Suai, 19 Outubru 2015 – S.E. Prezidente Repúblika, Taur Matan Ruak, halo vizita segunda vés ba Kuartél-Jenerál Polísia Nasionál Timor-Leste (PNTL), munisípiu Covalima, postu administrativu Tilomar, iha segunda-feira.

 Iha nia intervensaun hafoin diskursu husi Komandante Polísia, Superintendente Eugenio Pereira, Xefe Estadu dehan katak, vizita ne’ebé hala’o ba Kuartél-Jenerál PNTL munisípiu Covalima ne’e hanesan nia vizita ba segunda vés dezde vizita uluk iha tinan hirak liubá.

 Ba vizita diálogu komunitáriu ne’ebé maka hala’o ne’e, Xefe Estadu lori bainaka espesiál na’in-rua ne’ebé kompostu husi Sra. Francisca Monica Fatima Soares, hanesan Xefe-Suku Soba, postu administrativu Laga, munisípiu Baucau, no Sra. Berta Santa Gonçalves Vieira, hanesan Administradór postu administrativu Dom Aleixu, munisípiu Dili.

 Wainhira hatán ba preokupasaun hirak-ne’ebé maka Komandante PNTL munisípiu Covalima Superintendente Sr. Eugenio Pereira aprezenta sobre kondisaun mínimu atu hatán ba preokupasaun komunidade Covalima no preokupasaun fronteira, inklui mós kestaun seluk hirak ne’ebé maka ofisiál polísia sira seluk hato’o, Xefe Estadu hato’o katak, Governu Timor-Leste através Ministériu Interiór koko atu hatán ba sira-nia preokupasaun, mezmu la’ós la hatán hotu dala ida de’it. Mas, klaru sei koko atu hatán ida-idak atu kria kondisaun ne’ebé simples maibé dignu atu fasilita ofisiál polísia sira atu hala’o sira-nia serbisu di’ak liután.

 Xefe Estadu mós fó hanoin ba ofisiál polísia sira hamutuk ho lideransa autoridade lokál husi munisípiu Covalima sobre pontu importante tolu hanesan tuirmai:

  • Ameasa boot la’ós mai husi li’ur maibé husi ita-nia rai-laran rasik, hanesan, kazu 2006 no kazu Mauk Moruk. No atu hatán ba preokupasaun ida-ne’e, kestaun maka oinsá ita bele jere deskontentamentu públiku nian.

  • Krime Organizadu: Ida-ne’e mosu tanba ema nia nesesidade no Estadu nia jestaun atu oinsá presta serbisu hirak ba públiku.

  • Importánsia husi serbisu polísia nian.

 Hafoin Xefe Estadu kontinua liután hodi elabora aspetu importante tolu sobre importánsia serbisu polísia nian hanesan tuirmai:

  • Tau matan ba polísia fronteira: presiza atu prepara kondisaun ba Unidade Polísia Fronteira nian ne’ebé maka la presiza atu luxu maibé simples mas dignu.

  • Polísia Komunitária: husu atu polísia komunitária atu kria koordenasaun serbisu ne’ebé furak liután hodi serbisu besik liután ba ita-nia komunidade no lider komunitáriu. Hafoin,

  • Polísia Tránzitu: polisiamentu ne’ebé hala’o serbisu importante tebes.

Wainhira hatán ba perguntas sobre uma ba ofisiál PNTL sira, Prezidente Repúblika deklara katak, Governu Timor-Leste oras ne’e koko atu hatán neineik ba preokupasaun sobre rezidénsia polísia nian. Mas, la haluha mós atu fó hanoin ba veteranus sira katak, veteranu sira iha obrigasaun atu asiste Estadu.

 Hafoin sorumutu ne’ebé maka badak ne’e, Xefe Estadu hamutuk ho nia bainaka especial na’in-rua nu’udar refere iha leten, autoridade lokál hamutuk ho delegasaun tomak hafoin halo inspesaun ba Kuartél-Jenerál PNTL munisípiu Covalima nian molok hakat ba almosu hamutuk antes kontinua nia viajen atu bá halo diálogu ho komunidade iha suku Maudemo.