Dili, 10 Outubru, 2016 – S.E. Prezidente Repúblika, Taur Matan Ruak, kondekora kolar aas liu Estadu Timor-Leste nian “GRANDE COLAR DA ORDEM DE TIMOR-LESTE” ba eis Prezidente Repúblika (1986-2005), Mosambike nian Sr. Joaquim Alberto Chissano, segunda-feira ne’e iha Palásiu Prezidente Nicolau Lobato.Kondekorasaun refere, nu’udar agradesimentu Estadu Timor-Leste nian ba eis Prezidente Sr. Joaquim Alberto Chissano, nia kontribuisaun iha prosesu luta ba autodeterminasaun Timor-Leste nian durante iha okupasaun estranjeira nia okos.

Hafoin kondekora tiha Grande Kolar, iha nia diskursu, Xefe Estadu Taur Matan Ruak hatete, sente onradu simu eis Prezidente Chissano iha Timor-Leste, nune’e hodi povu Timor-Leste nia naran hato’o rekoñesimentu ba esforsu eis Prezidente Chissano nian ne’ebé apoiu ona luta Timor-Leste nian hodi hetan ukun rasik-an.

“Nune’e maka ho onra no satisfasaun boot tebes maka ha’u simu Sua Exelénsia iha ha’u-nia rain hodi entrega Grande Colar da Ordem de Timor-Leste nu’udar símbolu ba servisu ne’ebé Ita-Boot halo ba Timoroan sira ho Umanidade, no mós ba povu no Estadu Timor-Leste nia admirasaun no konsiderasaun tomak”, dehan Xefe Estadu iha nia diskursu hafoin fó tiha kondekorasaun.

Tuir loloos eis Prezidente Joaquim Chissano simu ona kondekorasaun ne’e iha loron 30 fulan-Agostu 2009 hosi eis Prezidente Repúblika Dr. José Ramos-Horta maibé tanba razaun saúde nune’e muda filafali to’o data ne’e.

Kondekorasaun Grande Kolar ba eis Prezidente Chissano dekreta liuhosi Dekretu Prezidente Repúblika nr. 25/2009 loron 30 fulan-Agostu.

Ordem de Timor-Leste, kria liuhosi Dekretu Lei nr. 20/2009 loron 24 fulan-Abríl 2009 ho objetivu atu hatudu, ho prestíjiu no dignidade, Timor-Leste nia rekoñesimentu ba ema nasionál no estranjeiru sira-ne’ebé kontribui maka’as ona ba Timor-Leste, Timoroan sira ka Umanidade durante hala’o sira-nia atividade profisionál, sosiál ka iha aktu espontáneu eroisidade ka altruizmu nian.

Hola parte iha kondekorasaun refere, Primeiru Ministru, Rui Maria de Araújo, Eis Prezidente Repúblika, Dr. José Ramos Horta, Primeira Dama, Isabel da Costa Ferreira, Prezidente Tribunal Rekursu en-ezersísiu Dra. Natercia Gusmão, membrus korpu diplomátiku no Mosambike-oan sira ne’ebé hela iha Timor-Leste.

Hafoin remata entrega kondekorasaun, partisipante sira hahú hosi eis-Prezidente Mosambike, Joaquim Chissano, eis Prezidente Repúblika, Dr. José Ramos Horta, Primeiru Ministru, Rui Maria de Araújo, no konvidadus sira, aproveita fó votus aniversáriu nian ba S.E. Prezidente Repúblika, Taur Matan Ruak ne’ebé iha loron refere halo tinan ba dala 60. ~~HOTU~~