar ezemplu, populasaun sira husu atu oinsá joven sira iha área rurais bele hetan mós oportunidade atu sai hanesan Forsa no membru PNTL. No, populasaun sira mós husu atu Xefe Estadu fó apoiu ekipamentus agrikultura atu fasilita sira-nia servisu.

Hatán ba preokupasaun populasaun nian ne’e Xefe Estadu hatete katak, Timoroan hotu iha direitu hanesan atu sai forsa ka membru polísia. Maibé, presiza prenxe rekizitus tuir kritériu ne’ebé Estadu estabelese tiha ona.

Xefe Estadu realsa liután katak: “La’ós de’it iha forsa ga iha polísia maka ita bele serbí ita-nia nasaun. Iha kualker profisaun ita mós bele serbí ita-nia nasaun.”

Aleinde ne’e, iha Suku ho populasaun hamutuk ema 1.283 ne’e, Xefe Estadu mós halo lansamentu fatuk dahuluk (primeira pedra) atu harii pre-eskolár Lequitura.

Iha kuarta-feira lokraik, S.E. Prezidente Repúblika hala’o fali diálogu ho komunidade iha Suku Fatubosa. Iha diálogu ne’e, populasaun sira husu ba Xefe Estadu atu hadi’ak no haluan estrada iha sira-nia suku. Ho razaun atu bele fasilita sira atu fa’an produtu agrikultura. Hafoin ida ne’e, informa mós ba Xefe Estadu katak, Suku Fatubosa mós, tinatinan sai hanesan fatin pasajen ba peregrinus sira, wainhira halo peregrinasaun ba Nosa Señora iha foho Ramelau.

Hatán ba preokupasaun komunidade Fatubosa nian ne’e, Xefe Estadu husu atu populasaun sira bele uza no kuidadu estrada ne’ebé oras ne’e iha ona, atu nune’e Estadu bele tulun fali populasaun iha fatin seluk ne’ebé sei presiza liu estrada.

“Ita-nia Estadu fó tuir nia kbiit, la’ós tuir saida maka ita hakarak”, dehan Xefe Estadu.

Populasaun Fatubosa mós rekomenda ba Xefe Estadu atu iha oportunidade seluk, bele mós vizita fatin istóriku, fatuk-kuak Berleki, ne’ebé situa kilómetru 2 husi sira-nia Suku. Razaun maka katak, fatuk-kuak Berleki hanesan fatin ida ne’ebé uluk, iha funu 1975, populasaun barak uza hanesan subar-fatin.

Iha vizita ba Fatubosa, Xefe Estadu mós halo inaugurasaun ba Sede Suku Fatubosa, hanesan parte ida hosi Programa Dezenvolvimentu Suku (PNDS).

La haluha mós atu informa katak, Suku Fatubosa iha populasaun hamutuk ema 2.331.