Dili, 11 Janeiru 2015 – S.E. Prezidente Repúblika, Taur Matan Ruak, simu ba dala uluk Primeiru Ministru Indijitadu, Dr. Rui Maria de Araujo, iha Palásiu Prezidensiál Nicolau Lobato iha kuarta-feira ne’e.

Hafoin remata enkontru ne’ebé hala’o durante oras ida nia laran, ba jornalista sira, Primeiru Ministru indijitadu, dr. Rui Maria de Araujo, hatete katak, nia reuniaun ho S.E. Prezidente Repúblika ko’alia kona-ba asuntu rua, ida kona-ba kompozisaun governu nian i lei governamentál. I Sr. Prezidente Repúblika konkorda ho proposta ne’ebé maka governu aprezenta. Ko’alia mós kona-ba Tomada de Posse governu foun ninian ne’ebé Sr. Prezidente mós konkorda katak, Tomada de Posse ba Governu foun sei hala’o iha segunda-feira, loron 16 fulan-Fevereiru tuku 3 lokraik iha Palásiu Nobre, Lahane, Dili.

Hatán sobre detalle ba kompozisaun membru governu foun, Primeiru Ministru indijitadu esplika katak, informasaun sei fó sai tuir atraves konferénsia da imprensa. Ba jornalista sira, eis Ministru Saúde iha Primeiru Governu Konstitusionál ne’e mós haktuir:

“Priviléjiu i onra boot ida mai ha’u atu hamriik iha governu ida ne’e nia oin, governu ida ne’ebé no fundu reprezenta unidade nasionál, reprezenta konsensu polítiku ne’ebé oras ne’e daudaun iha ita-nia rai laran”, wainhira husu sobre konfiansa ne’ebé maka nia hetan ona atu asume kargu hanesan Primeiru Ministru hodi troka lideransa istóriku ida hanesan Xanana Gusmão.

Iha parte seluk, Xefe Casa Civil Prezidénsia Repúblika nian, Dr. Fidelis Leite Magalhães, ne’ebé maka akompaña mós Primeiru Ministru Indijitadu iha enkontru ho Xefe Estadu, klarifika ba jornalista sira sobre mudansa data tomada de posse ne’ebé antes ne’e Prezidénsia Repúblika anunsia ona katak, data tomada de posse sei hala’o iha sesta-feira 13 Fevereiru. Maibé, tanba razaun preparativa, hanesan lojístika no buat seluk, Primeiru Ministru indijitadu propoin atu muda fali ba segunda-feira, dia 16 Fevereiru 2015.