Bahatata – Uatu-Carbau, 11 Setembru, 2016 – S.E. Prezidente Repúblika, Taur Matan Ruak, iha sábadu semana nia rohan hala’o diálogu komunidade sira iha Suku Bahatata, Postu Administrativu Uatu-Carbau, Munisípiu Viqueque.

Iha suku Bahata, Xefe Estadu klarifika filafali esplikasaun hirak sobre razaun hirak halo nia bá vizita ba suku hirak iha Timor-Leste laran tomak. Hafoin nia mós aproveita oportunidade ne’e hodi esplika ba komunidade sira sobre dezafius no progresu ne’ebé Timor-Leste realiza ona no hasoru iha prosesu harii nasaun. Xefe Estadu mós kontinua motiva ka fó korajen ba komunidade sira sobre oinsá atu hadi’ak ekonomia uma-laran atraves atividade hirak ne’ebé maka bele lori benefísiu ekonomia ba sira-nia an, husu mós atu investe iha sira-nia oan nia edukasaun, kuidadu sira-nia saúde, no ikusmai, husu atu komunidade sira kontinua fó kontribuisaun iha períodu independénsia nia hodi serbisu hamutuk ho sira-nia autoridade lokál.

Hafoin, Xefe Estadu, mós konta esperiénsia suku hirak ne’ebé konsege hala’o ona melloramentu ba jestaun ekonomia, no husu atu halo tuir suku hirak ne’ebé maka ezemplár ne’e.

Kuandu diálogu progresu daudaun, membru komunidade ida aprezenta kestaun ba Xefe Estadu sobre oinsá atu hetan moris-di’ak. Hatán ba kestaun ne’e, Xefe Estadu dehan, atu hetan moris-di’ak, presiza serbisu maka’as no lapara, tanba ida-ne’e maka xave ba hetan moris-di’ak.

Hafoin, juventude ida mós husu ba SEPFOPE atu loke sentru formasaun hodi bele fasilita joven/foin-sa’e sira iha foho, ne’ebé só bele kompletu de’it eskola sekundária, atu nune’e bele hadi’ak sira-nia kapasidade.

Hatán ba ida-ne’e Xefe Estadu dehan:

“Ha’u, agora ta’uk lahalimar atu ko’alia kona-ba sentru formasaun ne’e. Tanba iha fatin balun, Governu loke tiha sentru formasaun, maibé joven sira lakohi aproveita to’o Governu taka fali de’it.”

Nune’e, Xefe Estadu husu ba joven para joven sira aproveita didi’ak sentru formasaun ne’ebé maka ida. Tanba, oportunidade mai dala ida de’it.

Hola parte iha diálogu komunitáriu refere maka, hanesan bainaka espesiál Xefe Estadu nian, hanesan, Administradór Postu Fatululik (Covalima), Xefe-Suku Lobunu no Leimea Leten (Postu Administrativu Atsabe, Munisípiu Ermera), Xefe-Suku Duyung (Postu Administrativu Metinaro, Munisípiu Dili), no Xefe-Suku Fatucalo (Postu Administrativu Turiscai, Munisípiu Manufahi).

Diálogu tuirmai sei hala’o iha Suku Samalari, Postu Administrativu Laga, Munisípiu Baucau.