Dili, 17 Marsu, 2017 – S.E. Prezidente Repúblika, Taur Matan Ruak, sesta semana ne’e kondekora orden aas liu Estadu Timor-Leste nian, Grande Colar Ordem de Timor-Leste, ba eis-Governadór Jerál Nova Zelándia, Sir Jerry Mateparae, iha Palásiu Prezidénsia Repúblika Nicolau Lobato.

Kondekorasaun ne’ebé maka hala’o, sai hanesan rekoñesimentu Estadu Timor-Leste nian ba atividade profisionál no sosiál hirak ne’ebé maka hanesan aktu espontáneu, eroisidade ka altruízmu ne’ebé konsidera signifikativamente iha benefísiu ba Timor-Leste, ka Timoroan sira, no umanidade.

Partisipa iha serimónia kondekorasaun ne’e maka Primeiru Ministru, Dr. Rui Maria Araujo, Prezidente Parlamentu Nasionál, Aderito de Jesus Hugo, Primeira Dama, Sra. Isabel da Costa Ferreira, eis-Prezidente Repúblika (2007-2012) no Premiadu Nobél ba Pás, Dr. José Ramos-Horta, no bainaka importante sira seluk tan.

Xefe Estadu iha nia diskursu depois kondekora tiha eis-Governadór Sir Jerry Mateparae, hatete: “Atribuisaun Grande Colar da Ordem de Timor-Leste, hanesan kondekorasaun nasaun nian ne’ebé aas liu hotu, sai nu’udar símbolu ida hosi ha’u-nia rekoñesimentu no ami-nia povu nian ba Sir Mataparae, tanba servisu sira-ne’ebé nia hala’o ba Timor-Leste no mós ba Timoroan sira. Nova Zelándia nu’udar poténsia promotora ba estabilidade iha rejiaun boot Ázia-Pasífiku nian, ne’ebé ita-nia nasaun rua halo parte ba.”

Hafoin, Xefe Estadu hatutan:

Iha tinan 1999, hahú kedas iha oras dahuluk, Nova Zelándia kontribui forsa internasionál sira-ne’ebé salva vida iha ami-nia rain, iha momentu krize nasionál ida-ne’ebé boot tebetebes. Forsa Nova Zelándia nian sira tulun hodi halo sai posivel ba ami-nia povu nia autodeterminasaun. Ba sira hotu ne’ebé hato’o tiha ona buat di’ak hosi sira-nia an, até sira-nia vida rasik, ba Timor-Leste atu manán direitu, hosi sira-nia esforsu, korajen no sakrifísiu atraves devér militár nian, ami hato’o ami-nia respeitu no ami hato’o ami-nia omenajen.”

Xefe Estadu mós subliña liután katak, ezemplu kooperasaun entre Timor-Leste ho Nova Zelándia maka, apoiu Polísia Nova Zelándia ba Polísia Nasionál Timor-Leste hodi kria polisiamentu komunitáriu ne’ebé duni benefísiu duni ba Timor-Leste.

Hafoin remata kondekorasaun, kontinua ho almosu-onra.

Eis-Governadór Jerál Nova Zelándia to’o iha Timor-Leste iha kinta semana ne’e, no durante nia estadia loron rua iha Timor-Leste, aleinde simu kondekorasaun Grande Colar, eis-Governadór Jerál ne’e hala’o mós vizita ba Jardim dos Heróis da Pátria iha Metinaru no vizita Muzeu Rezisténsia Timor-Leste nian.

Vizita eis-Governadór mai Timor-Leste nu’udar hatán ba konvite Xefe Estadu nian. HOTU