Dili, 24 Agostu, 2015 – S.E. Prezidente Repúblika, Taur Matan Ruak, ne’ebé maka Primeira Dama Isabel Ferreira akompaña, partisipa iha serimónia inaugurasaun igreja foun Parókia Ti’i Lou Imaculada Conceição Viqueque, iha sesta-feira semana liubá, iha munisípiu Viqueque.

Iha nia mensajen hafoin remata misa, Xefe Estadu husu ba povu no sarani munisípiu Viqueque atu uza Igreja sai hanesan fatin atu halo renovasaun ba fé/fiar sarani katóliku nian no mós hanesan fatin ida refújiu ba sarani sira, liuliu ba tentasaun mundu nian.

“Fatin ida-ne’e bele fó mós fatin ba ita para haburas, hametin valores kristaun, valores família nian, solidariedade no domin ba ita-nia maluk sira, fó kontribuisaun maka’as ba bem-estar ita-nia nasaun no ita-nia povu nian ho valores sira seluk ne’ebé halo ita kompletu liután hanesan Timoroan”, dehan Xefe Estadu.

Tanba ne’e, Xefe Estadu husu ba povu no sarani tomak iha munisípiu Viqueque nian atu kuidadu no mantein atu igreja parókia ne’e bele furak nafatin hanesan ho modelu ne’ebé iha.

Xefe Estadu hatutan liután, iha obra barak maka halo ona iha Timór laran tomak, maibé obra ba igreja parókia Viqueque nian nakonu ho kriatividade, profisaun, grandeza no simbolizmu ne’ebé boot tebes. Tanba ne’e, Xefe Estadu agradese tebes ba Amu Pároku Viqueque ba nia esforsu hodi ikusmai bele iha igreja foun ne’ebé murak tebes.

“Ha’u fó parabens ba sarani Viqueque sira. Ha’u ema Baucau, mas ha’u-nia postu Baguia seidauk hetan igreja di’ak ida hanesan ne’e, ne’ebé ha’u laran-moras loos. Mas, ha’u hakarak fó parabens ba Ita-Boot sira, i espera katak, iha tinan lima (5) ha’u mai nia (igreja) sei furak no kapás hanesan ne’e”, Xefe Estadu tenik tutan.

Xefe Estadu mós aproveita agradese ba kompañia BTK Unipessoal Lda. ne’ebé maka hala’o ona obra ne’e ho didi’ak tebes.

Serimónia inaugurasaun igreja foun ne’ebé refere, hahú ho ko’a fita portaun boot hosi Ministru Negósius Estranjeirus, Hernani Coelho, nu’udar reprezentante Primeiru Ministru. Hafoin ne’e, Bispu Dioseze Baucau no Administradór Apostóliku Dioseze Dili, Don Basílio do Nascimento, kontinua ho asina plaka ne’ebé Xefe Estadu, Prezidente Parlamentu Nasionál no bainaka importante sira seluk asiste diretamente. Hafoin ne’e kontinua ho bensaun ba igreja foun hosi Bispu Basílio i tuir kedas ho misa dala uluk iha igreja foun ne’e nia laran ne’ebé Ambispu Basílio, akompañadu hosi padre selebrante sira, maka prezide rasik.

Igreja foun refere hahú nia konstrusaun iha tinan 2012 ho apoiu orsamentu mai hosi Governu hamutuk $2.2 millaun no kontribuisaun hosi Viqueque-oan sira. Kompañia BTK maka kaer obra ne’ebé refere.

Prezidente Parlamentu Nasionál, Vicente Guterres, Xefe Estadu-Maiór Jenerál F-FDTL, Majór Jenerál Lere Anan Timur inklui membrus governu no deputadu balun hola parte mós iha serimónia ne’ebé refere hamutuk no povu sarani munisípiu Viqueque sira tomak.