Nunira, Laga, 13 Setembru 2016 – S.E. Prezidente Repúblika, Taur Matan Ruak, iha tersa-feira hala’o diálogu komunitáriu ho komunidade sira Suku Libagua iha parte dadeer, no kontinua ho sesaun lokraik nian iha ho komunidade Suku Nunira. Suku rua ne’e pertense ba Postu Administrativu Laga, Munisípiu Baucau.

Iha suku refere, Xefe Estadu refere filafali klarifikasaun hirak-ne’ebé maka nia hato’o ona sobre razaun ba nia vizita ba suku hirak iha Timor-Leste laran tomak. Depois, Xefe Estadu mós aproveita okaziaun hodi esplika ba komunidade sira sobre dezafius no progresu ne’ebé Timor-Leste hasoru iha prosesu harii nasaun. Aleinde ida-ne’e, Xefe Estadu mós kontinua motiva, ka fó korajen ba komunidade sira sobre oinsá atu hadi’ak ekonomia uma-laran atraves atividade hirak ne’ebé maka bele fó benefísiu ekonomia ba sira-nia an, husu atu investe ba sira-nia oan nia edukasaun, inklui hamenus lia-mate no lia-moris, kuidadu sira-nia saúde, no ikusmai, husu atu komunidade sira kontinua fó kontribuisaun atraves kooperasaun ho sira-nia autoridade lokál.

Xefe Estadu mós kontinua nia istória sobre esperiénsia iha suku hirak ne’ebé maka hetan ona susesu iha organiza an iha jestaun hadi’ak ekonomia, no halo sira-nia suku hirak sai hanesan ezemplu ba suku sira seluk.

Wainhira tama ba iha sesaun husu no hatán iha Suku Libagua, Xefe Aldeia ida husu ba Xefe Estadu sobre loke eskola ba aldeia sira ne’ebé dook hosi suku, inklui mós pedidu atu aumenta sala eskola ne’ebé la to’o. Tanba, alunus barak maka hamriik de’it iha varanda wainhira akompaña prosesu aprendizajen.

Hatán ba ida-ne’e, Xefe Estadu dehan, edukasaun iha problema barak, satan maka, orsamentu ba Ministériu Edukasaun ki’ik. Tanba ne’e, difisil ba Ministériu Edukasaun atu rezolve problema edukasaun nian liuliu sala eskola iha tempu badak nia laran.

Iha parte, veteranus ida mós lamenta sobre pensaun ne’ebé sira simu, tanba la tuir dedikasaun sira-nian iha funu. No mós, sira la satisfeitu, tanba mosu manipulasaun iha foti dadus.

Hatán ba ida-ne’e, Xefe Estadu rekoñese problema veteranus todan, maibé Xefe Estadu husu para veteranus sira atu iha pasiénsia hodi hein para Estadu buka dalan para rezolve. Maibé, Xefe Estadu mós espera katak, ba oin problema veteranu sira-nian sei bele rezolve ho didi’ak ho rezultadu katak, veteranus manán, povu manán no nasaun mós manán.

Depois, Xefe Estadu, esplika liután sobre nia preokupasaun ba futuru, liuliu sobre sustentabilidade pensaun ne’e nian relasiona ho orsamentu Timór nian. Tanba, pensaun ne’e depende de’it ba finansiamentu husi fundu mina nian, no oras ne’e daudaun, presu mina nian monu maka’as, no sai hanesan ameasa boot ba sustentabilidade orsamentu Estadu iha futuru.

Iha diálogu ho komunidade sira iha Suku Nunira, membru komunidade ida husu ba Xefe Estadu atu ajuda rezolve disputa masin entre komunidade Suku hitu Laga nian ho komunidade Suku Saelari. Tanba, tuir istória masin ne’e pertense hotu ba suku hirak ne’ebé maka iha Postu Administrativu Laga nian.

Hatán ba ida-ne’e, Xefe Estadu husu ba lia-na’in sira hosi parte rua ne’ebé envolve iha disputa atu serbisu hamutuk ho autoridades Postu Administrativu no Munisípiu hodi tuur hamutuk atu buka solusaun ba problema refere.

Nune’e, Xefe Estadu dehan:

“2009, ha’u ho Maun Xanana asiste imi-nia problema. Ha’u moe, imi hadau malu masin (de)pois funu hotu, ne’ebé, ba ha’u, imi iha dalan rua. Ida imi ho imi-nia autoridades tuur rezolve, ou imi lori malu ba tribunál. Más, atensaun, ba tribunál, ida tenke lakon. Ha’u kontente, tanba, Administradór hatete ona mai ha’u, halo esforsu para imi hamutuk hodi buka solusaun, i ha’u espera imi bele rezolve. Mas, tuir lei, rekursu hotu, tantu bee ka masin, ne’e Estadu maka nia na’in no administra, mas komu ita foin ukun an, ita komprende. Ne’ebé, ha’u konfia iha lia-na’in no autoridade sira para buka dalan rezolve problema refere. Se labele dalan seluk ba, imi lori malu ba tribunál.”

Membru komunidade ida mós preokupa kona-ba veteranus hadau malu projetu, liuliu projetu estrada iha sira-nia suku, ne’ebé halo projetu la la’o.

Hatán ba ida-ne’e, Xefe Estadu dehan, problema refere, kuaze akontese iha fatin hotu iha territóriu laran, ate veteranus balun baku malu tan hadau malu projetu. Tanba ne’e, Xefe Estadu apela ba veteranus sira, karik konflitu kona-ba projetu tenke buka fahe ba malu atu nune’e projetu sira bele la’o no povu bele sente dezenvolvimentu.

“Veteranus hadau malu projetu ne’e loos, ne’e iha fatifatin, iha Viqueque, Ermera, iha Suai sira baku malu tan. Maibé, saida maka Prezidente Repúblika nia hanoin, sei iha projetu fahe uitoan-uitoan ba malu, povu hakarak iha listrik no iha estrada, labele hadau malu hodi prejudika povu”, Xefe Estadu hatán.

Hola parte mós iha diálogu refere, bainaka Xefe-Estadu nian hanesan, Xefe-Suku Ritabou husi Munisípiu Bobonaro, Xefe-Suku Fahisoi husi Munisípiu Aileu.