Lautem, 24 Jullu 2015 – S.E Prezidente Repúblika, Taur Matan Ruak, kinta-feira ne’e hala’o diálogu komunitáriu ba loron daruak nian ho komunidade iha suku Pairara iha parte dadeer, no kontinua ho komunidade sira iha suku Parlamentu iha parte loraik, iha postu administrativu Lautem, munisípiu Lautem.

Iha suku Pairara, Xefe Estadu sente orgullu ho númeru juventude suku Pairara ne’ebé boot no servisu ona hanesan Forsa F-FDTL no polísia. Husu katak, númeru ne’e sei kontinua aumenta, no mós husu ba juventude sira atu servisu hamutuk ho kriativu atu kontribui ba dezenvolvimentu iha suku laran.

Bainhira tama ba sesaun husu no hatán, komunidade sira iha suku Pairara levanta ba Xefe Estadu sobre kestoins no preokupasaun barak, hanesan harii sentru formasaun profisionál, apoiu komputadores no asesu internet, apoiu ekipamentus desportu, ajuda grupu feto ONFTL, hadi’ak merenda eskolár no edifísiu eskola ensinu báziku, inklui relijiaun falsu ne’ebé komesa espalla iha munisípiu Lautem.

Hatán ba preokupasaun sobre apoiu grupu feto ONFTL, Xefe Estadu dehan katak:

Ita iha Sekretáriu Estadu ba partisipasaun feto iha dezenvolvimentu ekonomia. Ita-Boot sira tenke iha proposta ho asuntu klaru para sira haree, no bele haruka mai Primeira Dama hotu, oinsá ami bele fó ajuda ba imi.”

Kona-preokupasoins ba seita ka relijiaun foun Xefe Estadu hatete, Estadu fó liberdade ba sidadaun sira hodi eskolla fiar, i Estadu labele intervein ba ema nia fiar. Maibé Xefe Estadu husu ba sidadaun ne’ebé iha ona relijiaun hanesan Katólika atu hametin fé no labele monu ba manobra relijiaun foun nian hodi halai tuir.

Entretantu iha suku Parlamentu Komunidade sira liuhosi sesaun husu no hatán preokupa kona-ba la iha kualidade edukasaun, falta kampu traballu ba joven sira halo joven abandona nasaun hodi bá serbisu iha Europa, produtu lokál lafolin, hasa’e saláriu ba profesór sira, rezolve lailais problema Mauk Moruk ho nia grupu atu sidadaun sira sirkula livre hosi pasa-revista autoridade polisiál no militár, estabelese liras KAK to’o munisípiu sira atu kontrola projetus hodi labele mosu KKN, problema veteranus lei Pensaun Vitalísia no problema sosiais sira seluk.

Hatán kona-ba problema edukasaun Xefe Estadu dehan:

“Ita iha duni problema iha edukasaun. Ministériu Edukasaun oras ne’e esforsu daudaun atu hadi’ak. Buat ne’ebé ita hakarak (maka), edukasaun ba futuru la’ós de’it atu hetan gelar. Maibé, tenke kompetitivu introdús valór morál, étika no karakter personalidade ema nian i orienta ema ba merkadu, la’ós gelar de’it.”

Xefe Estadu hatutan:

“Ha’u husu ba matenek sira atu labele kritika, maibé fó mós solusaun oinsá ita hetan sistema edukasaun ida ne’ebé di’ak no diferente. Ami hotu (mós) preokupa, la’ós imi de’it, ita-nia hakarak sistema edukasaun Timor-Leste nian bele kompetitivu iha merkadu no bele prodús matenek, I bele esporta ba li’ur. La’ós de’it ita esporta traballadór, hanesan agora, ba Austrália no Koreia.”

Kona-ba produtu lokál hirak-ne’ebé lafolin, Xefe Estadu husu ba agrikultór iha suku Parlamentu sira atu organiza an halibur hamutuk produtus, hafoin aluga karreta lori ba fa’an iha Dili. Tanba, ema ida-idak la’o ketaketak ninian, ne’e sei susar, tanba ohin loron só merkadu iha Dili maka kompradores barak. Maibé Xefe Estadu mós husu atu agrikultór sira labele hasa’e folin sasán aas. Tanba, se hasa’e folin aas mak kompradór sira sei la sosa no sei bá sosa produtus importasaun ne’ebé folin baratu.

Hola parte iha diálogu komunitáriu ne’e maka Primeira Dama, Sra. Isabel Ferreira, Administradór munisípiu Lautem, bainaka Xefe Estadu nian hanesan, Administradór Postu Hatulia, munisípiu Ermera, Xefe suku Bermana, Turiskai, munisípiu Manufahi no Autoridades munisípiu Lautem no xefe sektorais sira.

Tuir agenda ne’ebé iha, diálogu ba loron datoluk nian hala’o iha suku Baduro no Maina II, munisípiu Lautem.