Samalari-Laga, 13 Setembru, 2016 – S.E. Prezidente Repúblika, Taur Matan Ruak, iha segunda-feira hala’o diálogu komunitáriu ho komunidade sira Suku Samalari, Postu Administrativu Laga, Munisípiu Baucau.

Iha suku refere, Xefe Estadu refere filafali klarifikasaun hirak ne’ebé maka nia hato’o ona sobre razaun ba nia vizita ba suku hirak iha Timor-Leste laran tomak. Depois, Xefe Estadu mós aproveita okaziaun hodi esplika ba komunidade sira sobre dezafius no progresu ne’ebé Timor-Leste hasoru iha prosesu harii nasaun. Aleinde ida-ne’e, Xefe Estadu mós la haluha atu kontinua fó motivasaun, ka fó korajen ba komunidade sira sobre oinsá atu hadi’ak ekonomia uma-laran atraves atividade hirak ne’ebé maka bele fó benefísiu ekonomia ba sira-nia an, husu atu investe iha sira-nia oan nia edukasaun, kuidadu sira-nia saúde, no ikusmai, husu komunidade sira atu fó kontribuisaun liuhosi kooperasaun ho sira-nia autoridade lokál.

Xefe Estadu mós kontinua nia istória sobre esperiénsia iha suku hirak ne’ebé maka hetan ona susesu iha organiza an iha jestaun hadi’ak ekonomia, no halo sira-nia suku hirak sai hanesan ezemplu ba suku sira seluk.

Wainhira hakat fali ba iha sesaun husu no hatán, membru komunidade ida sente triste ba Xefe Estadu, tanba hafoin ukun an konflitu mosu beibeik. Ikusliu maka konflitu 2015 entre Mauk Moruk ho governu ne’ebé prejudika tebes ba sira-nia liberdade movimentasaun hanesan sidadaun, tanba persegisaun maka’as ne’ebé sira hasoru durante konflitu refere.

Hatán ba ida-ne’e, Xefe Estadu husu deskulpa ba komunidade Suku Samalari ba akontesimentu ne’ebé sira refere hodi dehan:

“Ha’u hakarak husu deskulpa inan-aman sira, tanba imi sente laran moras no terus dala ida tan. Ha’u nunka hanoin katak, ita iha Laga iha problema ida tan. Sala no todan ha’u maka lori, tanba hanesan aman no Prezidente Repúblika, ha’u maka la mampu atu evita raan fakar. Maibé, ha’u husu iha ne’e ba oin labele akontese tan fakar raan, tenke hotu ho ida-ne’e ona, labele iha tan fakar raan, i ha’u kontente tanba ha’u la’o ba fatin-fatin ita-nia sidadaun hotu-hotu hakarak atu moris hakmatek.”

Iha sesaun ne’e mós, membru komunidade ida sujere ba Xefe Estadu atu kria klínika espesiál ida própriu ba veteran sira atu halo tratamentu saúde. Tanba, sira merese duni atu hetan atensaun husi Estadu, liuliu sobre sira-nia saúde.

Ba preokupasaun ida-ne’e, Xefe Estadu hatán katak, iha duni ekipa ida iha Ospitál Nasionál Guido Valadares (HNGV) atu tau matan ba veteranus sira, maibé problema maka médiku sira la koñese hotu veteranus sira. Tanba ne’e, Xefe Estadu husu ba Ministériu Saúde atu kria baze dadus ba veteranus hotu, atu nune’e bele iha planu di’ak hodi atende veteranus sira. Xefe Estadu mós aproveita kedan hodi apela ba veteranus sira katak, kuandu sente iha problema saúde, hakbesik an kedan ba klínika, ka ospitál hodi tarata saúde, labele moras todan ona maka foin ba ospitál.

Iha parte seluk husi sesaun ne’e, membru komunidade ida seluk hato’o nia preokupasaun sobre bolsa-estudu ne’ebé governu fó ba bolseiru sira ba estuda iha universidade sira iha li’ur. Maibé wainhira remata fila mai, governu abandona hela de’it graduadu sira, ida-ne’e konsidera hanesan governu fakar de’it osan, tanba ikusmai, governu la uza rekursu ne’ebé governu rasik maka prepara.

Hatán ba ida-ne’e, Xefe Estadu dehan, buat sira-ne’e mosu tanba la iha planu ne’ebé di’ak. Nune’e Xefe Estadu konta istória hodi dehan katak, wainhira nia sei hanesan Xefe Estadu-Maiór Jenerál ba F-FDTL, sira haruka ema ba eskola bazeia ba planu ne’ebé iha ona, atu nune’e wainhira graduadu sira fila mai, sei tau iha fatin mamuk ne’ebé maka iha tuir nesesidade.

Nune’e, Xefe Estadu hatán hodi dehan:

“Se governu fó tiha bolsa-estudu, pois hotu fila mai la uza di’ak liu lalika fó. Tanba, ita gasta tiha osan, depois sira mai fali ita atu lori sira ba ne’ebé ita la hatene, entaun tanba saida Estadu tenke gasta osan? Uluk, ha’u sei iha militár, ami-nian mai fó kedas fatin. Tanba, ami iha ona planu, tanba ita kuandu fó bolsa-estudu porke ita presiza.”

Hola parte mós iha diálogu refere, bainaka Xefe Estadu nian hanesan, Xefe-Suku Ritabou husi Munisípiu Bobonaro no Xefe-Suku Fahisoi husi Munisípiu Aileu.