Suai, 20 Outubru 2015 – S.E. Prezidente Repúblika, Taur Matan Ruak, iha tersa-feira, hala’o diálogu komunitáriu ho komunidade suku Beiseuk, postu administrativu Tilomar, iha dadeer. Hafoin kontinua fali diálogu ho komunidade suku Debos, postu administrativu Suai Vila.

 Xefe Estadu hahú nia intervensaun hodi halo introdusaun ba komunidade no autoridade lokál bainaka espesiál na’in-rua, Sra. Francisca Monica Fatima Soares, hanesan Xefe-Suku Soba, postu administrativu Laga, munisípiu Baucau, Sra. Berta Santa Gonçalves Vieira, hanesan Administradór postu administrativu Dom Aleixu, munisípiu Dili.

 Iha diálogu komunitáriu ho komunidade iha suku rua ne’ebé refere, Xefe Estadu klarifika objetivu husi lori bainaka na’in-rua atu sira bele haree diferensa entre sira-nia suku no postu administrativu kompara ba suku hirak-ne’ebé sira vizita durante viajen ne’e.

 Hafoin maka Xefe Estadu mós refere loloos liután ba objetivu husi nia vizita ne’ebé ho intensaun atu:

  • Hato’o nia apresiasaun ba komunidade suku rua ba sira-nia kontribuisaun atu hetan independénsia,

  • Truka opiniaun ka hanoin sobre Timor-Leste hanesan nasaun ka família ida atu nune’e bele hala’o serbisu hirak loloos,

  • Fanun komunidade iha suku rua, se sira sei prontu nafatin kontinua serbisu maka’as liután. Tanba, independénsia Timor-Leste hetan ona, maibé, seidauk hetan ‘moris di’ak’,

  • Fó hanoin mós ba komunidade iha suku rua ne’ebé refere katak, Timoroan hotu nia serbisu ladauk hotu no sei presiza esforsu maka’as atu dezenvolve liután Timor-Leste,

  • Rona komunidade sira-nia preokupasaun no haree realidade sira-nia moris, no

  • Haree esforsu hirak ne’ebé maka Governu Timor-Leste halo iha munisípiu Covalima, no komunidade sira uza duni oportunidade hirak-ne’ebé maka governu kria ne’e ka lae.

 Komunidade suku rua mós aprezenta keixa sobre komunidade suku rua nia preokupasaun hirak, hanesan, falta postu saúde, moras malária ne’ebé maka’as iha suku balun, preokupasaun sobre lakunas balun iha fronteira (harii liután postu Unidade Polísia Fronteira, UPF), falta bee moos, merkadu fronteira ne’ebé la utiliza, no seluseluk tan.

 Hatán ba komunidade nia preokupasaun, S.E. Prezidente Repúblika halo apelu ida ba Timoroan tomak sobre pontu importante ida katak, Timoroan tomak presiza atu mantein pás atu nune’e Timor-Leste nia dezenvolvimentu bele la’o ba oin.

 S.E. Prezidente Repúblika mós husik hela serbisu prinsipál balun ba komunidade suku rua atu hala’o, hanesan, tau matan ba sira-nia ekonomia, haruka sira-nia oan sira ba eskola, kuidadu sira-nia saúde, no husu Timoroan hotu atu serbisu hamutuk ka halo serbisu ‘gotong royong’, hafoin evita/hapara violénsia doméstika hasoru feen ho oan sira (la’ós depois luta ba independénsia fila fali ba baku feen ho oan).

Hatán ba kestaun partikulár sobre proposta atu utiliza nia podér hodi halakon pensaun vitalísia, Xefe Estadu relembra filafali komunidade suku rua hodi subliña katak, dezde inísiu Prezidente Repúblika kontra ‘pensaun vitalísia’. Maibé, só Parlamentu Nasionál maka bele halo ida-ne’e maski Prezidente tenta ona ho esforsu oioin atu levanta asuntu ne’e ba governu no Parlamentu Nasionál. Nune’e, nia husu atu komunidade Timoroan tomak atu iha pasiénsia sobre alterasaun ba lei pensaun vitalísia ne’ebé só bele akontese de’it iha eleisaun lejizlatura tuirmai.

 Xefe Estadu mós husu ba komunidade sira atu aproveita mega projetu hirak-ne’ebé maka akontese daudaun iha munisípiu Covalima ba sira-nia benefísiu, atu nune’e sira labele sai fali vendedór modo iha sira-nia uma rasik.

 Iha diálogu ho komunidade suku rua ne’e no nu’udar hala’o ona iha diálogu 340 resin uluk, Xefe Estadu loke oportunidade mós ba reprezentante autoridade lokál sira atu hatán ba preokupasaun komunidade hirak ne’ebé komunidade sira aprezenta sobre planu no asaun ba kada setór dezenvolvimentu.

 Iha diálogu komunitáriu rua ne’e, Xefe Estadu kontinua hetan akompañamentu husi lideransa autoridade lokál, hanesan, Administradór munisípiu Covalima, Komandante PNTL, diretór sira, Adjuntu Casa Militar, asesór no mós tékniku sira.

 Ikusmai hakarak atu informa katak, iha kuarta-feira, 21 Outubru 2015, S.E. Prezidente Repúblika, TMR, hamutuk ho nia komitiva tomak sei kontinua hala’o diálogu iha suku Labarai no Mape iha munisípiu Covalima.