Suai, 19 Outubru 2015 – S.E. Prezidente Repúblika, Taur Matan Ruak, iha segunda-feira, hahú hala’o diálogu komunitáriu ba semana rua nia laran hodi hahú ho diálogu komunitáriu ho komunidade suku Maudemo, postu administrativu Tilomar, munisípiu Covalima.

Xefe Estadu hahú nia intervensaun hodi halo kómiku ba membru autoridade lokál no komunidade ne’ebé maka marka prezensa hodi dehan katak, nia sente haksolok no sorte tebes ba vizita dala ida ne’e tanba iha membru delegasaun feto na’in-rua ne’ebé maka akompaña nia vizita ba dala uluk.

Klarifika mós ba partisipante sira-ne’ebé maka refere hodi dehan katak, Administradór de Postu Dom Aleixo, no Xefe Suku Sabo sira partisipa iha viajen ne’e para sira bele haree diferensa hirak-ne’ebé maka sira-nia postu administrativu no suku iha no la iha kompara ba suku hirak-ne’ebé maka atu vizita durante sira-nia partisipasaun.

Hafoin maka Xefe Estadu refere loloos ba objetivu husi nia vizita ne’ebé ho intensaun atu:

  • Hato’o nia apresiasaun ba komunidade Maudemo ba sira-nia kontribuisaun ba luta ba Ukun-Rasik An,
  • Haree se komunidade sira, liuliu suku Maudemo sei prontu nafatin ka lae atu la’o liután ba oin. Tanba, independénsia Timor-Leste hetan ona, maibé seidauk hetan ‘moris-di’ak’,
  • Informa mós katak, Timoroan hotu nia serbisu ladauk hotu no sei lori jerasaun ba jerasaun atu hakat ba oin. Maibé, Timor-Leste sei hakat ba oin wainhira Timoroan hotu serbisu hamutuk ho objetivu ida de’it (atu hetan moris-di’ak).

Husu mós ba komunidade sira katak, Timor-Leste presiza atu mantein pás, tanba se pás la iha dezenvolvimentu mós sei la iha. No, independénsia sei la iha sentidu ba Timoroan hotu. Nune’e, Xefe Estadu mós husu obrigasaun tolu ba Estadu wainhira atu serbí maka, hamenus burokrasia, envolve populasaun no lori dezenvolvimentu ba populasaun.

Xefe Estadu husu liután ba komunidade Maudemo hanesan hato’o ona iha nia vizita no diálogu hirak ne’ebé hala’o ona atu komunidade sira labele haluha pontu prinsipál 4:

  • Tau matan ba sira-nia ekonomia,
  • Investe iha sira-nia oan nia edukasaun,
  • Kuidadu sira-nia saúde (tanba família forte nasaun mós forte)
  • Serbisu hamutuk (atu lori Timor-Leste ba oin mezmu husi kontribuisaun ne’ebé uitoan husi kada ema ida).

Hatán ba preokupasaun hirak-ne’ebé maka hato’o, Prezidente Repúblika, halo apelu ba membru komunidade sira presiza atu kontribui koordena ho estrutura autoridade lokál atu bele responde/hatán ba preokupasaun (problema) hirak-ne’ebé maka sira bele rezolve lokalmente.

Komunidade sira mós aprezenta keixa ida sobre kompañia hirak-ne’ebé lakohi sosa fatuk hirak-ne’ebé foin-sa’e no/ka komunidade sira halibur tiha ona. Hatán ba komunidade sira-nia preokupasaun ida-ne’e, Xefe Estadu dehan katak, la iha lei ida ne’ebé maka ezije kompañia ida atu tenke sosa husi grupu ida ninian. Maibé, husu ba komunidade atu buka konkordánsia entre parte rua hanesan prosesu negósiu ida.

Iha diálogu ne’e, Xefe Estadu mós fó oportunidade ba reprezentante autoridade lokál sira atu hatán ba preokupasaun komunidade hirak ba kada setór dezenvolvimentu.

Hafoin remata diálogu komunitáriu iha suku Maudemo, Prezidente Repúblika akompañadu ho autoridade lokál ho nia komitiva tomak halo vizita badak ida ba Uma Mahon husi Madre SSPS Covalima ne’ebé maka tau matan ba vítima violénsia doméstika no violasaun seksuál atu haree diretamente kondisaun sentru nian.

Iha diálogu komunitáriu durante semana rua ne’e, Xefe Estadu hetan akompañamentu husi Sra. Francisca Monica Fatima Soares, hanesan Xefe Suku Soba, postu administrativu Laga, munisípiu Baucau, Sra. Berta Santa Gonçalves Vieira, hanesan Administradór postu administrativu Dom Aleixu, munisípiu Dili, no mós Adjuntu Xefe Casa Militar, Asesór Tékniku sira, inklui mós autoridade lokál to’o fin de diálogu komunitáriu tomak iha dia 28 Outubru, 2015.