Dili, 27 Marsu 2017 – S.E. Prezidente Repúblika, Taur Matan Ruak, tersa-feira ne’e prezide serimónia komemorasaun loron aniversáriu Polísia Nasionál Timor-Leste (PNTL) ba dala 17 ne’ebé maka hala’o iha Akademia Polísia, Komoro, Dili.

Iha oportunidade komemorasaun refere, Xefe Estadu kondekora Insígnia da Ordem de Timor-Leste ba instituisaun Polísia Nasionál Timor-Leste, no mós ba Komandante Jerál PNTL, Komisáriu Julio Hornai, ba empeñamentu serbisu Komandu PNTL nian ne’ebé asegura ona seguransa no pás ba sidadaun sira-nian durante ne’e

Iha nia diskursu, Xefe Estadu hatete:

Ha’u fiar katak rekoñesimentu públiku ne’ebé maka ha’u fó iha serimónia ida-ne’e hodi kondekora imi-nia instituisaun ho Colar da Ordem de Timor-Leste, no prega insígnia ba iha Estandarte Nasionál, hanesan rekoñesimentu ida ne’ebé justu duni. Nune’e, ho sentimentu gratidaun ida-ne’e no hodi fó rekoñesimentu ba Polísia Nasionál tomak liuhosi jestu ida-ne’e. Ha’u hakarak uza oportunidade ida-ne’e kondekora mós Komisáriu Julio da Costa Hornai ho Insígnia da Ordem de Timor-Leste ba servisu hirak ne’ebé nia presta ona ba Nasaun iha Komandu Jerál PNTL nia laran.”

Xefe Estadu mós louva ba tebes ba dezenvolvimentu iha instituisaun PNTL nia laran liuliu Polisiamentu Komunitáriu:

“Ha’u labele haluha atu hahi’i esforsu ne’ebé hosi PNTL hodi hasa’e kapasidade rekursus umanus nian, halo sira-nia atividade operasionál sai efikás liután, hadi’ak kondisaun serbisu membrus PNTL nian, intensifika programa polisiamentu komunitáriu tuir modelu VIP (Vizibilidade, Envolvimentu no Profisionalizmu), hametin kooperasaun bilaterál no multilaterál ho Forsas no Servisus Seguransa nasaun seluk nian, no hametin PNTL nu’udar instituisaun ida ne’ebé importante tebetebes ba seguransa públika, ba pás no mós ba estabilidade iha rai-laran.”

Aproveita biban refere, Xefe Estadu mós fó parabens ba povu Timor-Leste nia partisipasaun iha eleisaun Prezidensiál ne’ebé hala’o ona ho hakmatek no pasífiku, e husu atu kontinua mantein iha eleisaun lejizlativa ne’ebé sei tuirmai.

Ikus, Xefe Estadu husu ba Governu atu investe iha infraestrutura no ekipamentu modernu nune’e bele hasa’e Polísia nia kapasidade operasionál no valoriza sira-nia kareira.

Iha komemorasaun refere, atribui mós Medalla Servisu ba ofisiais altu nivel na’in -18, Medalla Méritu Seguransa Públika, no Medalla Komportamentu Ezemplár ba membrus PNTL no indivíduu hosi li’ur ne’ebé hadi’ak prestasaun serbisu iha instituisaun PNTL nia laran.

Partisipasaun Xefe Estadu nian iha serimónia komemorasaun refere, hanesan partisipasaun ba dala ikus nian. Tanba, iha loron 20 fulan-Maiu mai ne’e, Xefe Estadu sei entrega podér ba fali Xefe Estadu foun ne’ebé eleitu ona, Dr. Francisco Guterres Lu-Olo.

Partisipa iha komemorasaun ne’e Primeiru Ministru Dr. Rui Maria Araújo, ho nia membrus governu, vise-Prezidente Parlamentu Nasionál ho deputadus, reprezentante Prezidente Tribunál Rekursu, Prokuradór Jerál Repúblika, Xefe Estadu-Maiór Jenerál F-FDTL, Major Jenerál Lere Anan Timur, Ministru Interior Dr. Longuinhos Monteiro, ofisiais PNTL sira, korpu diplomátiku no bainaka importante sira seluk.HOTU