Lospalos-Lautem, 21 Jullu 2015 – S.E. Prezidente Repúblika, Taur Matan Ruak, ne’ebé akompañadu hosi Primeira Dama, Isabel Ferreira, hamutuk ho eis-Primeiru Ministru Kay Rala Xanana Gusmão hala’o inaugurasaun ba monumentu trajédia Tchaivatxa 1985, iha tersa-feira iha aldeia Tchaivatxa, suku Soru, postu administrativu Lospalos, munisípiu Lautem.

Trajédia Tchaivatxa akontese iha loron 21 fulan-Jullu tinan 1985 wainhira hala’o kontaktu dame iha fatin refere entre forsa inimigu ho FALINTIL sira. Maibé, kontaktu ne’ebé atu hala’o ne’e, falla, ikusmai tiru-malu akontese no halo FALINTIL hamutuk na’in-sia inklui Primeiru Komandante Unidade Brigada Vermella, Miguel Pereira ho kódigu Falutxai mate iha akontesimentu refere. Vítima mate mós mosu husi parte Indonézia nian.

Liuhusi diskursu Xefe Estadu hatete, iha fatin hotu mosu akontesimentu ne’ebé hanesan mosu iha Tchaivatxa, i akontesimentu refere hola parte marxa ida hodi kontribui ba ukun-rasik an.

“Sira-ne’ebé mate iha ne’e, sira hotu ne’ebé mate iha ai-laran ne’ebá, sira hotu erois. Tanba, lori sira ita hetan independénsia, sira maka ita-nia eroi duni, jerasaun sei lembra. Lori sira maka ita hetan ukun-an, lori sira maka ohin ita hetan di’ak”, esplika Xefe Estadu.

Xefe Estadu subliña eroi sira-ne’ebé sakrifika ona sira-nia vida, husik hela todan ba Timór-oan hotu ne’ebé sei moris atu hatutan sira-nia luta hodi buka moris-di’ak.
“Sira bá husik hela todan ba ita, todan ida-ne’ebé sira husik hela ba ita maka ba buka moris-di’ak. Sira fó Ukun-An ba ita, agora ita bá buka moris-di’ak. Moris-di’ak signifika família sira iha uma di’ak, iha estrada, iha bee moos, oan sira ba eskola, iha osan, la preokupa aban atu han saida, ne’e mak moris-di’ak”, dehan Xefe Estadu.

Xefe Estadu aproveita agradese ba komisaun organizadora no ba família eroi sira ne’ebé hola inisiativa halo monumentu refere. Xefe Estadu impresiona ho monumentu refere tanba iha duni sentidu hodi husik memória ba jerasaun foun sira.

Iha parte seluk, eis-Komandante En Xefe Falintil, Kay Rala Xanana Gusmão, atuál Ministru Planeamentu no Investimentu Estratéjiku, hatete katak “eroi trajédia Tchaivatxa la’ós família nian, nein Lospalos nian de’it, maibé sira hanesan herois Timor-Leste nian”.

Eis-Primeiru Ministru ne’e husu ba família eroi sira, liuliu deputada Albina ne’ebé hanesan feto-faluk hosi Komandante Falutxai atu husik ona sentimentu triste, no husu família tenke orgullu tanba ema ne’ebé sira hadomi husik sira hodi fó vida ba Ukun-Rasik An.

Serimónia inaugurasaun ne’e hahú ho misa agradesimentu, no kontinua tau ai-funan no asina plaka inaugurasaun
Hola parte iha serimónia refere, membru governu balun, membru Parlamentu Nasionál balun, Komandante Jerál PNTL, Xefe Estadu Maiór Jenerál F-FDTL, família erois trajédia Tchaivatxa nian no komunidade Lospalos Villa.