Dili, 25 Agostu 2015 – S.E. Prezidente Repúblika, Taur Matan Ruak, ne’ebé maka Primeira Dama, Isabel Ferreira, akompaña partisipa iha serimónia rituál uma-lisan Uaibitai, Suku Letemumo, postu administrativu Quelicai, munisípiu Baucau, domingu semana kotuk.

 Iha rituál ne’ebé refere, komunidade sira hala’o atu kasu filafali bei’ala na’in-haat hosi uma-lisan Uaibitai ne’ebé uza lulik taka-dalan atu impede Administrasaun Koloniál Portugés nian atu loke postu iha sira-nia knua.

 Iha serimónia rituál ne’ebé refere, lia-na’in sira halo ofertóriu karau mate ida ne’ebé uza hodi hasa’e lia ba bei’ala sira atu kore ona lulik ne’ebé bei’ala sira iha tempu ne’ebá uza hodi atu taka dalan ba Portugés sira. Intensaun husi rituál ne’e para atu nune’e SEPFOPE bele loke estrada rurál liubá iha sira-nia knua no sei la hetan obstákulu ruma.

 Iha nia mensajen, Xefe Estadu hatete katak, rituál refere importante tebes nu’udar identidade komunidade sira-nian atu oinsá bele hasa’e lia ba nia bei’ala sira atu fó matak malirin.

 Kona-ba estrada rurál ne’ebé atu loke ba knua refere, Xefe Estadu agradese ba SEPFOPE tanba bele apoiu inisiativa komunidade sira-nian atu loke estrada rurál ba knua Uaibitai iha foho Matebian nia klaran. Importante liu maka katak, estrada ne’ebé refere bele fasilita turista sira bá haree Matebian nia beleza no nia paizajen.

 Tanba ne’e Xefe Estadu husu ba komunidade lokál sira:

Ha’u husu imi-nia apoiu no kontribuisaun. Estrada ne’ebé atu loke mai ne’e la’ós serbisu kmaan, tanba ita fera fatuk, tanba ne’e imi tenke apoiu sira-nia (SEPFOPE) serbisu para ita-nia estrada di’ak hodi kria kondisaun para turista sira bele mai vizita ita-nia foho ne’ebé nia paizajen furak.”

 Estrada rurál ne’ebé atu loke ba knua refere liga tama husi postu administrativu Quelicai ho nia distánsia 8 km.

Iha serimónia rituál ne’ebé refere hola parte mós hosi Diretór Jerál SEPFOPE nian nu’udar reprezentante Sekretáriu Estadu SEPFOPE ne’ebé moras hela, administradór postu administrativu hosi Baguia no Quelicai, tanba, inklui komunidade sira hosi suku Haeconi (Baguia) no Letemumo (Quelicai), no mós tanba knua Uaibitai pertense mós ba postu administrativu rua nian hotu.