Dili, 20 Fevereiru 2015 – S.E. Prezidente Repúblika, Taur Matan Ruak, simu iha audiénsia Primeiru Ministru Dr. Rui Maria de Araujo ba dahuluk, kinta-feira ne’e iha Palásiu Prezidensiál Nicolau Lobato, hafoin simu pose nu’udar Primeiru Ministru ba VI Governu Konstitusionál nian iha loron 16 fulan-Fevereiru liubá.

Hafoin enkontru liu oras rua resin, ba jornalista sira Primeiru Ministru Rui Maria Araujo esplika: “Primeiru ha’u informa ba Sr. Prezidente kona-ba rezultadu reuniaun Konsellu Ministrus ninian ne’ebé ami hala’o iha loron rua liu ba. Ami aprova estatutu orgániku, halo mós ‘follow up’ ba Dekretu-Lei ne’ebé governu anterior haruka mai i presiza renova filafali submisaun mai Prezidénsia. Depois, hamutuk ho Prezidente reflete di’ak liután pontus balun ne’ebé S.E. Sr. Prezidente natoon iha tomada de posse nian ko’alia i hodi nune’e bele enrikese liután programa de atuasaun governu ninian.”

Tuir Primeiru Ministru katak lei sira-ne’ebé governu anteriór aprova ona iha Dezembru tinan kotuk ne’ebé Prezidente Repúblika seidauk promulga presiza devolve no atualiza filafali depois lori filafali ba Prezidente Repúblika atu promulga.

Primeiru Ministru hatutan lei hirak ne’ebé presiza dezenvolve no atualiza maka hanesan: Dekretu-Lei kona-ba Estatutu Ministériu Finansas nian, revizaun ba Dekretu-Lei kona-ba kustus Viajen Internasionais nian, Dekretu-Lei kona-ba Kompeténsias ba Profisionais iha Área Jestaun no Finansas Públikas, i Dekretu-Lei kona-ba Kontratu Termu Sertu ba Administrasaun Públika nian.