Suai, 21 Outubru 2015 – S.E. Prezidente Repúblika, Taur Matan Ruak, iha kuarta-feira, hala’o diálogu komunitáriu ho komunidade suku Labarai, postu administrativu Suai Vila iha dadeer-saan. No kontinua hala’o fali diálogu ho komunidade suku Mape, postu administrativu Zumalai iha lokraik.

 Wainhira atu hahú hato’o intervensaun, Xefe Estadu halo uluk introdusaun ba komunidade no reprezentante no autoridade lokál kona-ba nia bainaka espesiál na’in-rua, Sra. Francisca Monica Fatima Soares, hanesan Xefe-Suku Soba, postu administrativu Laga, munisípiu Baucau, no Sra. Berta Santa Gonçalves Vieira, hanesan Administradór postu administrativu Dom Aleixu, munisípiu Dili.

 Iha diálogu ho komunidade iha suku rua ne’ebé refere, Xefe Estadu klarifika katak, objetivu husi lori bainaka na’in-rua nu’udar refere atu sira bele observa no kompara diferensa hirak entre sira-nia suku no postu administrativu sobre saida maka sira bele aprende husi sira-nia vizita hirak-ne’e.

Hafoin Xefe Estadu esklarese liután objetivu husi nia vizita ne’ebé atu:

  • Hato’o Prezidente Repúblika nia apresiasaun sinsera ba komunidade suku rua ba sira-nia kontribuisaun atu halo Timor-Leste sai hanesan nasaun independénsia,

  • Haree realidade komunidade sira-nian

  • Husu komunidade iha suku rua, se sira sei prontu atu kontinua serbisu hamutuk maka’as liután. Tanba, independénsia Timor-Leste hetan ona, maibé, seidauk hetan ‘moris-di’ak’,

  • Informa esforsu hirak-ne’ebé Governu Timor-Leste kria ona, no haree se komunidade sira uza duni oportunidade hirak ne’ebé maka governu kria ne’e.

 Tama ba iha sesaun husu no hatán, komunidade suku Labarai no Mape hato’o sira-nia keixa sobre sira-nia preokupasaun hirak, nu’udar ezemplu: falta bee moos ba eskola no komunidade, hadi’ak kondisaun estrada no eletrisidade la iha ba suku, halakon lei pensaun vitalísia, veteranu hadau malu projetu, idozu sira ne’ebé ladauk selu to’o agora no preokupasaun seluseluk tan.

 Hatán ba komunidade nia preokupasaun, S.E. Prezidente Repúblika dehan katak, Timoroan tomak presiza mantein pás, organiza an atu serbisu hamutuk no prepara planu ne’ebé di’ak atu dezenvolvimentu bele la’o ba oin tuir prioridade urjente husi komunidade nia nesesidade hirak. Hafoin, Xefe Estadu mós refere ba komunidade sira iha diálogu iha suku rua ne’e, sobre serbisu importante 4 ne’ebé sira presiza, hanesan: tau matan ba sira-nia ekonomia; investe ba oan sira-nia eskola no hamenus lia-mate no lia-moris; kuidadu sira-nia saúde, no husu Timoroan hotu atu serbisu hamutuk ka halo serbisu ‘gotong royong’, hafoin husu mós hapara violénsia doméstika hasoru feto sira.

Hatán ba kestaun partikulár sobre halakon pensaun vitalísia, Xefe Estadu subliña ba komunidade suku rua katak, Prezidente Repúblika kontra ‘pensaun vitalísia’. No, só Parlamentu Nasionál maka bele muda lei ne’ebé refere iha eleisaun lejizlatura. Mas, Xefe Estadu halo mós apelu ida ba veteranu sira atu organiza an, pois serbisu hamutuk atu hadi’ak filafali sira-nia dadus atu bele fasilita prosesu. Maibé, husu ba komunidade Timoroan tomak atu iha pasiénsia sobre alterasaun ba lei pensaun vitalísia ne’e.

 Wainhira hatán ba kestaun membru komunidade ida ne’ebé husu atu Xefe Estadu kontinua nia lideransa atu lori liután Timor-Leste ba oin ho nia partidu rasik, Xefe Estadu dehan katak, hanesan eis-militár ida, nia sei la fila fali ba militár. Xefe Estadu mós lakohi tan ona atu serbí hanesan Prezidente Repúblika. Xefe Estadu sei hakarak tebes atu serbí Timor-Leste nafatin hafoin remata nia mandatu to’o nia mate. Maibé, lidera ba riku sira entaun Prezidente Repúblika husu kedan atu lalika konta nia, mas, nia mehi tebes atu lidera ba ema kiak sira.

 Entretantu iha suku Labarai, postu administrativu Suai Villa, Xefe Estadu husu tebes ba komunidade afetadu tanba projetu Supply Base ne’ebé hetan ona kompensasaun atu maneja ho didi’ak sira-nia osan ka labele halo malgastu ba kompensasaun. Maibé, uza ho didi’ak hodi hadi’ak ekonomia no investe iha sira-nia oan nia eskola, duké aban-bainrua sira maka sai ema sira ne’ebé kiak/mukit liu iha futuru.

 Nu’udar hala’o ona iha diálogu 343 uluk, Xefe Estadu fó mós oportunidade ba reprezentante autoridade lokál no diretór sira atu hatán ba preokupasaun hirak ne’ebé komunidade sira aprezenta sobre planu no asaun ba kada setór dezenvolvimentu.

 Ikusmai hakarak atu informa katak, iha kinta-feira, 22 Outubru, 2015, S.E. Prezidente Repúblika, TMR, hamutuk ho reprezentante autoridade lokál no nia komitiva tomak sei kontinua hala’o diálogu iha suku Usecai, postu administrativu Zumalai, iha munisípiu Covalima, no suku Lour iha postu administrativu Bobonaro, munisípiu Bobonaro.