Dili, 26 Agostu 2014 – S.E. Prezidente Repúblika, Taur Matan Ruak, tersa-feira  ne’e iha Palásiu Prezidensiál Nicolau Lobato, simu vizita Estadu hosi nia omólogu Prezidente Repúblika Indonézia S.E. Susilo Bambang Yudhoyono.

Prezidente Susilo Bambang Yudhoyono ho nia espoza Sra. Hj. Ani Yudhoyono, to’o iha Palásiu Prezidensiál tuku 10:55, simu diretamente hosi Prezidente Taur Matan Ruak no Primeira Dama Sra. Isabel Ferreira, kontinua kedas ho guarda de onra no toka inu nasionál país rua nian.

Prezidente Taur Matan Ruak ho Primeira Dama oferese almosu em onra ba Prezidente Susilo Bambang Yudhoyono ho ninia delegasaun.

Xefe Estadu na’in-rua hato’o sira-nia hanoin no kompromisu ne’ebé hanesan, atu hametin liután relasaun entre nasaun no povu Timor-Leste no Indonézia, no mós kontribui harii pás iha rejionál no mundiál.

Iha ninia diskursu hafoin almosu, Prezidente Taur Matan Ruak hato’o benvindu ba Prezidente Susilo Bambang Yudhoyono hodi hatete katak vizita ne’e hatudu ilustrasaun ho furak kona-ba relasaun exelente ne’ebé eziste entre Timor-Leste no Indonézia.

 “Amizade no kooperasaun intensivu ne’ebé ita harii ne’e iha abut-metin iha determinasaun hosi ita-nia rain sira-nia governu no ita-nia povu nia dezeju”, dehan Prezidente Taur Matan Ruak.

“Ha’u hakarak atu agradese ba kontribuisaun Sr. Prezidente Susilo Bambang Yudhoyono nian tanba harii konfiansa no dezenvolvimentu relasaun armonioza entre ita-nia rain rua, durante tinan sanulu ikus liubá”, dehan Prezidente Taur Matan Ruak.

Xefe Estadu hato’o hikas kompromisu Timor-Leste nian ne’ebé kontinua prepara an ativamente atu sai membru ASEAN.

Ha’u reitera ami-nia rekoñesimentu ba Sr. Prezidente Susilo Bambang Yudhoyono ba nia empeñamentu no apoiu sólidu hosi Indonézia ba ami-nia pedidu atu tama ba iha ASEAN”, Xefe Estadu realsa.

Refere ba rai sira ne’ebé sei moris iha konflitu laran, Prezidente Taur Matan Ruak hato’o nia hanoin atu kontribui ba estabelesimentu sentru ba pás no konfiansa internasionál ida, ne’ebé komposta hosi personalidade sira hosi rai rua ne’e nian hodi promove ajenda ba prosperidade no promove diálogu ba solusaun ba konflitu sira no rekonsiliasaun.

Prezidente Susilo Bambang Yudhoyono sente haksolok ho relasaun amizade ne’ebé eziste entre nasaun no mós povu Timor Leste ho Povu Indonesia ne’ebé durante ne’e la’o iha pás no armonia nia laran.

Kooperasaun entre ita-nia nasaun iha setór hotu-hotu hahú metin liután husi loron ba loron, ita-nia kooperasaun luan tebes ne’ebé lori benefísiu ba nasaun rua ne’e”, dehan Prezidente Susilo Bambang Yudhoyono iha ninia diskursu.

Prezidente Indonézia ne’e impresionadu tebes ho Timor Leste nia kresimentu GDP ka Produtu Internu Bruto, ne’ebé tuir dadus Banku Dezenvolvimentu Aziátiku nian, prezidente Yudhoyono hatete, atinje ona 8,1% iha tinan 2013 no sei iha posibilidade sa’e to’o 8,5% iha tinan hirak tuirmai.

 “Ida-ne’e nu’udar realizasaun ne’ebé impresionadu tebes”, dehan Prezidente Yudhoyono.

Kona-ba adezaun Timor Leste nian ba ASEAN, Prezidente Yudhoyono deklara katak Indonézia la’ós de’it apoia maibé sei kontinua halo esforsu hodi mobiliza apoiu hosi nasaun membru sira.

Prezidente Yudhoyono aseita ho ideia Prezidente Taur Matan Ruak nian atu kontribui ba harii pás liuhosi estabelesimentu forum ida hodi fahe esperiénsia ba mundu kona-ba harii pás no rezolusaun konflitu, ne’ebé tuir Prezidente Yudhoyono katak Timor Leste ho Indonézia nu’udar ezemplu no modelu ne’ebé husik tiha pasadu hodi la’o ba oin iha amizade nia laran no respeita malu.

Iha biban ne’e, Prezidente Yudhoyono mós halo despedida tanba sei entrega kargu nu’udar prezidente ba prezidente foun Indonézia nian, i nia fiar katak ho lideransa Prezidente eleitu Joko Widodo, relasaun entre Timor Leste ho Indonézia sei metin liután iha futuru.

Remata almosu de onra, Xefe Estadu na’in rua ho Primeira Dama Ida-idak kuda ai-oan sándalu iha Palásiu Prezidensiál nia oin nu’udar símbolu amizade entre país rua.

Antes husik Palásiu Prezidensiál, S.E. Prezidente Susilo Bambang Yudhoyono akompañadu hosi S.E. Prezidente Taur Matan Ruak  partisipa iha  serimónia inaugurasaun Uma Matenek, organiza hosi Primeira Dama Timor-Leste nian,  parseria ho Primeira Dama Indonézia.