Dili, 5 Fevereiru 2015 – S.E. Prezidente Repúblika, Taur Matan Ruak,  simu  vizita kortezia  Embaixadór Boa Vontade ba Programa  Nasoins Unidas nian ba Dezenvolvimentu (PNUD), Sua Alteza Reál Prínsipe Erdeiru Noruega nian, Sr. Haakon, iha kinta-feira ne’e iha Palásiu Prezidensiál Nicolau Lobato.

Iha enkontru kortezia refere, Xefe Estadu ho Embaixadór Boa Vontade, sira troka hanoin kona-ba progresu dezenvolvimentu iha rai-laran no mós ko’alia kona-ba kooperasaun Timor-Leste ho PNUD durante ne’e.

Hafoin remata enkontru ho Xefe Estadu, ba imprensa sira Embaixadór Boa Vontade ba PNUD) Sua Alteza Reál Prínsipe Erdeiru Noruega nian, Sr. Haakon konfirma katak, nia enkontru ho S.E. Prezidente Repúblika la’o di’ak, no sira ko’alia kona-ba atividade hirak-ne’ebé maka iha relasaun ho objetivu dezenvolvimentu miléniu nian, inklui progresu dezenvolvimentu Pás no Rekonsiliasaun nian.

Sua Alteza Real Prínsipe Erdeiru Noruega nian ne’e mós haktuir liután katak, iha reuniaun ne’ebé hala’o ne’e, S.E. Prezidente Repúblika nia ko’alia kona-ba dezenvolvimentu iha Timor-Leste no mós kona-ba kooperasaun entre Timor-Leste ho Nasoins Unidas.

Informa mós katak, iha enkontru ho Embaixadór Boa Vontade ne’ebé S.E. Prezidente Repúblika hetan akompañamentu husi Xefe Casa Civil, Sr. Fidelis Magalhães, ko’alia mós katak UNDP sei kontinua ajuda dezenvolvimentu Timor-Leste iha área hotu-hotu ne’ebé Timor-Leste presiza.