Díli, 13 Outubru 2016 – S.E. Prezidente Repúblika, Taur Matan Ruak, iha kinta-feira ne’e iha Palásiu Prezidénsia Nicolau Lobato, hato’o votus parabéns ba Loron Mundiál Profesores nian. Tanba, profesór maka fundasaun prinsipál atu forma no prepara ema, inklui determina kualidade ba Timor-Leste nia rekursu umanu iha futuru.

Knaar hanesan profesór sai importante tebes ita tempu ukun-an ne’e, tanba forma liután ema ho badinas ho onestu. Profisaun ida-ne’e okupa fatin espesiál tebes iha ita-nia sosiedade nia leet. Atraves sira-nia sakrifísiu no dedikasaun atu hasoru difikuldade hodi forma ema, halo profesór sira sai eroi tebes iha tempu Ukun-An ne’e.

Hanesan Xefe Estadu:
“Ha’u fó parabéns ba aniversáriu Loron Mundiál Profesór sira-nian, agradese tebes Ita-Boot sira-nia dedikasaun, prontidaun, kompromisu atu serbí ho badinas, ho onestidade sein reklamasoens. Ha’u la iha liafuan atu agradese Ita-Boot sira-nia esforsu tomak hodi transforma, fasilita ema ida sai ema kompletu. Maibé, hakarak dehan katak, Timor-Leste sei la’o ba oin maka’as tebes, tanba iha servidór hanesan Ita-Boot iha tempu Ukun-An ne’e. Tanba, Ita-Boot sira fasilita Timoroan hotu atu deskobre sira-nia an no sira-nia futuru. Nune’e, Ita-Boot sira-nia kontribuisaun mós sai fatór determinante ba dezenvolvimentu kapitál umanu ba nasaun Timor-Leste tomak, liuliu prepara Timoroan sira hotu atu hatán ba dezafiu ne’ebé maka ita-nia nasaun sei hasoru iha futuru.

Hanesan Prezidente Repúblika, no ko’alia ba Timor-Leste nian futuru, husu atu ita hotu serbisu hamutuk, serbisu maka’as liután, nu’udar profesór sira hatudu ona iha sira-nia esforsu, hodi transforma setór edukasaun atu sai hanesan pilár determinante ida iha prosesu dezenvolvimentu, atu nune’e, ita iha kbiit liután atu hatán ba ezijénsia no dezafiu hirak ne’ebé maka nasaun ne’e sei hasoru iha futuru.

Importante mós atu dehan katak, investimentu iha setór edukasaun maka xave ba Timor-Leste nia futuru. Tanba, nasaun ne’ebé iha sistema edukasaun di’ak, sempre iha futuru ne’ebé di’ak. Mas, ko’alia sobre setór edukasaun, la’ós de’it konstrusaun fíziku eskola ne’ebé di’ak, sala aula ne’ebé di’ak, livru ne’ebé di’ak, maibé importante maka iha profesór sira-ne’ebé kualifikadu atu forma ema kualifikadu.

Ikusmai, ha’u remata hodi hato’o ha’u-nia votus de konfiansa, dezeju saúde di’ak, moris naruk no susesu nafatin ba profesór sira. Keta haluha atu konta nafatin ho Prezidente Repúblika nia apoiu ba Ita-Boot sira-nia servisu.”