Bobonaro, 9 Fevereiru, 2017 – S.E. Prezidente Repúblika, Taur Matan Ruak, iha kuarta-feira semana ne’e hala’o diálogu komunitária ho komunidade iha Suku Cota-Boot iha parte dadeer no kontinua ba Suku Carabau iha parte lokraik. Suku rua refere pertense ba Postu Administrativu Bobonaro, Munisípiu Bobonaro.

Iha suku rua refere, Xefe Estadu esplika objetivu nia vizita ba suku sira iha territóriu laran hanesan; agradese ba kontribuisaun sidadaun sira-nian iha tempu okupasaun no husu tan dala ida ba komunidade sira atu la’o hamutuk ba buka moris-di’ak, tanba ukun-an hetan ona maibé moris-di’ak seidauk hetan, esplika kona-ba prosesu lala’ok nasaun nian hanesan dezafius no progresu ne’ebé atinje ona no saida mak presiza sei halo tan ba futuru oinmai, enkoraja no motiva komunidade sira atu tau matan ba ekonomia família nian liuhosi kuda ai-horis no hakiak animál sira-ne’ebé iha benefísiu ekonomia, hamenus lia-mate lia-moris hodi dudu oan sira ba eskola tanba rikusoin importante liu família nian mak rekursus umanus no ikus Xefe Estadu husu ba sidadaun sira atu serbisu hamutuk ho autoridade suku ba prosesu dezenvolvimentu iha suku laran.

Aleinde ne’e Xefe Estadu mós esplika kona-ba suku sira iha territóriu laran ne’ebé susesu ona iha organizasaun no jestaun iha suku laran, nu’udar motivasaun ba komunidade sira suku seluk oinsá bele banati tuir susesu refere.

Iha Suku Cota-Boot liuhosi sesaun husu no hatán, juventude ida preokupa kona-ba Xefe-Suku sira ne’ebé harii bandeira partidu polítika iha nia uma oin. Tuir joven ne’e katak, atitude refere hanesan presaun ba povu sira ne’ebé nia partidu la hanesan ho Xefe-Suku ne’e nian.

Hatán ba preokupasaun refere, Xefe Estadu husu ba komunidade sira atu lalika preokupa, tuir Xefe Estadu katak, mezmu Xefe-Suku iha partidu rasik, maibé hanesan Xefe-Suku iha devér tomak atu haree no tau matan ba nia sidadaun hotu. Nune’e, Xefe Estadu husu atu, se karik iha atendimentu maka Xefe-Suku la neutru, bele halo keixa ba Administradór Postu no Prezidente Autoridade.

Entretantu iha Suku Carabau, membru komunidade ida sujere ba Xefe Estadu atu kria hikas programa Gotong Royong (Serbisu hamutuk) ne’ebé eziste iha tempu okupasaun Indonézia nian atu uza iha suku hotu iha Timor laran tomak, tanba programa ne’e di’ak hodi ajuda dezenvolve suku hirak.

Hatán ba ida-ne’e Xefe Estadu dehan:

“Ha’u konkorda ho alin nia ideia ida-ne’e. Ita tenke hamoris filafali, tanba hafoin ukun-an tiha malae mai hanorin ita dasa uma oin mós selu $3.00. Kuandu, ha’u sai Prezidente, ha’u haruka Governu hapara tiha programa ne’e, tanba halo povu sai baruk-teen. Mas, imi Bobonaro sai ezemplu ba Gotong Royong, ha’u ba fatin-fatin fahe imi-nia esperiénsia ne’e atu sira halo tuir.”

Iha parte seluk, Xefe Estadu mós apresia ho juventude Suku Carabau nian ne’ebé maka iha inisiativa loke formasaun komputadór no inglés, hodi bele ajuda joven sira iha suku laran. Entaun, Xefe Estadu husu ba responsavel grupu joven ne’e nian atu serbisu hamutuk ho SEPFOPE hodi bele hetan apoiu ruma.

Preokupasaun seluk ne’ebé komunidade Suku rua levanta ba Xefe Estadu maka, hanesan, loke estrada ligasaun Ainaro – Bobonaro hosi foho nian ba mosu iha Suku Colimau, ne’ebé Xefe Estadu hakat liu iha tinan 2015 hodi la’o ain de’it; udan-been menus komunidade balun ameasadu hamlaha; loke Postu Saúde iha Suku Carabau; hadi’ak kanalizasaun bee moos ne’ebé oras ne’e daudaun aat ona, no problema sosiál seluseluk tan

Kona-ba preokupasaun seluk ne’ebé liga ba serbisu governu nian, Xefe Estadu fó oportunidade ba Xefes no Diretór setoriais no Prezidente Autoridade Munisípiu Bobonaro nian maka hatán no esplika diretamente ba komunidade sira.

Sai bainaka espesiál Xefe Estadu nian iha vizita refere, maka hanesan, Administradór Postu Administrativu Laulara, Munisípiu Aileu, Xefe-suku Abafala, Munisípiu Baucau, Xefe-suku Matahoi, Munisípiu Viqueque, no Xefe-suku Kampung Alor, Munisípiu Dili.