Dili, 15 Jullu 2015 – S.E. Prezidente Repúblika, Taur Matan Ruak, hala’o vizita ba sentru viveirus ai-oan iha Maubara, munisípiu Likisá, iha tersa-feira ne’e hodi haree rasik viveirus ai-oan hamutuk rihun 50 iha sentru ne’ebé maka hetan apoiu hosi eis-Prezidente Indonézia, Susilo Bambang Yudhyono.

Iha nia lia-menon, Xefe Estadu hatete projetu viveirus ai-oan hanesan pedidu Xefe Estadu nian ba nia omólogu SBY wainhira sei Prezidente Repúblika atu suporta ai-oan ba Timor-Leste hodi kuda iha Timor laran tomak ho objetivu atu hamatak filafali ai-laran sira-ne’ebé daudaun ne’e molik tanba kauza hosi ema tesi no taa ai arbiru.
Xefe Estadu aproveita Vise Ministru Agrikultura, Marcos da Crus, ne’ebé mós marka prezensa iha fatin no husu atu Ministériu Agrikultura tenke envolve an iha projetu ne’ebé refere, no atu labele husik de’it ba tékniku hosi Indonézia.

Timor-Leste tenke envolve an iha projetu ida-ne’e. Sr. Vise Ministru Agrikultura, ha’u hakarak Ministériu Agrikultura envolve an maka’as. Tanba, ha’u lakohi ke wainhira bá sira-nia rain, sira konta dehan ita bá halo mas sira rai-na’in tuur hateke de’it, ne’e ha’u moe”,dehan Xefe Estadu ba Vise Ministru Agrikultura.

Iha biban refere, Xefe Estadu mós agradese tebes ba tékniku hosi Indonézia ne’ebé durante fulan sia nia laran tau matan ona ba viveiru ai-oan iha sentru ne’ebé refere atu bele fó rezultadu di’ak. Razaun maka katak tanba ai-oan hirak ne’ebé refere moris ho buras tebes.

Xefe Estadu mós konta esperiénsia iha Tailándia nian, iha ne’ebé kada família kuda ai-oan iha to’os laran, no akumula udan-been liuhosi ke’e rai, hafoin nahe plástiku ba laran no sei bele uza iha tempu bailoro hodi rega modo. Nune’e, husu para Timór-oan mós atu bele aproveita hodi halo tuir ezemplu ne’ebé refere iha kada uma-kain ne’ebé bailoro naruk susar atu hetan bee.

Ba Embaixadór Indonézia ne’ebé mós prezensa iha fatin ne’ebé refere, Xefe Estadu hameno katak:Sr. Embaixadór, ha’u hakarak lori ha’u-nia naran no lori ha’u-nia nasaun no povu Timór atu agradese Ita-Boot. Favór transmite ba Prezidente Indonézia katak, ha’u kontente loos ho kooperasaun ida-ne’e, embora iha difikuldades barak. Mas, ha’u espera katak prezensa Sra. Ministra Ambiente no Floresta nian iha ne’e bele hametin kooperasaun ida-ne’e di’ak liután ba futuru”.

Tuir planu ai-oan ne’ebé maka iha ona, Governu Indonézia sei entrega simbolikamente ba Timor-Leste liuhosi Ministériu Agrikultura no Peskas iha okaziaun vizita traballu Ministra Ambiente no Florestas Indonézia nian ne’ebé sei mai vizita Timor-Leste iha 29 fulan Jullu ne’e.

Ikusmai, Xefe Estadu mós fahe lembransa produtu artezanál lafaek ida ne’ebé halo husi Mármore hodi entrega ba tékniku na’in-lima ne’ebé durante fulan 9 nia laran tau matan ona ba viveirus ne’ebé refere tanba sira atu fila fali ona ba sira-nia rain Indonézia.