S.E. Prezidente Repúblika Taur Matan Ruak kondena maka’as asaun atake brutalizmu hosi terrorista sira hasoru komunidade sira iha kapitál París, Fransa, iha sesta kalan, 13 Novembru oras Fransa nian, ne’ebé hamate ema na’in-129 no hakanek ema lubun seluk, tuir reportajen hosi mídia internasionál sira.

Xefe Estadu dehan:
“Ha’u kondena maka’as asaun brutál ne’ebé mak halo hosi grupu terrorizmu hasoru povu fransés.”

Xefe Estadu mós hato’o nia sentidu kondolénsia no solidariedade ba Estadu no povu Fransa.
“Lori Estadu no Povu Timor-Leste nia naran hato’o ami-nia sentidu kondolénsia no solidariedade ba Estadu no povu Fransa  no liuliu ba família vítima sira. Iha momentu ne’e, ha’u apoia tebes esforsu tomak hosi S.E. Sr. Prezidente Repúblika, François Hollande, no Ita-Boot nia Governu daudaun ne’e hodi buka tuir autór sira ne’ebé responsabiliza ba akontesimentu refere hodi ba hatán iha justisa nia oin.”